Pasian in ama limlemel sun in hongbawl

Pasian in ama limlemel sun in hongbawl hi ci in laisiangtho in ngen hi.

Mihing khat nangawn in Pasian mungeilo ahihleh mihingte in Pasian limlemel i sut lam kua in ngenthei ding ahi hiam?

I ngaihsut tohtoh ciangin Pasian limlemel sun a cihpen mittawh i muhtheih nate hilothei hi. Laisiangthoin ‘Pasian in Kha a hihi’ ci hi. John 4:24. Pasian pen Kha ahihmanin akimuthei ih pumpi pianzia te tawh kisun theitaktak lo dinghi ci in uphuai hi.

Zusa vasa te zongh in limlemel nei uh hi. Nganhing tuamtuam te inzongh khut le khe, limlemel mah nei uh hi.

Khut nih, khe nih, lutang khat a nei nganhing tam mahmah aa ahizongin Pasian limlemel sun hi ki ci theilo hi.

A limlemel en leng zawng leh mihing kisun mahmah hi. Ahizongin Pasian limlemel pen zawngtawh kibangpian hi cileng haivai lua ding hi.

Tua ahihmanin mihingte in zongh Pasian limlemel i sutna pen i muhtheih pumtung nate pianzia (physical appearance) hilo in akimutheilo Kha pianzia (spiritual form) i neihman hizaw dinghi cihnophuai hi.

Pasian pianzia pen ei mihingte ii theihsiat zawhding hilo hi. Ahizongin i theihsunsun tawm kikum ding hihang. Pasian pen sitheilo, kisia theilo hi. Pasian in sepzawh loh, septheihloh neilo hi.

Pasian pen munkempeuhah om hi. Pasian pen nungta tawntung, pilna, vangliatna leh septheihna tawh kidim tawntung hi. Kikhel ngeilo in khialcih zongh om ngeilo hi.

Hih te pen Pasian pianzia hiaa tua a mapianzia (limlemel) pen Pasian in mihingte sungah pawlkhat hong koihsak hi.

Tua vangliatna pen Pasian in mihingte cihloh a dang a ma piansak nate tungah pia vet lo hi.

Tua hiaa Pasian in mihingte tungah haksatna khempeuh a kantan zoding, nakhempeuh ukzo in a bawltheiding, sunmang/vision khempeuh a taktunsak zo dingin a hat, a vanglian a mapianzia hongpia khin hi.

Tua vangliatna hangin mihingte in a hangsan mahmah humpi nelkai te thongsungah ki khum thei hi. A hatmahmah saipi te singluang kai in i sawllel aa a hatmahmah sakol te tungah i tuang hi.

Hihpen Kha i neihman hiaa tua Kha tha tawh nakhempeuh a zo ding te i hihi.

Baihlamtak aa Nalianpi Sepna – Laibu sungpan/ Siamsin Library