Philippine President Kawlgam hawhin huhna sum US$300,000 pia

Philippine President Kawlgam hawhin huhna sum US$300,000 pia

Philippines President Rodrigo Duterte pen Kawlgam hawhin cimawh dongtuak te adingin huhna sum US$300,000 zong piakkhiatna nei cih Irrawaddy pan kiza hi. Hih huhna sumte pen adiakdiak in Rakhine State sung aom buaina apianna te ah Humanitarian Aid zatdingin apiakkhiat cihi.

Rodrigo Duterte pen Philippines gamsung ah President asepzawh Official Visit in Kawlgam ahawhcilna ahihi. Kawlgam ahawhsung Monday ni in Naypyidaw ah State Counselor Daw Aung San Suu Kyi tawhzong kimuh khopna nei uhhi.

Myanmar’s President’s Office panin agenkhiatna ah President Duterte in huhnasum pen Aung San Suu Kyi tawh akimuhhun laitak in apiakkhiat ci uhhi. Aung San Suu Kyi pen Implementation of Peace and Development ah Chairperson asepna dungzui in, anasepna panpihna in President Duterte in $300,000 tak huhna apiakhia cihi.

Tuaban ah President Duterte leh Aung San Suu Kyi te’n Food Security and Agriculture vaitawh kisai in thukimna MoU (memorandums of understanding) zong letmat thuhna neikhawm uhhi.

Tuabek thamlo Philippines leh Myanmar gamnih kikal ah Anti-human trafficking, Counterterrorism, Anti-drug initiatives cih vaite zong ki kupkhopna nei uhhi.

Monday ni zingsanglam in Duterte leh Myanmar President U Htin Kyaw tezong ki muhkhopna nei uh a, gamnih kikal kizopna ahoih semsemding ngaihsutna te mah ki kumkhawm uhhi.

Tuabek thamlo Duterte pen Myanmar Military Chief, Senior – General Min Aung Hlaing tawhzong atuam ngiatin Horizon Lake View Hotel ah Monday ni in kimuh khopna nei uhhi.

Philippines President Duterte pen agam sungah makaipi asepcillam in guihtheih khamtheih zangteng kaplumsak ziahziah ahih manin ki lipkhap mahmah hi.

Related: Philippines President in Tax pialo te thatding cileuleu ei ~ ZD

Tu’nbel mithah kidawm zawdeuh hileh kilawm a, cimawh genthei te huhnading “Humanitarian Aid” ci’n Kawlgam bangah $300,000 bang hong piakhia giap leuleu hi. ZD Sawltak #zomidaily