Pata kimu ta ~ Tdkhen

Pata kimu ta ~ Tdkhen

1967 kumin Hongkong khuapi ah Vietnam nungak khat leh Taiwan tangval khat a kingai uh hi. Hunkhat ciangin nungaknu pen vaidangkhat hangin a gamah ciah kik hi. Tua banga a ciahding ciangin a lawmpa in a zungbuh, a tunga a min ki-at leh a man (photo) a lawmnu a kem sak hi.

A lawmnu zong Vietnam gam a tun ciangin nau a paai ahih lam a kithei hi. A nau hong suak ta a, khanih a phak ciangin a tangek a sihsan hi. A sih madeuh takin, a lawmpa in a kepsak a zungbuh leh a man pen a tano’ min dingin a nusiat hi.

Tua tano pen hong lianta in, hong nungak ta a, tagahno khat ahihmanin a pa kan dingin Taiwan ah a pai hi. Tua nu pen a min Tran Thikham ahi hi.

Tua banga a pa a zon nading hun a lakna-in mi’ inn khat-ah sum a thalawh hi. Cina kem hi a, nasem a cialpa ii’ zi (a pi) hipah-in, thazaw natna a vei khat ahi hi. Kha sagih khit ciangin a cina kep pen a si ta hi. Tua a cina kep a sih ciangin nungak Tran zong mundang, Kinmen Island ah nasep dang zong dingin a kisuan khia leuleu hi.

Kinmen atun ciangin Tran in a thungpi a mangngilh lam a phawk pan hi. Tua a thungpi sungah a pa’ zungbuh leh a man a koih ahi hi. Amah’n zong a thungpi lehdelh kik dingin palikte’ kiangah a buai’na thu a hilh hi.

Tua banga a buai sung mahin nalamdang khat hong piang hi. Bang hiam!..

A nasepna-pa in tua thungpi sung na en-a, a sungah Ama’ Zungbuh leh a man (photo) a na om ngiau hi. Amah zong a zi’ sihkhit phet leh, a nasem nungakno pen, “Ka tanu himai lo ding hiam” ci-in, thakhat thu in, vanleng tawh Kinmen Island lamah a nungdelh vingveng hi.

A kimuh uh ciangin lungdam lua in, kitawi, kinamh-in a kikahkah uh hi. Tua thu ah mite in zong lamdang sa-in kibuai’pih a, pata taktak mah hiam, ci-in siavuante a sisan (DNA) uh ki-en sak pha uh-a, pata taktak na himawk uh hi.

Nungakno Tran in zong a zonzon a pa Tsai muta ahihmanin, a kisam ding tuamtuamte Zum lamah buai pah uh a, Taiwan a innpi vuah a pa tawh a ciah lenlen ta uh hi. Tdkhen