Adelaide Easter Conference nuam ei
Pa Kap kianga khatvei mikhat in Pa Kap na sazuk matna koilai hi-a, a bang cih leh vamankha nahia? Cih adot leh aman’ zong limgen nuamlua hiding hiven, Cikha ah pai in thauvuilei, inn ka tunteh hongmasing thauvui tawh helding vala inn ah phophot, tua khitteh ka tanute tawh thauvuisu ci-a, apat leh khat in sausalua hiding hiven, kalaih kei amatteh hong paikik ningei ci-in paisan hi. Tua mah bangin I Khawmpi vai pen bulpat piandih ni.
Hih Khawmpi zang dingin ni 2/04/15 Wednesday ni nitak zan nai 11:35pm in ka omna khua nidang Bethlehem khuano a bang’ thilthel panin Meileng tawh ka dingkhia hi. Pastor. Steve kiangah hong khadah in nai mahmah, zan zong sawtta khe tawh zong minute 5 kan ki pailo ding hi, ci-in ka nialnial hangin mi gilo khatpeuh omkha leh tulai khuahun hoih loh tawh hong kha veve ning, ci-in a Mawtaw hoih pen tawh hong kha in Meileng khawlna phual ka tun uhteh thu hong ngetsak in ka kikhen uh hi.
Dr. Khenno in Brisbane aom eimi nupite pau a ciamnuih na a, agen dan leh Big Ban( Brisbane) pen zingsang nai 4:00am kim pawl in ka tung hi. Tua panin Local Train tawh pai leuleu in inn ka tunteh khuavak nailo in tawlkhat ngakphot in tua khitteh Nu’ ci-in kong ka kiuh leh ka nu hong thopah seisai hi. Ki hahkhia in ka tawlnga a, sunsung van kisam pawlkhat leiding in Sia. Mangpi cial in a Mawtaw tawh hong paipah hi. Sangsang leh ka nau Sangpu tawh ka vek un vak in van kisam pawlkhat ka leikhit uhteh ka ciah uh hi.
Nitak ciangin ka vaikhat lah hong lemtheilo ahih manin ka lawm UPa. Khaitawng te’n vak in Vanleng ticket vai kankawm in January kha a, ka laibukawm( Dr. Enno tangthu) ka vapia seisai kawm hi. Ama’n January kha pek in Vanleng ticket na laksak khin a, kician mahmah, a tawan zo mahmah kasa hi. A Innkong uah Dr. Muan tawh kituak in nang hong zawnphei dingin hong paisawm lian hi-ing, pai ou I khawmpi lading sin ni-ei, Sia. Mungpi te’n ah ci-in tu zong tuman nawnlo in ka nau Sangpu tawh ka thum un a Mawtaw hoih pen tungah tuangin ka pai uh hi.
Khawmpi simding teng tawh la kasin ziahziah uha, Dr. Muan pen mangkangte tawh aki thuah sawtta ahih manin ka upmawh bang hetlo, eila khawng tampi na ngahlai dep, githa khawng zong hong vik ziahziah theilai a, khauhpai mahmah kasa hi. Lasin khitteh zingsang vaiding ding dan kikum in nai 4:30am in inn panin vanlengtual zuanding in ka thukim diam uh hi.
Zanni tak a ki kupna omsa mah bangin UPa. Khaitawng in zingsang nai 4:00am in Phone tawh hong hopih in kei zong ki thawi in Pu. Cin te inn ah ki tuah ding ci ahih manin ka nu in hong khaphei hi. Lampi ah Emmanuel Mawtawpi tawh ki tuak in ka tuangpah hi. Lawmte pawlkhat in na van puakna golsi e, hong ci uha, ka lungnuamlo ahih manin a gol hang, zang mahmah hi, kaci pong hi. Sm. Cingboi in Mawtaw hong hawl ziahziah in Aussie Zolia numei Mawtawpi hawl ka muh cilna zong hi-a, Brisbane aom eimite pau leh khauhpai kasa mahmah hi.
Lampi ah guahzu ziahziah denta leh khawl cih bang’ omlo in cidam in Local Vanlengtual ka tunguh hi. Local Vanlengtual pen New Delhi a, International Vanlengtual tawh ki tam khaihlo in na nopci mahmah hi. India banglo in hong khadingte zong platform ticket kullo in hong lutsuak thei velvel lel uh hi. Vanteng hong en uha, tawm ka ngakkhit uhteh nai hong cingin Adelaide lam zuanin Vanleng tawh Khawmpi sim dingin ka leng ciaiciai uh hi. Adelaide pen zingsang nai 9:30 kimin ka tung uha, Pa. Dal(Laitui), Pa. Sum(Tuikhiang), Pa. Kimpu(Laitui) leh Melbourne pan a zingsang ni 4 pawl a, ana tungkhin Zomi Musician Dalkhek te’n hong na dawn uh hi. Ku amah katheih om nailo ahih manin ka ki pulak tawm uh hi.
Sia. Dalkhek bang pen ni dangm, a laigelhte leh mi kamsawn pan a, kazak cih simloh mu ngeilo ka hih manin Mawtaw tung bang ka tuan khopkhop hangun ki theilo in Dr. Muan in khatvei Music leh Song System lam tawh kisai ko kianga eimite kiangah hong hilhthei lecin a cihteh aw! Nang Dalkhek kici pen maw, khongaw, ci-in athak in ka hopih kik leuleu hi. Lampi ah ka zinding uh ka tunma un Emmanuel Pawlpi makaite thusiamna tawh kiallap ann nasia tak in Hungry Jack annsai ah ka ne uh hi.
Tua panin Kaman uhteh ka zinding uah kapai uh hi. Ka zintun nate uh pen nanuam mahmah in niding Tedim ah aomlai in Brisbane Emmanuel Pawlpi Chairman pa zi tawh na nak kitheih mahmah uha, Nu San in kaneulai ua, hite pawl in ka thu hong mang mahmah uh hiai,ci-in ciamnuih hong bawl a, kanui ziahziah uh hi. Khua khat meltheih tanau vive himawk ahih manin inn bang mah in ka ngaihsun ciat uha, nuam kasa mahmah uh hi. Mawtaw in kikhop dingteh hong dawnlo hi leh kikhop ding bang, aki mangngilh theimai ding dan hi.
Sun ann neding ci-in Mawtaw in hongla a, ka vapai uh leh ann neekna mun pen Biak-inn huangsung Hall pikhat na hi-a, inntek siapa in ann tawh kisai mawhpuakna a lading mi a cialngiat na hi-a, Khawmpi simkhempeuh annsai a, ann ne mah ka bang uh hi. Annsai mawkmawk zong hikei, Chinese Restaurant te pawl ahi hi. Khawmpi sim bekbek inntek Zomite a kihel nailo, mi a 100 asim ahih manin lamdang kisa mahmah hi.
Australia ah a beisa eimi Khawmpi teng lak-ah mundang,khuadang pan a, Khawmpisim a, apai mi atam pen hiding in ki gen hi. Zinmangpi pen Sia. Do Khup( Founder & President, Khitui Gospel) leh Sia. Khupte nupa(Sport Ministry, Zangkong OM asem Dr. Zambawi nau) te ahi uh hi. US leh leitung muntuamtuam zinkhin ban-uah mipil uliante tawh kikhawlsa vive uh ahih manin nuamthei mahmah uh hi.
Zing le nitak Sia. Do Khup in gupkhiatna thu tawh kisai hanthotna hong nei denzaw in Sia. Do Dal, Dr. Muan Thang, Sia. Khaibawi, Sia. Khupte nupa leh Sia. Sian Thang te’n sunciang in Seminar tawh kisai hong makaih uh hi. Sia. Piang in hun hong uksak zel in a kamsiam bek hilo, a mellah hoih,a thalah cinglai ahih manin kicim theilo hi. A zi leh a Pawlpi mite hampha mawk uhei. Praise & Worship te leh Musician te lah tulai leitungbup alok Hill song te mah bang uh ahih manin nuam kisa mahmah ciat hi. Hun neihteh aban zoplai ni. A nuai ah maan(photos) tawmkhat a ennuamta ding, ong khah ing. Khaibawi
Comment piaknop aomleh...