Leitungbup Numeite Ni ~ Julia Man Ngaih Hau

Leitungbup Numeite Ni ~ Julia Man Ngaih Hau

March kha ni 8 ni pen Leitungbup Numeite Ni (International Women’s Day) in kiciamteh hi. L N Ni pen UN hi taleh gamtuamtuam pan kumpitehi taleh, NGOs le biakna kipawlna atuamtuamte inzongNumeite zahtaak piaknathusimna-in bawl tangtang uh hi.

Numeite Ni pen social lam, economiclam, gamvai politic lam thulu tuamtuam panin pahtawina bawlciat uhi.Vai kim subject kim-ah Numeite’ thupitna, panlaknate kithukimpihna hang ahi hi.

Tu-kum pen Leitungbup Numeite’ Ni – kum 100 cinna hita hi. Numeite’ Ni hong piankhiatna thute internet sungah limtak kigelh ahimanin kitheikhintek dingin hong lamen ing. Ahizongin Numeite ’Ni – kum 100 cinna ah Zomi numei khat in thukimpihna laikungpan hong atkhia nuam ka himanin tawm kong kuppih nuam hi.

Numeite’ Ni piankhiatna pen 1908 kum-in US gam New York-ah numei 15,000 in numeite netniamna, pasalte tawh kibangkimlohna pan nasep thaman khan nading, nasep hun akibanga aciangtan nading, votepiaktheih nading cihte bulphuh- in lungphona hong nei uha, tuadungzui-in 1911 kum-in Denmark gam Copenhagen-ah International Women’s Day (IWD) ciaptehna hong kipankhia in tuazom-in, Austria, Denmark, Germany, Switzerland cih bangin hong kizeltoto hi.

1975 kum ciangin UN in International Women Year ci-in khawmpi sam a, March kha ni 8 ni pen Leitungbup Numeite’ Ni in hong ciamteh uhi. Leitung gamtampi-ah zumkhak ni in kiciamteh hi. Nute’ Ni (Mothers’ Day) tawh a kikimin a ngaihsun zong tampi om hi.

Numeite le Pasalte Pasian in a kibang dingin hong bawl hi. Laisiangtho sungah Pasian in mihing bawla, a kikholhpih dingin mihing nakguhpan numei bawl ci hi. Biakna hitaleh leitung thu-ah Numei le Pasal a kibangin liangko kikim hi cih i theihsiam ding hunta hi.

Leitung gamtuamtuam kumpite hitaleh kipawlna organization¬te ah numeite’ makaihna pen kisangsiam mahmahta hi. A mi-in gen ni ci lehang, tam lua ding ahimanin, atom-in ciapteh dingin gam lianpipi a uk zo numeitampi om hi cih thu hi.

Kawlgam le Numeite: Kawlgam-ah hong uk kumpite in gamvai-ah numeimakaih ding panmun piakna nei nuam nai lo uhi. Ahizongin, Daw AungSan Suu Kyi banga leitung gam makai khempeuh i zahtak,Kawlgam numeikhat a om manin ei numeite adingin angtan’ huai mahmah hi.

Zogam Zomi le Numeite: Tu-hun ciangin, Zomi numeite pen lokhosingpuading ciang bek hi nawn loin, siavuan, engineer, galkap mang,mipil, misiam, mihau, biakna makai, pilna sangpipi nei numei tampi ki-om ta ahimanin numeisan no khat cih khangluai ngaihsutna a hoihlo-te nusia ta ni.

Gam le minam adingin numeite in zong vaipuak nei thei/nei zo cihte phawkin Zomipihte in Zomi numeite nong theihsiam ding uh hunta hi ci-in Zomi numei khat in kum 100 cin LeitungbupNumeite’ Ni¬in kong hanthawn nuam hi.

Zomi numeite mahmah in zong innsung nasemte bek hi lo-a, gam vai,khua le tui vai-ah Zomi pasalte tawh ma a pangkhawm zo dingin Pasain in hong sehsa hi ci-in i theihsiam tek nadingin kong hanthawn hi.

Zominumeite sung panin Zosuan tate piang a … Zomi numeite sung panin Zogam vaipuak a nei thei Zolia-te i om hi. Zogam Zomi sungah numei le pasal deidanna om loin ma pangkhawm tek ni… ci-in kong hanthawnhi. Topa’n a telsiam dingin thupha hong pia ta hen. Amen! Julia Man Ngaih Hau