Pa Innluah Pa leh Inntuan Pa

Pa Innluah Pa leh Inntuan Pa

Zomite ngeina ah tangval lai-in nauzaw inntuan cih bang om ngeilo hi. Zi neihzawh bek ciangin Inn ki tuan pan hi. A hih hangin tuhunteh tangval inntuan om seuhseuhta hi. Inn tuanlo sunte zong inntuan dinmun lungsim vomta uh hi. Hih thupen Zongeina dingin ka um kei hi. Inn tuanma sumtha lawh khempeuh innpi te ki musak hamtang zaw hileh ki lawm na pi tuhun teh Tapa taimang pa lungsim bangin huaiham luatna Zomite sungah hong ki zel mahmah ta hi. Pilna sang pipi a sin, tangval mihau ih neihte zong hih mun ah ki mittaw sak mahmah mi tam mahmah hi. A hi ding mah aitam cih zong ka thei tuan kei hi. Ih ngeina ah bang lian ki zangh cih ka telnuam mahmah hi.

Tapa taimang ihih loh hangin ei bek ai peeng ding bek ngaihsun in pilna sinin hauhna ih zong hi. Hih thupen Pasian thu-um te din mun ding taktak aitam ci-ing. Thumanna ding lam sangin mimal hamphatna ding bek ki ngaihsunta hi. Minam dangte tawh ih ki thuah ciangin ih lungsim khengval pahpah hihang.

Zomi sungah Innluah mihau laitan sang’ tamlo uh hi. A hangin pianna nu leh pa tawh Lokho sing pua ban-ah neih leh lam haksatna tuamtuam hangin Unau sungah u pen ten pilna sin theilo uh hi. Anau te uh sang hong kahkah sak uh aa, sum leh pai neih sunsun tawh pilna hong sinsak uh hi. Nu leh pa leh Upi ten ih nek ih dawn ding sanggam teng adingin Lokho ngiatngat uh hi. Nau zaw lamte ki hampha mahmah hi. Na sep haksapi teng ih sem kha kei hi.

Khua panin khual ah sang ki khah in, inn panin puak ding sum leh paai ih neih kei hi. Haksa pipi in sang ki kah hi. Tua ih haksatna ih ngaihsut ciangin Innpi te peuh tungah a khasia tam mahmah hi. Innpi ten zong bang mah a neih hi keilo na pi sum leh paai haksat ih tuah ciangin bangmah hong pia nuamlo bangin ki mu lai hi. A bul tak in panleng hih ciang ih tunna taktak pen nu leh pa tawh amapang u te hang zong ahihi.

Gamdang ah ih tung aa, abeisa in haksatna ih tuahte innpi te peuh tungah ki khasia in gamdang ih tunteh innpi te tungah ki heh thei lai hi. Sum thalawh in sum tampipi ih ngahte ei mimal ading bek in ih ngaihsun hi. Tangval lai in sum ngah sunsun kholh in Zi neih bek Zongeina tawh inntuan khialo in kuamah thu dong nuamse lo in Zi tawh inn ih tuan laulau hi.

Vompi Ngaltang ih matni zong Innpi ki tun nuam nawnlo aa, ih it ih ngaih teng bek ih inn ah ih samziau lel hi. Nu leh pa tungah itna taktak ki neih nawnlo in a thupha bek deih man bek tawh ih nungta liamliam hi. Pilna sangpi a neih ding mi, gamdang a tung ding mi…hi kei hang ei ka cih hun om tham hi. Namdang a kici te tawh ih ki thuah ciangin amau ngeina peuh ih thupi ngaihsut haihai lai hi. Mi namdang tawh a ki tuah ding mi hi kei hang ei..amau sangin khengval zaw hang ei ih cih hun om hi.

Pilna hauhna ih neih pen hoih mahmah na pi Innpi te ih nelhsiah gawp khak ding lauh huai hi. Pilna ih neihleh ih mipih ten nop tuampih ding, hauhna ih neih leh ih mipihten nop tuampih ding cig bangte hamciam huai mahmah hi. Pilna neihto semsem ih mipihte tawh ki gamla to semsem, ki phasak semsem..cih bang ih om khak ding lauh huaisa mahmah ing. Pawl khat leuleu Pilna sangpi a zawhteh Pawlpi sung, khuasung, minam sung, u leh nau sung a tawk nawi om thei leuleu hi. Ih pilna neihte ih mipihten hong angtan pih mahmah aa nu leh pa sanggamte ki maitaang tuam mahmah ahih manin ih pilna sangpi te phawk kawmin mukpau kampau heksuk hektoh hong siam un cih deih ing.

Zongeina tawh innpi te hong inntuan ngak zaw leng hoih ding hi. Innpi te buaisak hetlo in ei bek inntuan ziau lelni ci keini. Hih bang gamtatna pen Zongeina hi hetlo hi. Inn ih tuan ma ih ngah sunsun te Innpi te tawh nekhawm zek khawm lialia thei hileng ut huai mahmah aa Zongeina diktk a zui ihihi.

Inntuan ngeina manleh tangval lai ngeina man tawh ih kalsuan ding ka lunggulh mahmah hi. Zongeina pen a zangh ziahziah dingte ihih manin cil bawl kei ni.

Thawn Tuang
Zomi Angvaan
May 15, 2013
Ka Laikung panin::http://zomi-angvaan.blogspot.com/