Zomi Pau tuamtuam ~ Paul Thangpi

Zomi Pau tuamtuam (Tedim, Teizang, Saizang, Sihzang, Zo, etc.) a tom in ~ Paul Thangpi

Zomi sung ah Pau (language) tuamtuam hong piankhiatna i et ciang, nam (2) in kikhen thei hi. Tua te in: (1) Luahsuk Pau (Traditional Language), (2) Piangtawm Pau (Borning Language) ahi hi.

Luahsuk Pau (Traditional Language)

Zomi sung ah Luahsuk pau icihte in: Teizang pau, Sihzang pau, Saizang pau, Zo (puzo) pau, Paihte pau, Dim, Losau, Khuano, etc. te ahi uh hi. Hih Kampaute Zomi sung ah i kep lai Luahsuk pau te hi in, hong kipat hun zong kikan ban nawn lo ahih manin, upa mahmah ta uh hi.

Piangtawm Pau (Borning Language)

Piangtawm Pau (Borning Language) icih pen a mitamna leh a zang ding tamna tawh kisai loin piangtawm pau ahih manin, mi khempeuh in zat nuamsa in, khang baih in, mainawt den hi. Tu laitak leitung khempeuh ah akizang pha mahmah Mikang Pau (English) icih pen piangtawm pau ahi hi. Zomi sung ah Piangtawm pau icih pen “Tedim Pau” icih ahi hi. Luahsuk Pau (Teizang, Sihzang, Saizang, Zo, etc.) te sang’ in naupang zaw thamtham hi.

Tedim Pau Hong Piankhiatna

Hunkhatlai in Tedim khua ah minam tuamtuam, kampau le ngeina kibanglo tuamtuam a tenkhopna pan un hong piang khia ahi hi. A ten khop uh a sawt ciangin a tu, a tate uh hong kikhol in tua a kikholhna pan un, pau khat hong piang khia a, tua hong Piangtawm Pau pen “Tedim Pau” ki ci hi.

Sangmang Cope topa te innkuan Tedim hong tun uh ciangin Ukpi Pu Hau Cin Khup kiang ah “Na zat khop theih ding uh lai bawl nuam ihih manin, bang kam zang le hang hoih sa pen na hiam?” ci-in a dot leh Pu Hau Cin Khup in “Mipite deih bel khat hi lo ing hia” ci-in na dawng hi. Tua tawh kizui in Tedim khuapi a kizang “Tedim Tualsuak Pau” tawh Cope topa in lai hong bawl sak hi.

Tedim Pau Khantohna

1919 hunlai in Sukte in Zogam leilu lam (Tedim le Tonzang gam teng) na uk in siah na kai uh a, Teizang pau tawh uk uh hi. Tuciang dong mah Teizang pau pen Ukpi te’ pau kici lai hi. Tua ahih manin a diakin Teizang pau zangte in pau dang zuih ding haksa ki sa phadiak hi. Hun hong bei toto in 1979 ma siah ei pau ciat mah kizang tangtang hi napi, kikawmna, kithuahna tam zaw semsem ahih manin Tedim pau in mai hong nawt mahmah hi. 1990 khit lam ciangin gam sung haksatna hang ahi zongin kimuh khopna leh kithuah khopna hong tam semsem na hangin mai nawt semsem in, kum 2000 khit ciangin Tedim pau in Zomi te sung ah zattaang theih Pau hong suak ta hi.

Thukhupna

Tulaitak in Zomi sung ah i zattaang theih pen in Piangtawm pau ahi “Tedim pau” ahi hi. Hih Tedim pau hong piankhiat theihna ding in Luahsuk Pau tuamtuam ahi: Teizang, Saizang, Sihzang, Zo, Dim, Losau, Khuano, Paite, etc. etc. a om man in hong piang khia thei ahi hi.

Tua ahih manin Piangtawm Pau ahi, tu laitak a Zomi sung ah i zat kim theih “Tedim Pau” hoihsa in, i zahtaak leh a piankhiatna ahi Luahsuk pau tuamtuam (Teizang, Saizang, Sihzang, Zo etc.) te zong i zahtak le i iit theih ding thupi mahmah hi. I pu i pa te in a dahna vuah dah khop nang, a nopna vuah nop khop nang, khat le khat kizop theih nang a Luahsuk Pau tuamtuam te na piang sak uh hi. Tu hun ciangin Ciamnuih bawlna peuh, ki ko na peuh in zang lo in i zahtaak bawl theih ding thupi mahmah hi. Note tawh, Paul Thangpi (Offenbach, Germany)