Revd Dr Go Chin Zam, Speaker sepna lawhcing mahmah

Revd Dr Go Chin Zam, Speaker sepna lawhcing mahmah

Dear Thu-uppih akuamapeuh, Pasian lam honsakna tawh Kalay No.2 Section in a hunhunin Sia le Upa Thusinna kinei thei zel ahi hi. Tukum adingin tun ni thum sung kinei a, tuni tak teh a kizosiang ta ding ahi hi.

Thu-lu: “Kipawl Khopna”
LST bulphuh (Sawltakte 2:44)

Amun: Agape Ministries Center (AMC, Kalaymyo)
Ahun : AM.8:00-4:00 PM.

Speaker : Revd Dr Go Chin Zam (O.M, Natioal Director) Yangon, Myanmar. Section gamsung pawlpi 40 panin kipai a, sun hun Seminar ah, Minister teng leh Upa bekbek mi 200 bang kikah thei hi.

Dr.Zambawi’ thusiamna tawh Thailand a a naseppih mikang khangno, Pastor Paul hong tonpih a, Sia Zambawi tawh kithuahin thusinna neihpih khawm uh hi. Kamphen pen AMC Associate Pastor, Revd Kham Khen Tual (a) David Khen (Th.M, ACTS, Korea) in kamphen hi.

Nitaksim Dr.Zambawi in thugenpina nei den a, kikhawm pen biakinn sung leh balcony kidimzihziah den a, tha kingah thei mahmah hi. Lungsim hong nelsak ngiat ahi hi.

Thusinna pen workshop nam danin paipih uh a, thupi kiza thei mahmah hi. A group danin khen a thukikuptuahna leh holimna hun zong neihpih zel uh hi. Tuaban ah tunitak lam a tawpni keima kihel khak sun hunkhat ah, Pawlpi Siate leh a dangte thukingetsak tuahna hunlimcitakin nei a, Zeisu’ in a nungzuite’ khe a silsakna bangin action tawh laksak a, KST in mi tampite’ lungsim lawng cih kilang mahmah hi.

Hunman ding ciangin Thusin hunsung kilawmthakna ngah thak diak i om a, Tetti a pangnuam velvel i om leh ci-in hun tomno khat a hon leh Siate leh Upate mi khat khit khat hong ding, kituh ziahziah uh a, mi 8 in tetti hong pan man hi. Hun om lai hi leh om lai tham ding dan ahi hi.

Tuaban ah AMC Church Pastor, Revd Go Za Nang zong hun tom khat thugenna neisak uh a, Tapidaw nuntakna ah a kisam phadiak pawlkhat a gen ban ah Pawlpi sungah Siate vakzo ding khazum zong a kilawm ciang khat geelsak ding, iksik pongmawk lo ding, tuamah bangin Siate in a tuute an a kham zawh nading itna, veina, deihsakna leh lainatna ngiat tawh cingin vil zelzel ding cihte hong gen a, tom mahmah, manpha mahmah kisa ciat hi.

Kawlpi lam ah Sia Zambawi tutung bek a a mukha pan mi honkhat i genna ah, Sia Zambawi naupang suahlai tak ei, a cihna uh leh hizah a thugen leh thusinna pia siam khat ka lim theih khak loh uh pen a kikhuanung lua hi, cih tuni hunkhat media ka sep sungin gen ngakngak geuh uh hi.

A taktak maitang phatna cih bang a kigen hi lo-in, Dr.Zambawi pen A.G sungbek zong hi lo, Kawl mi Zomi Khangno tampite in kinuamtuam, a thugen kizanuam, kilunglut mahmah ciat hi, cih a diakdiakin Kalaymyo leh khamtung lam ah kilimgen hi. Siapa’ maban thungetna tawh panpih ciat ni.

(Maan ka zaihkhak pawlkhat hong khak ing, na na setsak un). Ka lungdam. Thupuak, Peter Khampu