Paradigm Shift ~ Peter Suumpi

Paradigm Shift ~ Peter Suumpi

Mikang lai in “Paradigm” ih cih pen “Daan, Hihdaan,” cih khiatna nei hi. “Shift” ihcih pen “khelna” acih nopna ahi hi. Mihing te nuntak khuasakna sung ahi vanlei vanzuakna mun te aakipan khat le khat kiho kizopna te dong ah hih ‘Paradigm’ tawh aki nunta aki khuasa ahi hi. Thu khat peuh khinkhaina hitaleh, thu khat peuh vaihawmna hitaleh hih ‘Paradigm’ mah siksan in ki vaihawm in ki khinkhai hi. Thupai khat peuh ngaihsut zia hitaleh thu khat peuh khentatna te ah hih ‘Paradigm’ tungtawn in ki ngaihsun in ki khensat hi.

Mi khat ciat in hih ‘Paradigm’ ih nei tek hi. Mi khat in ama ii mit, bil, nak, lei le apumpi tawh akisu thu le la khat peuh pen ama sung aa om ‘Paradigm’ tungtawn in akhiatna khia uh hi.

Thusinna khat ah thuhilh siapa in thusin te thu khat hong dong hi.

“Inn dawl 20 asang Company zum khat ii a tungnung penpen dawl ah mi khat in nasem hi. Tua zum innpi sung ah datkahlei (Lift) zong kizang hi. Datkahlei mekna pen gual khat ah nga ta om in agual in gual li pha hi.

Tua mipa pen zingsang lam dawl 10 na ciang bek datkahlei tawh kah in a kisam lai dawl 10 pen akhe tawh kahlei zui in pai hi. Nitak zumtuak ciang in adawl tungnung pen pan a nuai pen dong datkahlei tawh tuaksuk sese hi. Hih mipa pen abang ci mi hiding hiam? Gtn; Cidam nading akikhual hi ding maw? Meisum bei ding akhual man hi ding maw? Cih akp…”

“Cidam nading ahanciam mi khat hi ding hi. Tua hang aa pumpi gamtat (exercise) na a om nading ngimna tawh a khe aa zang hi ding hi.”

“A hi tiltel mi hiding hi”

“Adawl khempeuh asit Company manager hizaw inteh.”

“A meidawi pi hi in cia”

“Mi tampi tawh datkahlei atuang khawp noploh man hi zaw ding hi ”

Thusin te dawnna ahi hi. Tua pan in siapa in; “Nong dawnna khempeuh uh no aading man kha thei ding hi. Ahizong in mi khempeuh aading a man taktak dawnna in tua mipa pen a tun tom ahihman hi.

Amah atun tom in datkahlei mekna a tungnung dong ban zolo in ama batna ciang bek akahto ahi hi. Atuaksuk lam ciangin datkahlei mekna anuai penpen dong mekzo ahihman ahi hi.”

Datkahlei kah mi khat ih muhdaan akibat lohna pen khat le khat ih sung aa om Paradigm akibat loh man ahi hi. Quantum theory le Heisenberg theory te in “na khat peuhpeuh ii hihna pen tua na a en te tungtawn in muhna kibang lo hi.”

Cidamna lam paradigm nei te in cidamna lam pan ngaihsun hi. Sumbawl te in vanlei vanzuakna lam tawh en hi. Mi tam tawh akithuah theilo te in mi tawh akikhawl theilo dan in ngaihsun uh hi.

Ei tung aa om paradigm pen man taleh, khial taleh ei ii muhna, ei ii ngaihsutna, ih lungsim puakzia, ih gamtat luhek zia khempeuh te ii bulpi ahi hi. Midang te tawh ih ki kholh theihna, ki kholh theihlohna te ii tawhtang zong ahi hi.

Paradigm ih cih pen mitlimlang tawh kibang hi. Mihing te nuntakna sung ah ih tuakkhak thu khempeuh pen tua mitlimlang tawh ki en hi. Apua lam leitung hitaleh, ih sung aa ih lungsim tawng hitaleh tua mitlimlang tawh ih en hi. Tua ahihman in Paradigm ih cih pen ihkiim ihpam (ahl) ih nuntakna ii ih muhna, ih muhdaan ih ci thei ding hi.

Mi khat in pammaih sakna paradigm a neih leh na khempeuh te pammaih sa in phincil ding hi. Tua mah bangin midang te zong amah bang in aphincil ding in ngaihsun kha thei ding hi. Hazatna paradigm nei te in amuh khempeuh haza in thapai ding hi. Thusia lam ngaihsutna paradigm nei te ahileh amuh khempeuh ah alungkimna omlo ding aa mawksakna, kona, gensiatna vive tawh ahun beisak ding hi.

Hai sung aa tui om en in khat in alang om lai hi ci hi. Khat in alang tak bei khin hi ci hi. Hai khat pen minih en khawm napi amuhdaan uh kibang lo hi. Athu om kibang napi akhiatna khiat dan kibang lo hi. Bang hang hiam cih leh tua mi te ii paradigm aki batloh man ahi hi.

Amasa mi ii paradigm ah” om hi, om lai hi, hoih hi” cih ahoih lam aa amu thei mi ahi hi. Anihna mi pen ahileh “Kiamna, kisapna, om lohna” ci in asia lam in amuthei mi ahi hi.

Amasa mi in na khempeuh ahoih lam apha lam in mu hi. Anihna mi in na khempeuh asia lam ahoihlo lam in mu hi.

Ahoih lam apha lam aa muh theihna na neih leh phadawm mahmah cih ding ahi hi. Asia lam, ahoih lo lam in amu thei mi na hihleh, na tuak thu khempeuh a hoih lam in na mu thei kei ding hi. Tua bang hileh na nuntakna sung ah lungnopna hong tam hetlo ding aa midang te aading in zong phat tuamna tampi na bawl zo kei ding hi.

Nidang lai in samkhang khamul khang putek khat inntual singlim nuai ah lum hit-hiat hi.

Sanginn pan hong ciah atute in apu uh no nuam ahihman un anbuk sung aa ngapik tawm la in apu khamul nuhsak sim uh hi. Aden ciang in a-ihmu apu uh hong khanglo in hong thoto hi. Alu asin kawmkawm in…

“Haa ngapik nam ve e leh” Tua pan inn sung hong lut in

“Haa inn sung zong ngapik nam hilo maw” Tua pan innpua pusuak in paakhuan sung ah ava kileh kawikawi hang in ngapik nam veve lai hi.

“Abang ci hiliang aihia, inn sung teng, innpua teng, paakhuan sung teng, veng sung, ih khuasung teng na ngawn ngapik nam khin hilo maw? Ci in amah guak hong phun hi.

Ih sin ding thu in ” khamul tung aa ngapik kinuh mi khat aading in a omna mun khempeuh ngapik nam khin ding hi.”

Akhamul tung aa kinuh ngapik te asiang in sawp khit ciang bek ngapik nam kam pan ding ahih teisam hang in ih lungsim sung aa ih thu ngaihsut ngapik nam pen aka-ap ding tua dan ziau in baihlo ding hi.

Tua ahihman in ih neih paradigm in lungnopna hong piak kei leh ih khel hong kul ding hi. Midang te tawh ih kizop dan alem kei leh ih khel kul ding hi. Ih paradigm ih khelna hang in leitung pen muhna thak tawh ih mu thei pan ding hi.

Thukhun in “Paradigm khelna pen nuntakna khantoh nading ahi hi.”

Pa Hang in “Kei ii paradigm ka khelna lel tawh ka nuntakna khangto pah ding maw le.”

“Nang ii thu ngaihsut zia, thu san daan hong nawngkai sak ahi paradigm na khel leh, na kiimlepam leitung na muh daan zong hong kikhel ding hipah hi. Na thu khinkhai daan le na thu ngaihsut daan kikhel ahihman in nang lungsim puak daan zong hong kikhel ding hipah hi.”

“Hi bang in na lungsim puak daan hong kikhel ahihman in na kampau daan le na gamtat daan zong hong kikhel ding hi. Na nuntak khuasak daan ki lungngai kik lecin Pa Hang aw telpah niteh.”

Mi khat peuh in akiimlepam aa midang te tawh akizopna ahoihzaw ding alunggulh leh ama ii lungsim puakzia akhelna ciang tawh kicing zo lo thei mai ding hi. Ahizong in ama ii lungsim puakzia akhelna in a paradigm khelsak zo pan ding hi.

Tuilu pan tuinin luang ahihman in tuilu sawp siangna lel tawh tuisiang hong luang lo ding hi. Tuikhawlna tuibempi ih khuah ciang bek in tuisiang pan ding hi.

Mihing te ii paradigm pen a vanglian mahmah ahi hi. Bang hang hiam cih leh tua in mihing te khuamuhna mitlimlang ahihman ahi hi. Mihing te in tua mitlimlang tawh leitung le na khempeuh te ih etman ahi hi. Peter Suumpi

Reference:

• (1) Stephen R.Cvey, The Seven Habits of Highly Effective Teen.
• (2) မာကု (ဒႆန) ,လုွပ္ခတ္ေနေသာ ႐ွင္သန္ခြင့္ေလးမ်ား။