Ki ngaihna pen ki mawlna in zang kei in ~ Cin Ngaih

Ki ngaihna pen ki mawlna in zang kei in ~ Cin Ngaih

Ni dang lai in ah khuapi khat ah tangval mel hoih mahmah khat om hi. Hau in mel hoih a sum zong paai zongna ah lawh cing mahmah in amin thang mahmah a, akum atam hang’ lawm ngaih neingei lo hi. Ni khat alam et het loh pi in nungak mel hoih mahmah, atei mahmah khat in hopih ahih man in lam dang sa mahmah in alungsim ah nungak nu hong ngaihsunsun hi. Hih bang in nungak nu in hun lemtang zong in hopih zel ahih manin hong kithuah thei uh a hong vaak khawm uh hi.

Hih bang in nungak nu in hun lemtang zong zel in ama’ kisapna te ah kihuhsak zui sak zel ahih man in mi hau tangval pa’ hang in nungak nu pen mi tampi tawh hong kitheih lawh in phattuam na tampi ngah hi. Mi hau tangval pa in nungak nu tawh kisai in hong ngaihsut pha kik a, “bang hang in kei nungak nu tawh kikhawl, nungak nu in kei hong ngai maw, kei tung pan phattuam na ngah nop man maw?” ci in alungsim naki dong dong a, atawpna ah kei hong ngaihsang’ kei hang in phattuamna angah nop man hi lel in cia ci in paupih/hopih lo ding in khensatta hi.

Nu ngak nu pen atei mahmah khat ahih man in tangval pa pen bangci hopih ding cih pen hong thei mahmah hi. Tangval pa ii lawm leh gual te in zong lamdang sak pih mahmah uha, “nungak nu in nang mah hong ngai taktak hi in teh, hih zah ta nang hong hopihpih,” ci in gen uh a, tangval pa zong lawm ngai ngei hetlo ahih man in alung sim kikhel leuleu in nungak nutawh hong kithuah kik uh hi. Nungak nu in tangval pa in angaih lam thei ta ahih man in tangval pa’ lungsim hong zo mahmah in a utut in hopih in tangval kiang ah mailam hun ding kuppih hi.

Hih bang thuteng hang in tangval pa in zong alung sim khempeuh nungak nukiang ah gen ding leh mai lam hun ding te a gen sawm ciang’ nungak nu lungsim hong thei khia ta hi. Nungak nu in mikiang ah” Ken ngai thei mahmah lo” ci in gen a, tua ban ah tangval pa company a nasem khat nungak nu in angaih lam atheih ciang’ lawm ngai ngeilo tangval pa pen nasak leh maizum’ hong thuah hi. Tangval pa in nungak in kei pen ”hong minsiatsak nop man, phattuamna angah nop man,” ci in athu te hong theita hi.

Ni khat, tangval pa leh nungak nu a ann-nek ngeina sai (restaurant) uh ah hong kituak uh ahih man in anih tuak un ann hong ne khawm uh hi. Hih bang in ann hong nek khawp khit, nungak nu inn atun khit ciang’ agilna sa in hong si hi. Nungak nu pen zato ah banghang a si cih ensak (post- mortem) uh a, gu(poison) ne kha a si ci hi. A thu akikan takciang’ mihau tangval pa tung ah hong tu hi. Tua ahih man in tangval pa thong (jail) hong kia ta hi. Apilna in la cin, ahauhna in la cin ahi tangval pa pen thong hong kiat hang, thong inn ah koi ci gamtat ding cih pen hong thei ziau in asawtlo in a utut na ah om thei/paa thei hi.

Ni khat, thong huansung ah nasem ahi ‘putek pa’ tawh hong ki meltheih uh hi. Putek pa pen thong pan asuahtak hang in aciah na ding inn leh lo nei lo ahih man in thong huan sungah thong kia misi te ‘haan ah phum na nasep’ in nei hi. Tua ahih man in tangval pa in putek pa kiang ah “ Pu aw, hih thong pan nong suahtak sak theih ding a leh a kisapna bangbang hong huh ning, inn leh lo hong guan ning,” ci in gen hi. Putek pa in, “Bang ci bang in ken hong huh thei ding ka hi hiam?” ci in tangval pa’ kiang ah dong hi. Tangval pa in misi om’ masak ciang’ kei haan kuangsung ah misi pa tawh lum kawm ding in, nang haan ah hong phum inla , zankim ciang’ nang kei hong phawlh/lakhia ding ci in gen a, putek pa in zong hih ngaihsutna hoih sa ahih man in misi om’ masak ciang’ nasep kipan dingin tangval pa tawh thukimna hong nei uh hi.

Tua khit asawt lo in, misi dak hong ging a, mihau tangval pa zong hong lungdam mahmah hi. ”Tun kei suakta ta ding ci in hong kingaih sunsun ta hi. Nitak kuan lam ciang’ tangval pa zong misi haan kuang sung ah hong lum suk hi. Mi si phum ding hun hong tung ta a, haan kuang zong haanmual lam zuan in kipaipih ta in, haan sung a om tangval pa ahih leh lung nuam mahmah in hong om hi. Haan khuk sung ah haankuang hong kikhiat suk ciang’, lei hong kivuk ciang’ mihau tangval pa hong lungdam mahmah a, ka suahtak na ding naai mahmah ta ci hi. Mihau tangval pa pen suahtak na ding hun ngak in mailam hun ding geel in nuamsa in a om’ laitak in putek pa hong pai thei mahmah lo hi.

Akiciam hun hong tung ta, lung himawh na lianpi tawh na ngakngak a, ahih hang bangmah kilamdan’na omlo in, akiciam hun hong kheng vaal ta, aih’hang putek pa’ husa kiza thei mahmah lo ahih man in tangval pa hong patau mahmah a, cih na ding thei nawnlo in, alawpna sang in a lungkhamna hong lian zaw ta hi. Lungkham mahmah in om a, putek pa husa lah bangmah kitheithei lo ahih man in, cihna ding thei nawn lo ahih man in, mei de in misi pa a et leh amah ahonkhia ding akiciampih putek pa asi na hi gige hi. Tangval pa zong lungkham lua in cihna ding theilo in amel kidaang gawp in amai ah sisan teeng/om nawnlo a, lungkia in hong si hi.

Hih atung a taangthu en leng, ki it kingaihna pen ki mawlna in zang kei in. Hamphat na ngah nop man, kiliat sak kiphatsak nop man in zong zang kei in. Na lawm ngaih nu/pa in hong dai/minsia sak nop man a na tung ah hong gamtat a leh naa sak mahmah na hang in thukkik ding in ngaihsun kei in. Thukkikna pen mihing te a hilo hi.

A hoih lam in ngaihsun in la tua bang mite tawh nungta khawmleng cikmah hun in lungnopna om ngei lo ding hi ci in ngaihsun in, na lungsim kizo in la, lungsim beidot na in zang kei in. Nuntakna pen manpha mahmah hi. Mihing te in thuman lampi hi ci in angaihsun te pen sihna lampi hi kha thei hi (Paunak 14:12). Naa nasak mahmah hang’ thuak tentan in, mihing te’ thuak zawh loh ding haksakna hong kipia lo hi. Thuman a na gamtat na ah haksatna natuak/thuak leh hong kilapsang ding anaai cihna ahi hi. Written by: Cin Ngaih