Tulai Pawlpi pawlkhat te buaina – III

Tulai Pawlpi pawlkhat te buaina – III

Tulai pawlpi pawlkhatte buaina thu I gelh pen mimal pawlkhat, Pawlpi pawlkhat I kawknop man hi masalo hi. Nomau mimal, Pawlpi gamtatna, kalsuan dan tawh aki bat khakphial leh na ki puahpha, na kikhelpah leucine I minam cidamna, khantohna hong hizawkha ding hi. Ahi zongin no hong kici nuam hilo in I minam sungah hici bang Pawlpi buainate bangci leh vengtheiding cih I lunggulhnapi khat hizaw hi. Bang hang hiam cih leh Pawlpi buai manin, I ki khen manin I minam ki pawlnate hong lawh in a hatding zah, na I sep zawhding zah in tuni tan ki semtheilo, kisem zolo hi, cih a tuakkha te’n theiciat ding uh hi. Tua hih manin tulai Pawlpi pawlkhatte buaina a hang I gen masak loh hong phamawh hi. Nunga ban zomni:-

1. Mipite hang zong hithei hi: Zomibup Pasian phatkhopna Halleluiah Chorus lapi sak-in Tedim ah Rev. Dr. Gin Khan Khual thugen khat hong phawksak hi. Bangci hiam cih leh makaite kitel khialhna, kisiatna pawlkhat pen no mipite hang zong hithei hi. Bang hang hiam cih leh mipi pawlkhat te’n makai pawlkhat guptuam paihtuam neithei mawk in khat tungah khat gensia in zuathu genin makaite khat le khat sutuah thei hi. Makaite khat le khat hong ki siatteh mipi hong lawh loh phamawh a, a tawpna ah Pawlpi sung buaina hong tung thei hi. Tua ahih manin makaite khat le khat kisiat na ding leh ki telkhialhnading mipi lam pan zong I ki dopding hong phawksak hi. Zomi sungah mipite kisiatna, ki telkhialhna hangin Pawlpi sung buaina sangin makai khat le nihte ki telkhialhna hangin Pawlpi abuai, akitam tamzaw ding hi.

I gen loh ding thu midangte tungah I gen mang zong hithei hi: A beisa I genna ah Meeting I neih ciangin a thu minsa, I lawmte Amen, piasakding ciang bek hilo in thukhat I ki kupteh I ngaihsutna I gentek loh phamawh in kikum ngeingai, I gen ngeingaitek hi. Tua I gen ngeingaite pen a ki khensat hita kei leh mi pawlkhat te’n midang mai etna in na zangin khat le khat ki mai nopmawh sak thei uh hi. Meeting thu ki kupte pen mi dangte gen loh zi le ta innkuanpihte tungah zong gending hilh ding hilo in, mipi theihdinga ki lawmte, Secretary or a kiseh penin hong genkhiat ngakding ahi hi. Tua nangawn ngakzolo, ngaknuamlo in aki tulmawh aomteh I ki pawlna sungah buaina tuamtuam hong tung thei hi. Thuhoihte I ki gending I ki hilhding hi-a, tualote I paihkhiat ding ahi hi.

3. Pawlpi tuamtuam pan I hih man zong hithei hi: Pawlpi tuamtuam I hih manin I biakpiak nopzia, I updan I sandan hong ki bat lohteh ei a bek, aman adik kisa thei hi. Sawltak Paul in Kha Siangtho hong piak letsong tuamtuamte a gen leh mikim tungah hong piak ki banglo hi, acih phawkhuai, simhuai, zuihhuai hi(I Cor 12:8-11;28-30). Hite I theihcian, I theihsiam kei leh khat le khat kitel khialhna hong piangsak thei hi. Mi pawlkhatte ki khami sakdiak in amau tawh aki bangle peuhmah, amau thu amanglo peuhmah a piangthaklo, thu omlo in koih thei uh hi. Lai Siangtho limtak a simloh man leh sawltak Paul I thugen a telloh man a pianthak loh man zong hithei hi.

4. Nupa kal I cihtak loh man zong hithei hi: Kumpi David midang zi tawh a mawh manin a Innsung a gamsung buai-a, Kumpi Solomon zong Pasian cih bangin zi tungtangah a cihtak loh manin agam ki phelkhap hi. Tuhunteh Pawlpi buai, kitam, kikhen, gamsungbuai na hangte zong makaite a zite tungah a cihtak loh manzong hithei hi.

Ei leh ei I din mun I ki theih loh manzong hithei hi: I khua I tui ah I omlai, I sang kahlai makai zong semngeilo, Pawlpi ah zong ki hel ngeilo, gam 2 na tung semkha tuanlo, zong kihel tuanlo, gam 3 na tungta utta keileng, a mi omlo ahih manin I sep hong phamawhta hi. Hici bang hunteh mi pawlkhat pilvangin innlam leh mun tuamtuam a, a semngeite dongin laibu tuamtuamte simin tua tawh ki todelhthei uh hi. Pawlkhatte leuleu ciangin laizong limtak sim nuamlo, zong kanlo in, zi le tate thupeuh, cikmah a, makai a semngeilo khat I thu peuhtawh a makaihteh tua ki pawlna pen hong buai in kikhenna hong piangthei hi. Tua ahih manin ei le ei I din mun I ki theih I kimuh ding thupi mahmah hi.

6. Christian te nuntak kalsuan ziading I theih loh man zong hithei hi: Pastor pawlkhat, UPa pawlkhat, Gospel pai pawlkhat te’n gupkhiatna thu leh Christian te nuntak kalsuan ziading sangin piakkhiatna thupha bekbek genin neithei uh hi. Tua ahih manin mi pawlkhat a piakhiat nak leh sawm ah khat amaan nak leh a piangthak kisa, vantung gam tungding kisa khapah in a dangdangte phawkkha nawnlo in a tawpna ah Pawlpisung buaina, kisiatna omthei hi. Tua ahih manin Pasian thugen akuamahpeuh in zong hangsan tak-in Christian te nuntak kalsuan ziading Rev.Dr. Khen Thang bangin genngam ding kisam hi. Martin Luther bangin mimai en a, Pasian thu gending hi masalo in Pasian mai leh Lai Siangtho en a, gending hizaw hi.

Khaibawi