Maan (Photo) hong ki khak

Tu kuam teng pen laigelh hunding ka ngah phat loh tawh laigelh man lo in vai tuamtuam tawh ka buai den hi. Ka lungsim ah laigelh ding a thu pi simsim hong suah kei nak leh laigelh nawn kei ning in laisim lam ah hahkat zaw ning ci in kei leh kei in ka khensak sa a hi hi.A hi zong in laigelh loh a phamawh thu leh gelh loh theih loh thu khat hong om a hih man in manlah pi pi leh ihmut nang pi pi mah in ka gelh teta zel hi.

A beisa kha ki pat lam in inn a ka nu leh ka pa ka ho pih a, na maan(Photo)te uh hong khak un ci in ka vai khak hi. Ka nu leh ka pa maan pen ka muh loh zawh sawt simsim ta a, ka muh nopna pen sawt mah mah ta hi.Khua lam a phone tawh a online gun te kiang ah ka nu leh ka pa maan hong zaih sak un la hong khak un ka cih hang in lah kua mah in hong khak lo a hih man in ka lungsim ah tua phone hoih nei te ka mawh sak gawp pong a, ka heh peuh mawk suah thei lai hi.

Ka om na inn ah ka veng te pen Bangladesh te mi 5 om uh hi. Tua te in a inn uh a khakding maan te uh facebook pan hong khak sak in hong ci uh a ki ngah lua ka ci hi. Maan hong ki zaih un la na lawm te facebook, gmail pan hong khak sak ding hi ing ci in ka lung nop sak pong hi. Inn a ka nu leh ka pa maan ka vaikhak pen ka ngak lah mah mah hang in kua mah in lah hong khak thei tuan lo a, ka lam et bang a bei keei a hi ta mai hi. Zingsang khat nai 11 pawl in an neding ci lian in ka ki thawi leh ka innveng vua Bangladesh te khat in a memory card hong tawi a, hih sung a ka maan te ka lawm te facebook ah hong khak sak in hong ci a kei zong ka laptop hong in a memory sung a maan te ka khak sak hi. A lawm te in zong maan khak uh a, download sak in a memory sung ah ka koih sak kik hi. Tua ni pen WiFi line zong hatlo deuh tawh ki bang ka sa a, ka laptop pen ziakai lua in ka heh bang suak mah mah hi.

Maan khak na leh maan ka laksak na in nai khat val bang kahun bei a, ka lungsim ah ka heh giauguau hi. Bangladesh pa zong a maan te a memory sung ah ka koihsak khit teh nop sa mah mah in ka inn pan un pai khia pah a, kei ka hih leh hun bei leh an nek ki taanliang ka hih man in ka hehsuak a, ka laptop zong hongnawn lo in a power pan ka khak cip pah hi. An ne in ka nek khit teh tawmkhat sung lai ka sim hi. Ka heh hong daih zawdeuh teh ka laptop ka hon leh Viber pan in ka theih ngeiloh khat in ka deih mah mah ka nu leh ka pa maan te hong khak mawk a, nak pi in ka lung a dam hi.

Ka phawk khak thu khat bang hong om liang hi. Ke’n zong midang te ka huh manin ka nu leh ka pa zong midang te in na huh hi cih pen tel cih tak in ka tel veva mawk hi. Mun khat ah a om khawm ih hih loh hang in ih kiim ih kiang te, ih lawm te tung ah nahoih ih sep, ih bawl na te in a mawk na suak lo hi cih ka phawk thak hi. Khat leh khat ih ki huh theihzah in ki huh tangtang ding thu pi hi cih ka deih na a hi hi.

Deih Tung

(Tomno khat sung Malaysia)

Phone :+60169871812
Email :[email protected]
Facebook:https://www.facebook.com/vunghdeihtung
Blogger :http://www.vunghdeihtung.blogspot.com/