Pangpalek nih ~ Dong Mung

Pangpalek nih ~ Dong Mung

Khatvei paakpalh gim namtui a diik khawm Pangpalek nih pen tungnung kituh in hong buai mahmah uh hi. A nuai-a om pen a tungah om ding hanciam a, tua bangin sang kah to semsem uh hi.

Tua bangin khat le khat a kidemna uh hangin damdam in a sangzaw lam hong tung uh a, paak ii gim namtuina nangawn hong diik kha nawnlo uh hi.

Khat le khat a kiniamkhiat zaw nuam omlo uh ahih manin kahtoto uh a, a sawtna ciangin huih hatna lam hong tungto ta uh hi. Tua ciangin saklam huih in khat pen saklam ah len a, khanglam huih in khat pen khanglam ah len mang hiaumawk hi. Tua ni akipan in amau tegel pen kimu kha nawnlo uh hi.

Lungngaih ding

I nisim nuntakna ah ei danin hehna, thangpaihna, khasiatna, lungzuan khuangaihna a nei thei mite tawh kikhawl, kithuah dente ihi hi.

Paak namtui bangin namtuina tuamtuam tawh a kidim leitungah a nungta, a khuasa, a kalsuante ihi hi.

Pangpalek nihte bangin gim tamtui i diikkhop laitak i lungpuak kibatlohna le i thu pomzia kibatlohna hangin khat le khat i kimawhsakna zong om kha ding hi. Tua hun ciang…Pangpalek nihte bangin tungnun’ i kituh niloh leh a tawpna ah khat le khat kikhasiatna le kimuhdahna hong tun’ ding hi.

Paak ii namtuina diik khawmin a lamkhawm Pangpalek nihte pen bangmah tungnun’ a kituh ma un…nuamsa mahmah uh a, paak ii namtuina sungah kipaak mahmah uh hi. Ahi zongin khat le khat tungnun’ hong kituh uh ciangin tua gim namtui nangawn phawk kha nawnlo mawk uh hi. Tua mah bangin i nisim nuntakna ah i lawm le gualte tawh i kikholhna sungah tungnun’ i kituh niloh leh a namtui gimte i za kha kei ding hi. Kidawp huai hi.

Pangpalek nihte tungnun’ kituh in hong sang len tektek uh ciangin huihpi nawkna tuakin khat le khat a kigamlat mah bangun lawm le gual tawh i kizopna ah tungnun’ i tuhtuh leh khantawn nangawn in kimu nawnlo, kithei ngeilo bangin i om kha ding hi. Kidawp huai hi..

Tua ahih manin khat le khat kikal ah tungnun’ i tuh niloh sangin eima dikna ahiphial zongin kiniamkhiatna tawh a khial i kitansak mai ding kisam hi.

Thuk kik pahpah loin i cil lum tawh valh theih ding i kisin kisam hi.

Banghang…leitung luah ding kuamah i om kei a, tomkha a nungta khawm pak mite ihi hi. Lungdam, Dong Mung