Malaysia, Ampang, Taman Dato Ahmad Razali vengsung aom innsung khatah nupi kum 65 aphakhinkhat asisa in kimu cih theStar pan kiza hi. Tua nupinu pen damiah kitaih in aki thatlum “Robbed & Murdered” hiding in ki ummawh hi.
Tuanu pen kum 65 aphakhin Saleha Sheikh Mohamed kici minnei khat ahihi. Monday nitaklam 6pm hunpawl in Taman Dato Razali aomna Flat sung inndawl 2 na ah asisa in aluanghawm akimukhia ahihi.
Asinu ii amonu genkhiatna ah Saleha Sheikh Mohamed pen amahguak aom hi a, apasal pen Port Dickson ah om cihi. Ahi zongin innsaap Tenant khat nei a, tuapa pen kum 20 gualpawl sangnaupang khat ahihi.
Tua sangnaupangpa leh asinu pen innkhatsung ah aom uh hi a, innsaappa aciah ciangin innteeknu pen kisilbuk maiah asisa in aluanghawm mukhia hi. Tuapan in amonu kizasak in aki theikhiapan ahihi.
Asi nupinu pen a suaibilbah leh suaikhi te kisutkhiat sakin, abilgei ahzong liamma khawng om ahih manin hihpen damiah lutin akithat hiding in ki ummawh hi.
Inndeisung vankoihna Cupboard zong ki sukham in, ahi zongin bangvan mang cihpen kithei nailo hi.
Hih buaina Incident apian ciangin Ampang Police te nitaklam 7:18pm hunpawl in hongki zasak hi ci’n Ampang Jaya OCPD Asst Comm Hamzah Alias in genkhia hi. Tuapan in Ampang Hospital paninzong Ambulance ki zasakpah hi.
Police te genna ah innpen angei mahbangin kikoih sitset in, apualam panin ngongtatin lutsim cihbangdan gentheihnading omlo cihi. Asi innteek nupinu zong apualam bangmah liamngawhna neilo cihi.
Aluanghawm pen Ampang Hospital ah Postmortem bawlding in kipuak a, “Section 302 of the Penal Code” tawh mi kithahna Murder Case ci’n thu kibawl in, ki kansan cih kiza hi.
Related: Malaysia, Kajang aom suaizuakna khatah damiah lutin Rm100,000 man puakhia
Asi nupinu pen Malaysian gammi te hileh kilawm hi. Malaysia gammi te nangawn kidawmlo in damiah kitaih in, ki thatlum ngam ahih leh gamdangmi bangmah dinmun kician aneilo “illegal status” tepawlpawl bel hongki simmawh dingmah himawk hi. Malaysia gamsung munkhempeuh ah ahunhun in damiah kitaih, inn kiluh cihte kiza zelzel ahih manin, kikep siamsawm ni. ZD Sawltak #zomidaily
Comment piaknop aomleh...