Malaysia, Segambut vengsung ah Operasi lutin gamdangmi 80 kimankhia

Malaysia, Segambut vengsung ah Operasi lutin gamdangmi 80 kimankhia

Malaysia, Kuala Lumpur, Segambut Dalam sungah tuni Friday zingsanglam in Immigration Department te’n Operasi bawl uh a, gamdangmi phalna neilo in nasem akigawm in mi 80 val mankhia uh cih NST pan kiza hi.

Zingsanglam 3am hunpawl in Segambut Dalam, Bukit Prima Pelangi vengsung ah gamdangmi nasemte omna sungteng Ambush in alut uh ahihi. Akiman gamdangmi nasem “illegal foregin workers” tepen Indonesia gammi leh Bangladesh gammi vive kici a, tutungbel Myanmar gammi te kihel khalosam hi.

Akiman gamdangmi te lakah naungek kha 6 aphapanzong kihel cimawk hi. Hih Immigration Department te Ambush buluhna munpen gamdangmi te Operasi akizak ciangin tampitak abukcipna munkhat kici a, akiman tepen naungek kha 6 panin kum 50 kikal ahi uhhi.

Immigration Department te amanding in lut cih atheihphet in pawlkhat gampalak ah taigawp in kibuksawm uhhi. Pawlkhatte mawtaw Tyre kawmlak, Concrete Mixer bawlna Truck kawmlak khawngah akibuding in lutgawp uhhi.

Pawlkhat akimatding laulua mahmah in anuntakna zong khualngam nawnlo in, kendanglak nangawn ah taikekgawp uhhi. Ahi zongin Immigration Department te’n akiim apam avekin a umcihsa himawk ahih manin, kuamah asuakta omtuanlo cisawnsawn hi.

Kuala Lumpur City Immigration Department Enforcement Department chief Mohamed Yusoff Khan Mohd Hassan kicipa in agenkhiatna ah hihmun pen abeisa sawtpipek in aki encik gige ahihi ci’n genkhia hi.

Abeisa inzong tamveipimah Operasi kibawl in, hihmunpan gamdangmi illegal workers honpikhat kiluakkhin himahleh, hongki behlap kikkikzel uhhi. Gamdangmi phalna neilo nasem te abeisiang mateng in Operasion kibawl zelzelding hi ci’n Press Conference ah genkhia hi.

Operasi pen zingsang 3am in akipat uh hi a, zingsang 6am hundong in Immigration Department Officers te, General Operations Force (GOF), Civil Defence Force, National Registration Department cihpanin Officers te tuasungteng ah misit in buailai uh cihi.

Hih Operasi akibawlna ahangpen E-card kici Enforcement Card abawltheih hunding Deadline beita ahih manin, Malaysia gambup ah gamdangmi phalna kician neilopi in nasemte asiansuahsawm in abawl uh ahihi. “Ops Mega” ciliangin Malaysia gambup muntuamtuam ah “Nationwide Operation” nakbawl mahmahlai uhhi.

More: Malaysia gamsung ah Operasi panin akiman mi 3506 phakhin

Operasi thuthang ihgelh ciangin ih mipih te lauthawnggawp uhhen, pataugawp uhhen cih ngimna hoihlo “ill-intentioned” kihello hi. Koimun koiveng ah Operasi lut ahih manin, tuazah kiman, eizong kidop huai cih theihsaknopna ahihi. Thupiangsa bek kigelhzaw in, apiang nailopipi, upmawhthu tawh koimun koiveng ah Operasi lutding cihte kigelhlo hi. Prophet kihilo a, koimun ah Operasi lutding cih 100% akician in kitheilo ahih manin, aki gelhngamlo ahihi. Atelsiam dingin Topa’n thupha hongpia tahen! Sawltak #zomidaily