Malaysia, Klang vengsung ah Operasi lutin gamdangmi nasem 113 kiman
Malaysia, Klang vengsung aom Supermarket minthang khat ii vankoihna Warehouse panin gamdangmi 100 val kimankhia cih theStar pan kiza hi. Klang, Jalan Kebun sung aom Warehouse khatpan in Immigration Department te’n amatkhiat uh ahihi.
Tua Supermarket pen amin kigelhkhialo a, Malaysia gamsung aom “Major Supermarket Chain” kici hi. (Ahi zongin apuantung enleng 99 Speedmart kici a, hihpen kumpi ulianpen khat ii azi neihsa acizong omhi. Tuahang in amintawh News ah akigelhkhialo zong hithei hi)
Malaysia Immigration Department te’n abeisa Monday nitaklam 3:30pm hunpawl in hih Supermarket Chain ii vankoihna, vankholna Warehouse ah Operasi lutsak uh a, gamdangmi akigawm in 150 bang thusitna nei uhhi.
Immigration director-general Datuk Seri Mustafar Ali in agenkhiatna ah tua thusit athuakte lakah mi 113 te’n Work Permit, Travel Document cihte akician neilo ahih manin kimansuak cihi.
Tua akimansuak “illegal foreigners” tepen Nepal gammi 40, Bangladesh gammi 39, Pakistan gammi 27, India gammi 2 leh Vietnam gammi 5 ahihi.
Hih gamdangmi te leh nasepna te hoihtak akisit ciangin hihte pen Home Ministry te tungpan in Licence aneilo Agent te tungpan nasemding in aki cialsawn ci uhhi.
Immigration Director pa ii genkhiatna ah tukumsung Malaysia gamsung ah gamdangmi thusitna athuak pen mi 143,868 phakhin cihi. Tuabang in thusitna aneihtheih nadingin Operasi bawlna ah Immigration Officer mi 12,249 te’n hanciamtak in sem uh cihi.
Gamdangmi akigawm in mi 143,868 bang thusitna akineihna panin mi 37,909 tepen Work Permit, Travel Document cihte akician neilo ahih manin kimansuak uhhi. Tuaban ah nasepnei Boss (Employer) zong tukumsung akigawm in 1087 kimankhin hi ci’n pulakkhia hi.
Tuabek thamlo, tukumsung bekbek in Malaysia gamsungpan illegal foreigners akiman, amau gamciat ah akipuakkik “Deportation’ akibawlzong mi 42,985 phakhin cihi.
More: Kuala Lumpur, Pudu vengsung ah Operasi lut in mi 40 val kiman, Myanmar 12 kihel
Khuasung mipi Public te’n gamdangmi Work Permit aneilo, illegal foreigner tepen nasemding in nacialkei un. Tua illegal foreigner gamdangmi te nasemding in azang aomleh thukhun ombang in thu hongkibawlding, Legal Action hongki lading hi ci’n genkhia hi. Tuaban ah gamdangmi Work Permit neilote nasem in acial natheihkhak uh aomlehzong amanlang in Immigration Department ah hong zasaksawn un cimawk hi. Sawltak #zomidaily
Comment piaknop aomleh...