Pasian in mihingte mailam hunding khempeuh gelkhol ahiam? ~ Job Cinpi

Pasian in mihingte mailam hunding khempeuh gelkhol ahiam? ~ Job Cinpi

Hih dotna pen mikim ading a theih huai le tel ding a thupi mahmah khat ahi hi. Bang hang hiam cih leh mi pawlkhatte in thu a gen uh ciangin Pasian in mihingte mailam nutakzia ding a vakin gelkhol khin zo hi; tua ahih manin Pasian’ gelna bang bekin mihingte kinungta hi, ci uh hi. Pasian in mihingte’ nuntakna ama gelna a omsa sung bekah hong koih takpi mah a hiam?

Pasian pen ukna a deih lua, mihingte’ nuntakna hong uk cip nuam, ama deih bangbangin hong hei nuam ziauziau Pasian ahi kei hi. Pasian in mi khat, a nu sung pan bangci pian khiat dinga, bangci sih ding cih dongin gelsa ciangtan sa bekbek nei hi leh kua teng hel tung dinga, kua teng Van gam tung ding cih zong ama gelsa sungah kihel dingin ka um h. Ahi zongin ven gam hel gam tun ding pen nang le kei’ khensatna, telsiamna tawh kisai ahih leh Pasian in nang le kei tungah ama gelna sa ahi lo, nang le kei’ telna tungah thu a kikhen ding thu pawlkhat mihingte tungah hong koih hi ding hi, cih kilang hi.

Ama vangliatna, Ama hihtheihna in a cin lo ahi kei hi; mihingte mailam hun ding ama deih bang lianlian bekin a nuntaksak nuam zah dongin Pasian in a thuneihna hong lak lo hi, cih hi zaw hi. Hih nu hih pa zing ciang tua ci ding, tua bangin piang ding ci-in Pasian in thuneihna tawh mihingte hong ukcip hi leh mihingte lam pan bangmah sep le bawl ding le gel ding kisam lo ding hi. An zong nek kul lo dinga, Pasian’ hong gelsakna bang bekin piang ding hi. Na sih ding ni Pasian in ciangtan khin ahih leh annek tuidawn ding na zonzon ding kisam nawn lo ding hi. Bang hang hiam cih leh Pasian’ in na sih ding a ciangtan ni a tun ma-in bang mah na ne na dawn kei zongin na si kei ding hi.

Hih thu ka gen ciangin Pasian in mihingte’ mailam ding bang mah gel lo hi, Pasian tawh kisai lo hi, a ci nuam ka hi peuhmah kei hi. Pasian in, ama zat mite le kisam a sak mi pawlkhatte’ mailam hun ding gelsak khol mah ding hi. Tua bang mite pen Pasian’ mi zat taktakte bek ahi uh hi.

Mi khat, tua ci sih ding, tua lai mun ah si ding, tua hangin si ding cih dongin Pasian gel dingin ka um kei hi. Tua pen ka gensa mah bangin, Pasian’ hihtheihna, ama pilna in a cin lo ahi kei hi. Mihing nuntakna a ciangtan dingin Pasian in leitung thu neisak hi, ci-in ka um hi. Tua bang hi kei leh Pasian in, Amah a um a bia lo ding peuhmah a nu sung pan piangsak lo ding hi, ci-in ka um hi.

Pasian in mi khat ama nuntakzia ding gelkhin sitset ahih leh hel a tungte mailam ding zong Pasian’ gelsa mah hi ding hiam, ci-in dotna khat hong om nuam ding hi. Tua pen ama telsiamna tungah kinga hi, cih ahih leh Pasian in mihingte mailam ding hong gelsak loh, mihingte’ gel ding le telsiam ding thu pawlkhat hong koihsak hi, cih kitel pah hi.

Mawhna khialhna khat na bawl ding pen Pasian’ gelna a om khin kici thei lo hi. A mawhna kisik kik man lo a mi khat a si dingin JESU sisan panmaih ka sa lua hi. Pasian ama mizatte le kisam a sakte’ mailam hun ding ama deih bangin gelsak thei kha mah ding hi. Note hoih nading kong gelsakte na thei kei uh hi, ci bek hi. Hoihna hong gelsak ahih leh hoih lohna pen ama gel hi lo cihna zong ahi pan hi.

Thu khat kong telsak nuam phapha hi. Pasian a pilna a vangliatna in a hih thei lo ahi kei hi. Pasian in, mi khat a pian khiat a kipan, hih nu hih pa hel tung ding, vangam tung ding ci-in ciangtan sa peuhmahin nei hi leh bang mah na hanciam kul nawn peuhmah lo ding hi. Na khempeuh Pasiangelsa hi leh piangthak lo a site zong Pasian gelsa cih ding hi a, Pasian in a pianthak loh ding mah uh deih hi, cih ding ahi hi.

Tuni an na nek ding le na nek loh ding nang ma khensatna hi a, bang ne ding cih zong nangma telna tawh kisai ding ahi hi. Na tup na sawmnate tungah Pasian na muanna le na upna tungtawnin Pasian in nang ading bang hong sepsak ding cih hong gelsak toto ding hi zaw hi. Pasian in amah a thei man loin mi khat a si dingin mihingte’ mailam hun ding mawk gelsak pauhmah lo ding hi. Pasian in teeltuam mi pawlkhat nei hi, cih pen mikim in kithei hi.

Pasian pen ama hihna tungah muan mahmah ding hi-a, ahi zongin upmawh muan ding hi lo hi. Pasian pen upmawh thu tawh a gamta ahi kei hi. Mihingte om nading hih leitung a bawl lai-in laitung piang hen ci ziau peuhmah lo hi. Mihingte ading a kisam, mihingte’ nuntak theih nading, tui, huih, khuavak, leitang, singkung lopa cih bangin khat khit khat na bawl hi.

Tua bangin limtakin a gelsa a bawlsa leitungah mihingte hong koih khiat ciangin, na annek hun ding, na ihmut hun ding, na zing tawh hun ding, na kisil hun ding ci-in na hun hong ciangtansak nawn lo hi. Pasian limtaka a piansak leitung le a bawlsa mihingte bangci bangin kizom hiam cih pen hih leitungah na ten sungin na kantel ding kisam hi. Bang hun ciangin anne leng hoih a, bang hun ciangin ihmu leng hoih hiam, bang an ne leng pumpi ading hoih a, bang tui dawn leng cidam nading hoih a pumpi tawh kituak hiam cih pen na kan ding ahi hi. Tua pen Pasian bawlsa leitung le a bawlsa pumpi na leptuahna ahi hi.

Kammal dang tawh gen ding hi leng Pasian thupitna, Pasian lamdanna na muh nading, na theihtel semsem nading ahi hi. Mihing pumpi cidam nding singgah theipuam a tuamtuam mun khempeuh ah om kawikawi hi. Tua na nek leh na pumpi tua mun ading hoih hi, tua na nek leh na khuak ading hoih hi, ci-in sittelte in na gengen uh hi.

Tua pen Pasian in mihingte kan ding sittel dinga leitung a bawl lai, singkung lopa a piansak a kipan mihingte ading ahi hi. Eden huan sungah Adam le Eve in nek ding singgah tampite lakah mawhna singgah na ne uh hi. Duh bang peuh neknek manin zun khum, sikhang, lungtang sigui neu cihte pen Pasian gelsa hi peuhmah lo hi. Pasian in na pumpi hoih nadingin nek theih tampi hih leitungah koih hi. Tuate na zon ding ahi hi. Na mai a om peuhpeuh, hong kipia peuhpeuh, na duh peuhpeuh na nek pen Pasian gelna hi lo hi. Hih nu hih pa zatep ding a tuap keu ding, tuap keu natna tawh si ding ci-in Pasian in gelkhol dingin na um hiam?

Khansau nading nu le pa zahtak ding ci ahih manin mihingte khansau thei khantom thei cihna ahi hi. Tua pen na khensau ding le na khantom ding Pasian in hong gelsak khin, hong ciangtansak khin ahih lohna ama kammal sung mahmah pan hong gen ahi hi. Job Cinpi