Kumpi Jesu in a Kumpi inn zanglo ~ Rev. San Cung Nung

Kumpi Jesu in a Kumpi inn zanglo ~ Rev. San Cung Nung

Kumpi Jesu in a Kumpi inn zanglo (Lk2:5-7, Fil 2:5-11) :: Israelte Iziptte’ gamah saltanna pan a suahtak nading­in makaipi ding Moses pen a nu le a pate’n a sel zawh nawn loh uh ciangin luai sungah sialin Nail gun geiah koih uh hi. Kumpi Faro’ tanu in a muh ciangin a innah ciahpihin kumpi a sem thei dingin pantah hi. Makaipi suak dingpa pen gun gei ah kikoih hi. Moses pen Izipt kumpi suak lo napi’n Israelte’ makaipi na suak hi. Mite simmawh le pampaih a thuak khem­peuh mibanglo hi tuan lo hi.

Abraham le Andrew pen zawng mahmah napi’n Americante’ kumpi na suakveve uh hi. DL Moody zong zawng mahmah napi’n ama hun sungin Lungdamnathutamvei a tangkopen le kha mangthang tam a manpen na suak hi. 1766 Dec.25 ni asuak Christmas Evans zong khedap khui mizawng Samuel le Johanna Evans’ tapa hia, Tuiphum Pawlpi sungah Pasian mizat minthang na suak hi. A pa a mu lo, kum 9a phak ciang a nu in a nusiat Sia Mungtawng (Rev Dam Suan Mung, DD) zong Kawl-gam sung pawlpi lianpen khat ahi Full Gospel Assembly a phutkhia ding le leitungmun tuamtuamah Lungdamnathu a tangko dingin Pasian in zang hi.

Mihing khempeuh hau taleh zawng taleh a suah uh ciangin nausuahna inn­dei sungah a guaktangin siavuan siamate’n suak sak uh hi. Mihaute a hauh manin naipuan tungah kisuaksak tuan lo a, tagahte a zawn manin sual tungah kisuak sak tuan lo hi. Tua ahih manin tagahte simmawh ding hi tuan lo hi. Mihing i hih nung­sang a kibang vive ihi hi. Job in “Ka nu’ sung panin guaktangin ka suak hi,” (Job 1:21) ci hi.

Jesu Khris pen Pasian taktak hi napi’n leitung mite honkhia dingin van­tung pan hong kumsuk ciangin mihing hihna tawh leitungah hong suak hi (Jn.1:14). Pasian a hihna khempeuh nusia-in kiniamkhiat takin “Mi tawh kibatna ah suak hi” (F//.2:6-7) ci hi. Teel ding dang om tuan lo hi. Pasian a hihna, minthanna vangliatna ukzawhna teng tawh hong gumsuk hi leh mawhna sungah a kidiah leitung mite’n gupna ngah zo lo kha ding hi hang.

‘Jesu hong suah hun laitakin zintun nading mun om lo ahih manin bawng ankuang sungah kisial hi’ (Lk.2:7). Vantungmi in zong tuu cingte kiangah “Topa Khris ahi hong Gumpa hong suak zo hi. Naungek pen puanin kitun a, bawng annekna kuang sungah kisial hi” (Lk.2:12) na ci hi. Kumpipa suak ci napin kumpi inn sung pan suak lo a, banghangin bawng ankuang sungah kisial sese hiam? Tua hong suakpa pen Gumpa ahi thei mah ding hiam?

Ahi zongin tuucingte’n ngaihsun sese lo, zong dong kik nawn loin va delh pah vingveng uh hi. Bawng ankuang sunga naungek suak pen vantung galkap tampite’n van lapi tawh pahtawi-in phatna la sa ziahziah uh, hi. A suahna mun sangin a suakpa thupizaw hi. Gumpa hi napin a suahna munpen hawmthawhhuai lua mahmah ahih manin pawtkhatte’n urn thei lo uh hi.

Jesu hong suah hun laitakin nisuahna lam pan mipilten Judah Kumpipa suah na aksi mu uh a, naungek bia dingin Jerusalem lam manawh uh hi. Kumpipa pen kumpi inn sungah suak ding hi, cih upmawhna tawh kumpi innah va dong uh hi. Tua thu kumpi Herod in a zak ciangin Jerusalem khuami khempeuh tawh lunghi­mawh uh hi.

Siampile laitheite in “Judah Kumpipa Bethlehem khua ah suak ding hi (Mt.2:6, Mik.5:2) ci uh hi. Kumpi Herod pataulua ahih manin Bethlehem khua le a kima om kum nih nuaisiah pasalno khempeuh that sak hi (Mt.2:16). Kumpipa pen kumpi inn sungah suak lo ahih manin that kha lo uh hi. Kitelcianna om lopi’n upmawh tawh na sem leng kikhial thei hi. Tapidaw nuntakna pen upmawh tawh a kinungta hi loin upna tawh a kinungta hi zaw hi.

Bangmah a nei lo Kumpipa Jesu a suah pan a sih dong a nuntaknate enhuai het lo hi. A nuntak sungin omna kician nei loin “a lutang ngak nading mun nangawn nei lo hi” (Llc.9:58). Puanak nih a neihsun khat pen seh li suahin hawm uh a, khat pen laiai sanin hawm uh hi (Jn.19:23-24). Tuhun Pasian’ nasemte bangin suit tampi nei lo hi.

Sum nei lo lua ki­sa’n sigh piak ding a neih loh manin Piter ngasa beng sak a, ngasa’ kam sunga sum la-in Piter tawh a nih ading pia uh hi (Mt.17:24-27). John Wesley in ka sih ciangin ka ip sungah dangka 10 na muh uh leh a guk hi ding hi, na ci un ci hi. Jesu in Kumpi hihna tawh Jerusalem ah a pai ciangin mi’ neihsa lano kawmin lut hi (Lk.19:28-35). Mawhna nei lopi’n singlamteh tungah a sih ding ciangin mi’ singlamteh pua-in sihna thuak hi. A kivui ciangin zong mihaupa’ hanah kivui hi (Jn.19:38-42, Isai.53:9).

1. Mizawng te hauh nading

Jesu leitungah zawngkhalna tawh a hong pianna pen a zawngkhalte’n hauh­na a ngah nading ahi hi (2Kor.8:9). Hauhna i cih pen leitung hauhna bek hi loin Kha, lungsim le nuntaknate zong kihel hi. Mi pawlkhat pen sum hau mahmah napi’n a Kha le a lungsim lam zawngkhal thei hi. Hauhna panin kiphatsakna gahkhia ahih manin Pasian hong gupkhiatna thusim lo thei Iai uh hi. Zawngkhalna in kiniamkhiat­na lungsim nei sak a, gupkhiatna a kisap lam kimu thei zaw uh hi.

Zomite’n zawnkhalna i thuak zo mahmah a, hauhna pen i pualah mahmah hi. Tawm neipian le’ng Pasian’ thu awlmawh loin i paktat thei mahmah hi. Zawn­khalna in Pasian tawh hong kinai sak a, Jesu pen honpa le Topa dingin hong sang­thei sak hi. Hun khat lai-in Kawlgam sungah a kisimmawhpen minam ihi a, tuhun ciangin Pasian in hong lamtoin leitung lam le biakna lamah mipil le mihau tampi om­in gamdang pai a tampente ihi to hi.

Hih pen Jesu in zawnkhalna hong thuakna hanga i ngah ahih lam na phawk kha ngei hiam? Minamdangte’n Jesu a up kei leh zong ei mite’n Jesu pen i aituam neih ngiat ding hi hang. “Topa pen Pasianin a nei minam, ama luah dingin teelna a ngah minam in thupha… (Lt.33:12). Jesu pen a zawngkhal tawh a kibat hangin zawngkhal deksuai lo hi. Pilna hauhna minthanna vangliatna tawh kidim hi. Amah umin sang lecin Ama neih teng nang ading hi pah hi.

(2) Mi mawhte hong gupkhiatna:

Vantungmi in Josef kiangah “Mari in ta nei ding a, a mipawIte a mawhna sung pan gumkhia ding ahih ciangin…”04t.1.21) ci hi. Vantungmi in tuucingte kiangah “Topa Khris ahi hong gumpa in note adingin a suak zo hi,” ci-in tangko hi.

Pasian in leitungmite a gumkhia ding, a Tapa Jesu pen a sanpenna munah suak sak loin a niampen munah suaksak hi. Gupkhiatna pen mawh neite ading hi a, midikte ading hi lo hi. Ahi zongin leitung mi khempeuh a dik kuamah om lo hi (Rom. 3:9-18). Biakna lam a hanciam mahmahte ahi zongin Pasian a thei lo a paktatte ahi zongin a kilamdanna neukha beek om lo hi (Rom.3:23). Leitung mi khempeuh gup­khiatna a kisam vive ihi hi. Tua gupkhiatna pen Topa Jesu in singlamteh tungah sem khin zo hi (Jn.19:30). Mihingte sep kik kul nawn lo ahih manin Pasian in letsong­in hong pia a, tua pen upna bek tawh kingah thei hi (Efe.2:8-9). Jesu pen nang hong Gumpa dingin na san ding ahi hi. Amah loin Pa kiang kitung thei lo hi (Jn.14:6)

(3) A kiniamkhiatte pahtawi nading:

Leitungah tutna sangah a tute pen mihaute le mi minthangte hi. A kiniam­khiat mite’n laptohna a ngah ding uh hi Palm 4:10) ci hi. Mi pawlkhat in Pasian lap­tohna ngak zo loin amau le amau kilamto uh hi. Mihingte i kipah-tawina a tamluat leh Pasian i pahtawi nading mun om thei nawn lo hi. “A hun a cin ciangin Pasian in note hong pahtawi nadingin Ama vanglian khut nuai ah na kiniam sak un (1Pit.5:6). Kiniamkhiatna pen Pasian’ zia hi. Kumpi Jesu tawh i kimuh nadingin tunglamah kah­to loin a niampenna munah tuahsuk kul hi. Mi pawlkhat banghang Pasian tawh ki­mu thei lo hiam cih leh amau sanglen lua uh hi.

Tuhun ciangin Jesu’ min pahtawina sangin degree pahtawinate hong tamzaw ta hi. Kingaihsut huai hi. Jesu in Pasian a hihna teng nusia-in bangmah loin kibawl a, sila lim la-in sing-lam-teh tungah sihna hong thuak dong kiniamsak hi. Tua ahih manin Pasian in Amah pahtawi-in min kherripeuh sangin min lianzaw pia hi (R.2-11). Pasian in a kiphasakte khamin lung­niarnsakte hehpihna thupha pia hi (1Pit.5:5, Pau.3:34). Mi hong pahtawi ding na ut leh kiniamkhiatna sin masa phot in, tua hi leh Pasian in hong lamto ding hi.

A tawpna ah, Jesu in a Kumpi inn nusia-in leitungah hong kumsukna in a zawngkhal leitung mite hong gupkhiat nop man ahi hi. Jesu pen a hauh nop manin a zawngkhal hi loin a zawngkhal le daipam a omte a hotkhiat nop manin zawng­khalna hong thuak hi zaw hi. `Mizawngte kiangah Lungdamna zasak dingin kong pai hi’ (Lk4:18) ci hi. Tua ahih manin ei zong kiniamkhiatna le lungsim takpi tawh Amah Gumpa le Topa dingin i san ding kisam hi.

Lungdambawl pen ngeina danin ngaih­sun loin nuntakna kikhel nadingin zang ni. Gup ngah kitel nai lote adingin gupna i sanna hun hi henla, gup ngah sate adingin kiniamkhiatna tawh nuntakna manpha le Pasian hehpihna thupha i sanna hi ta hen. A sisate suah ni pawi kibawl ngei lo hi. Jesu pen sihna zoin a thokik, a nungta tawntung Pasian hi a, kumpite’ Kumpi, topa­te’ Topa, a kikhel ngei lo a vanglian Pasian ahi hi. Rev. San Cung Nung