Palikbu pa le singneipa ~ Lian Tuang

Palikbu pa le singneipa ~ Lian Tuang

2016 kum khuakhal ni sat mahmah hun laitak khat in ka nasepna station ah tuilum hawp in lawmte tawh ka kihoho uhi.

Tua laitakin cycle 2 tawh palik 3 uniform silh sitset in zum huang sung ong lut vatvat uhi. Mi khat a khut lehhen sa in ong lutpih uhi. Amau nung deuhah singpua mawtawpi khat ong pai vuavua hi. Palikte in singpua mawtaw le singneipa a man ahi hi.

Zum mai ah mawtaw khawlsak uhi. Palikbu pa le singneipa ko kiangah ong tawlnga hi. A dang tengin mawtaw khawng vel in phone khawng kiho in manlah mahmah uhi.

Palikbu pa in singneipa kiangah na gil a kial hiam, tuilum na dawn diam, za na tep diam ci in dam takin hopih hithiat hi.

Palikbu pa in za zial khat a piak kawmin ko zong ong man nuam hetlo mah hi ve ung, no le no kihaza in kikhiakhia hi kei le uh cin ci hiathiat laizang hi. Tua kammal a zak ciangin singneipa in kua hiam ong khia ci kik pah lian hi. Palikbu pa in singneipa en se loin nang le nang ngaihsun ve kua a hi tam, nang nasepna a thei mi bangzah pha ahia, tu sunga na kihopih ahih keileh nang kianga ong hawh mi bangzah pha hiam cih san hi.

Tawlkhat khit ciangin singneipa in thangpaihna le hehna kigawm nuihmai niangnuang kawmin amah le amah ong kiho hi. Mihingte bel en I deihsak pente mah in ong haza, amau tungah I cihtak mahmah hang eitungah kuamah ong citak lo ci in amah kia phunphun hi. Ken amau nasepna kuama kiang gen ngei hetlo mah hi veng. Nung nipi in mawtaw 5 pai khin tun zong a sawt loin mawtaw 5 pai lai ding, ken tuate kuama kiang gen sak hetlo mah hi veng ci ta hi.

Palikbu pa in singneipa thugente thupi sa hetloin khuadak kawmin tuilum hawphawp lel hi. Ko zong thei mah ung ei ci zel lel hi. Palikbu pa in tua na gen pa singkholna ah nung nipi ka pai uh leh gam mang hiau ung in baih kei cih san lai hi. Singneipa in gam man nading om hetlo, ko singkholna gal hi, ko lam ong tawn le uh cin nai mahmah ci lai hi. Agen kawmkawm in a min zong gen kha zelzel hi. Palikbu pa in bangmah lamdang a sa hetlo dan om hithiat den lel hi.

Nitak lam ciangin singneipa le sing mawtawte palik zumah paipih uh a, ko kiangah palikbu le a dang khat ong om lai uhi.

Kei zong palikbu pa gei nehphei in ka hopih hi. Tu sun a sing mawtaw pen ong kikhia takpi mah a hi hiam ka cihleh palikbu pa in kuaman ong khia zenzen kei e ong ci kik mawk hi. Mi kicing lo lua ka hih manun hih bangin a kiman mengmeng zolo bek ahi hi. Ataktak in ko huam gamsunga thupiangte bel ahuampi in a kithei lua hi lel hi. Thu kan nuam leng hamsa lo pi, tu sun mahmah in zong bangmah dotloh pi in tampi ong kigen ziau ve ong ci lai hi.

Ataktak in tu sun a I mi mat pa in mimal in ong muhdah lohna ding leh nasem dang kua om lai hiam cih I theih nop man in ong khia om hi a kici pong ahi hi. Amah zong ei mah bangin pilvang lua khollo ahih manin a upmawh mi khat tungah heh in thu tampi pulak khia gawp lel hi. Kankan dotdot zong kisam lo zezen hi. Ama tung panin kuate in koi mun ah bangsem cih pen kician in a kithei pan ahi hi ong ci sawnsawn hi.

Palikbu pa a ciah ding ciangin lawm aw na ciamteh gige in. Mi a pilvang khollote in midangte tel khial baih mahmah uhi. Thu khat peuhpeuh a pian ciangin a hang taktak kan se loin ama upmawh thukhat len tentan ziau uhi. A lungsima a upmawh thu pen a hi takpi sa uhi.

Amah le amah hoih takin kien masa loin midangte mawhna thanemnate bekbek zong masa uhi. Theihtelna sangin upmawh theihna tungah kinga zaw uhi. Nang le kei bel I tua cih loh ding thupi ding hi a cih kawmkawm in ong paisan hi.

Hih thupiang le palikbu pa kammalte in ka ngaihsutzia le ka thupomzia tampi ong khel hi.

Tua mah bangin tu laitaka i buaipih theihzel ahi, minam vai, biakna vai, kipawlna vai, nasepna vai, lawmta vai, innkuan sung vai le vai tuamtuam thu hamsa pawl khatte ah zong hih thute phawkhuai thei kha dingin lamen i hih manin a gelhkik i hi hi. Lian Tuang