Pasian leh Zomi te ~ Joshua Suumpi
Lai Siangtho buppi bu 66 a phakna sungah (Pian. 1:1) sungah, Pasian in vantungte leh leitung a piangsak hi ci’n kigelh hi. Ei Zo Lai Siangtho sungah ‘vantungte’ cih bangin kigelh lo hi. Ahi zongin NKJV Lai Siangtho sungah ‘heavens’ ‘vantungte’ ci-in plural form tawh a kigelh hi. Pasian in vantung pen khat bek na piangsak loin, vantung thum bang a piangsak ahi hi. Vasate leenna ciangciang pen a khatna vantung hi-a; Ni, Kha leh aksite omna ciangciang pen a nihna vantung ahi hi. A thumna vantung ahih leh Pasian’ tokhom omna vantung ahi hi.
Pian. 1:3- 31 sung tengah Pasian in na khempeuh bawl hi ci lo-a, thupia ziauziau in tua dungzui in piang pah lianlian hi ci hi. Hih Lai Siangtho mun pen piansakna mun zong kici thei hi. Pasian in a piansak om a, a bawl pawlkhat zong a om hi. Pian. 2:7 sungah Pasian in mihingte hong bawl hi ci’n kigelh hi. Piansakna hi loin, bawlkhiatna sungah mihingte i kihel kha hi. Pasian in mihing piang hen na ci lo-a, ama khut tektek mah tawh hong bawl ngiatngiat himawk hi. Pian.1:26 Pasian in mihingte pen hong thupisim mahmah himawk hi. Mihing piang ta hen ci’n thupia hileh pianglo in om het lo ding hi napi’n, a hun pen mihing bawlna in hong zang a, a thalengal sukkhia himawk hi. A hun neihte pen eite hong bawlna dingin itlo hi mawk hi. Nang ee leh Pasian adingin na hunte na zang ngei mah hiam?
Leitungah mite pil semsem ta uh ahih manin, numei’ sisan leh pasal’ sisan la in gawmkhawm uh a, numei in naupai kul loin ta nei thei ziau uh hi. Pawlkhatte bang pen a pasalte khawng in naupai sak zawsop ziau thei himawk hi. Pilna khangto in hun leh ni, nuntakziate kilumlet gawp ta hi. Tua bang nulepate in tate itna a neih uh hangin, haksatna tampi tawh tano a neikhia nulepaten tate a itna uh lianzaw tham pek hi. Tua ahih manin Pasian in zong ama khut mah tawh mihing a bawlte pen it mahmah himawk hi. Pasian in a bawl tua mihingte lakah Zomite zong a kihel ihi hi.
Adam khang pan kipanin minam pen tampi takin hong ka khia ziazua hi. Hi mah leh a tam ziazua minamte lakah Zomite zong namkhat in i kihel hi. Minam tam ziazua mah leh ei Zomite bangin melhoih, lasiam, tumgingtum siamnate namdangte ka piak sawm kei hi. Pasian hong piak siamna te zangkhial kha lo ding hi hang. Kumpi nu Vashti in a melhoihna pen na hisak kha ahih manin kumpinu hihna panin mimawk mawk khat hihna ah hong kiasuk hi. Esther bangin i melhoihnate Zomiten zangsiam ciat ding hi hang. Namdangte lasiamna, tumgingtum siamna, laam siamna, laphuah siamna, kizepzia, silhleten, nekledawn, minthanna, pilna, hauhna leh gualzawhnate uanglua ta ahih manin, tua ten Pasian tawh ki gamlasak ta hi. Tua bang dingin Pasian in Zomite hong deihlo hi. A meet bawl ding leh a pungsak dingin hong deih na hi zaw hi.
Hillsongten Pasian phatphat uh a, Zomite pen Pasian phatna sungah mite pen khathu leh taksa thu ah a Healsong ding Zomite ihi hi.
Zomite pen Israel minamte i hi kei hi. Pasian in a Tapa Jesu leitungah hong paisak pen Zomite’ ading hi masa lo hi. (Matt. 15: 24 ) sungah, Jesu in kei pen Israelmite ading bekin hong kisawl hi a cihna kimu thei hi. Israel mite pen Pasian in ka tate na ci hi. Jakob panin Israel in hong kilaih tak ciangin tua min khiatna zong a kilaih pah hi. Israel khiatna pen ( teeltuam) cihna ahi hi. Pasian in a teeltuam mite kiangah a Tapa sawl na pi’n, tua Israel miten Kamsang Isaiah in (Isai. 7:14) sungah a genkholh tua Messiah pen na nial uh ahih manin, tua a kisawl Emmanuel Pasian’ Tapa in Zomite’ mawhna khempeuh singlamteh tungah kilhcip in a beisak ta ahi hi. Zomite bangzah takin hampha ihi hiam! Zomi nang leh kei sep kul loin, tua Jesu in hong sepsak hi mawk hi. Bangzah takin lungdam huai a hi hiam!
Gam tampi tak ah Zomite ki om ta hi. I pu i paten Pasian’ nasemten nidang pek pan kipanin khaici a na tuh man uh ahi hi. I phawk gige ding pen Pasian piansak leitungah tomvei sung a khualzin ka hi hi cih i ki theih ding kisam hi. Pasian loin na khempeuh a mawkna hi-a, na khempeuh pen Pasian tawh a hih nakleh a mannei vive ahi hi. Pasian loin vai na hawm khak leh na vai khempeuh hong hawm suah ding hi. ( Efesa. 5:23)sungah, pasal in zi’ lutang hi, a cih mah bangin, ei Zomite in i lutangpi dingin Pasian i koih tawntung ding kisam hi. I decree, i siamna, hauhna, ninthanna leh gualzawhnate i mai-ah makai dingin i koih kei ding a, Pasian i koih ding hi. Aman hong makai leh a nungzuih nuam a, ei leh ei i kimaih kaih khak ciangin, vaipaan thei lo hi.
Zomiten Pasian i phatna khawlsak ngei lo ding hihang. Pasian i biakpiaknate aapsak lo ding hihang. I biaknatau te puah ciat ni. Pasian tungah biakpiakna paipih inla, piakkhiatna zong lui tawntung in. Pasian pen Zomiten a mei lamah i koih ni ni i kiamsuk ni hong hi dinga, Pasian pen i lutang leh i bulpi (foundation) in i koih nini a kipan, huihpi leh guahpi ten hong nawk zongin, amuanhuai tua Jesu Suangpi tungah kilam in ama vangliatna khut in eite hong humbit a hih manin, David bangin Late. 23: 4 la in phuak in i sa hiauhiau ta ding hi.
Tua ahih manin, pilna, siamna, hauhna, minthanna leh gualzawhnate masak masa loin, hong piapa leh i neih leh i biak a nungta Pasian’ nungah a zui thupha ngah Zomite i hih tawntung nadingin, Topa’n Late. 133: 2 sung a Aaron’ khamul panin a luang sathau manphate Zomi mimal kim tungah hong luangsak ta hen! Amen.
”Pasian nambat khatna ah koih tawntung in, a nung lamah hong koih ngeilo ding hi.”
Laigelh, Tg. Zam Sian Suum ( Joshua Suumpi )
Khualui, Tauleng
Suahna, Pyidawtha khua
Pawlpi, Bethzatha Tuiphum Pawlpi
Sangkahna, Nagaland, India Dimapur
Tauleeng Manno says
Grammar ah bel (s) in bel thukhen mahmah hi.
Suumpi says
Lst sung limtak a kan tel ten vantung pen thuap thum in a kikhen mah hi a, vasate a leen theihna ciang leh meiipite omna ciang pen vantung thuapkhatna hi a, ni,kha leh aksite omna ciang pen thuapnihna hi a, vantung a thuapthumna ahih leh Pasian leh vantungmite omna kici hi. Gtn; apple & apples..
Lian Kim says
Hih ‘vantungte’ tawh kisai pen Hebrew kamin ‘im’ tawh a khawl khempeuh ‘plural’ hi pah zenzen hetlo ahihna i phawk ding thupisa ing. Gtn: Hebrew kamin ‘tui’ pen ‘im’ mah tawh khawl hi. ‘Tuite’ kici tuanlo hi. Quantity a gen hilo zaw-a ‘quality’ khawng a gen na hi thei gige hi.