Malaysia kumpi in North Korean Ambassador pa agampan hawlkhia

Malaysia kumpi in North Korean Ambassador pa agampan hawlkhia

Kim Jong Nam ki suamlupna vai hangin Malaysia gamsung aom North Korea Embassy ah asemlaitak ahi Ambassador papen Malaysia kumpi in agampan in hawlkhiatna nei uh cih CNA pan kiza hi.

A hawlkhiatna ahangpen Latin lai in “persona non grata” akici, Manglai in “person not appreciated” ahihi. Zolai in adeihhuailo mikhat ahih manin, Malaysia kumpi in ahawlkhia cihding himawk hi. Kim Jong Nam sihna vaitawh Malaysia leh North Korea gamnih kikal nawngkaina piangsak ahih manin, Malaysia kumpi in tuni Saturday (Mar 04) ni in hawlkhiatna thu apia uh ahihi.

Malaysia Foreign Minister Anifah Aman in Press Release sungah agenna ah North Korean Ambassador papen Malaysia gampan in tuzawh nai 48 (ninihsung) in aki hepkhiat kulding citamawk hi. Malaysia Foreign Minister in thu piamawk ahih manin 04 March 2017 nitak 6pm hun akipan nai 48 (48 hours) sungin Malaysia gampan in apaikhiatloh phamawh hita hi.

North Korean Ambassador pa minpen Kang Chol hi a, tuni Saturday nitaklam 6pm hunin Malaysia’s Ministry of Foreign Affairs uliante tawh kimuding in Summon akipia hi a, pailomawk ahih manin Malaysia gampan in hawlkhiat atuak ahihi.

Gamnih kizopna makai “Malaysia Deputy Secretary General for Bilateral Affairs of the Foreign Ministry” asem laitak ahi Ambassador Raja Nushirwan Zainal Abidin tawh nitak 6pm in kimuhding akigensa cihi. Ahi zongin North Korean Ambassador pa pen pailo bekthamlo, Embassy panin Senior Officials khatzong paisaklomawk ahih manin, Malaysia kumpi in hawlkhiat athuaksak ahihi.

Aki muhkhopding vai uhzong thudang hilo a, Kim Jong Nam sihna vai mah aki kumding uh ahihi. Ambassador pa’n Kim Jong Nam sihna vaitawh Malaysian Police te mawhsak mahmah hi. North Korea te’n Kim Jong Nam sihna zongpen “VX nerve agent” akici Chemical Weapon hangin asi hizenzen loding a, lungtang sigui kitatvat “Heart Attack” tawh asi hiding hi ci’n Malaysia te mawhsak uhhi.

Malaysia Authorities te ii Postmoterm bawl, misiluang khei in asihna akankhiat Result pen umnuamlo pongmawk uhhi. Tuaban ah North Korean Officials te kihello in, aluang kikhei ci’n Malaysia kumpi thunei te mawhsak lailai hi.

Tuavaiteng hangin Foreign Ministry in Tuesday ni in Ambassador Kang Chol papen Summon khin uh a, Malaysia kumpi amawhsakna te thumna Written Apology hongnei in ci’n thupia uhhi. Tuani 10pm ma in nong zaksakkikkei peuhmahleh Malaysia Government in agam adal nadingin semding hi ci’n gen uhhi.

Tuazawh ni 4 bang cingkhin himahleh thumna neinuamlo in, bangmah thu zaksakna zong neilo hi. Tuahang in Malaysia kumpi in “persona non grata” ci’n a tangko khia uh a, ahawlkhia uh ahihi.

North Korea leh Malaysia gamnih vai zaknop semsem, lunglut huai semsem mawk ei. Bangciang hongtung uhdiam? North Korea gammakai pipa Kim Jong Un zong alungtom, asinsia mahmah leh gamtatsia mahmahkhat hisawnsawn mawkven….. ZD Sawltak #zomidaily