Sunglam mi tawh kitel semsemna

Sunglam mi tawh kitel semsemna

BC 400 hunlaipawl in Scorates in a nungzuite kiangah ‘Nang kua cih kithei in’ ci in genthei zel hi. Hih mipa in a pualam a kimuthei mi a cihna hilo limlim dinghi ci in ka um hi. Scorates ii gennop thupen ih sunglam mi a hihkei leh lungsimthu a hihi.

Mihingsung hitaleh na khatpeuhpeuh sungah a kibanglo na namnih ta om hi cih laisungah ka simkha ngei hi. A hoih i cihleh a hoihlo i cih te ahihi. A hoih i cih nate in cidamna, thahatna, matutna, lungdamna, etc, cihte bek muthei hi. A hoihlo i cihte a hihleh guallelhna, cidamlohna, lungkimlohna te bekbek muthei hi.

Tua te nih in a kituak lian in nasem khawm ngeilo hi. Khat in na a seplaitak a dangkhat a nasep khawl hi ci in laiat pa in gen hi.

A taktak in ih sungah na a sem thei nih om hicih ka telcian kei hi. Ka telcian khat in a hihleh i lungsim in thu a ngaihsut ciangin a hoihlam leh a hoihlolam ci in namnih ta in ngaihsun denhi cih teltak in ka thei hi. Lungsimlam tawh kisai pilna neite in a hihleh mihingte 95% in a hoihlolam in thu ngaihsut nuamsa zaw hi ci in genkhia uh hi. A maute ii negative thought sungmah ah a nuntakna hun uh bei sak hi. Lawhcinlohna leh lungkimlohna vive ngahuh hi.

Tu in i kikup dingpen ‘Na sungmi tawh ki tel semsemna’ cih a hihi. Nangzongh mi atamzawte bangin negative people (a hoihlolam bekbek a mu, a ngah mi) na hihkhak leh ‘na sungmi tawh ki theihtelna thu’ cih i genna thupi na sa khol kei thei ding hi.

Nitak a lup hangin a ihmu thei mahmah lo Joe Benson thu tawm kong gen nuam hi. Benson pen a nasepna te ah lawhcing

thei mahmahlo ahihmanin leibat sikna laibekbek a sabuai tungah kidim hi. Na khempeuh lungnopna ding omlo a hihmanin nitak in ihmu thei nawnlo hi. Nitak khat a leiba lakna te ii bawlna teng lungngai kawmsa in ihmu theilo in om hi. Tua laitakin a beisa ah ka ngelhsa laibu khat phawk kikvat aa mihingpen pumpi tawh aki nungta hiloin Kha tawh a nungta pumpi a hihna hong phawkkik vat hi.

‘Lungsim ka hihlel leh ka ut bangbangin piangthei ding hilo ka hi hiam?’ ci in Benson in ngaihsunkha vat hi. ‘Ka lungsim tawh ka ut bangbang bawl in ka lungsim sungaa ka ki bawl bangin ka piangding hi’ ci in upna hong nei hi. Tua nitak pan kipan a lungsim sungah a hoihlam ngaihsutna vive kidim sak hi. A ut bangin ki ngaihsun hi. Mi dangte a kimuhsak nopdan te hong lungngai hi. A nasepna ah a lawhcin nopna te hong ngaihsunsun ta hi.

‘Guh neilo bangin thu ka ngaihsun kei dingaa haksatna khempeuh a zo zo mi thahatpa ka hihna ka kithei hi’ ci in pulak hi. Ka sepding khempeuh ka sunglam pan in hong ki hilh hi. Ka sunglam ngaihsutna leh septheihna zah in na sem thei bangdang om hiam? ci in thathak hong la hi. Tua ni zingsangpan ki pan a mah a’ ding nisuah dan hong kilamdang hi. Nathak a mu ding bekbek in ki ngaihsun hi.

Benson ii omdan khempeuh kikhel a hihmanin a lawmnu mahmah in zongh lamdangsa hi. Tua ni bup a inn sungah a leibatna lai khempeuh en in hoihtak in a leibat zah ciamteh sitset hi. A lawhcing zaw a nasep danding teng khempeuh a ut banglian in ngel sitset hi. Nitak a lupma in tawmvei sung lungngai in zingsang a thawh cingin sepkhiatna tawh lak ding cih khensatna tawh lum hi.

Hih ‘Ih mut kawmsa aa hauhna’ cih laibu a simloh hangin ihmut kawmsa in Benson in hauhna la taktak hi. A lungsim sungah a sepding khempeuh lungngai kawmsa in ihmu hi. A pualam pilna khempeuh a ihmut laitak in pilna leh theihna tawh a kidim a sungtawng pilna in nasiatak in a ngimna leh a ngelna te a’dingin na sem hi. Benson gamtatna leh a thupiang khempeuh at ni cileng laidal tampi bei ding hi. A tomkim in genpak leng Benson te innkuan tu in a sumlut uh hoih mahmah ta aa inn hoihmahmah sungah nuamsa tak in teng uh hi.

Dotna khat hong dong pak nuam ingh. Hih Benson lungsim puakzia a kikhelna ding nasep hanciam a kul ding hiam? Gim pi tawl pi aa sepding a hikha diam? A taktak in pen hi peuhmah lo hi. Tua tawh ki lehngat lian hi.

A haksatna khempeuh cihtakna leh khensatna ki ciantawh zawh sawm hi. A sunglam Kha in thahatsak a hihmanin a haksa zongh phawk man nawnlo hi. Nidang lai in na a sepciangin a khutte ling in a aw te nging zolo hi. Banghanghiamcihleh a sunglam ah ‘na kamciam bangin hih zo kei lecin’ cih bekbek om hi. A ma a’dingin tuapen tuihual pi bang hiaa haksa mahmah hi. Nasepna pan inn ah a ciah ciangin a lungkia dikdeksa in inn tungzel hi. Banghanghiamcihleh sun in a nasepna ah nuamsa zo lo hi.

A hizongin a sunglam ngaihsutna a kikhel ni pan kipan (ngaihsutna hoih tawh a kidim nipan kipan) inn a ciah nuam sa mahmah pong lel hi. A leibatna lai te a et kawmsa in nuihmai zo veve aa nidang bangin om thei nawnlo hi. A na sepna lawhcing in a sumkhol te a khangsemsem bekbek in a lungsim sungah mu zaw hi.

Kongdotnop a nihna pen Joe Benson in nang ii sep theihloh khat a sem a hihiam? Hi peuhmah lo hi. Benson in lungsim mitkha sungaa a ut leh a piannop dan lian in a kimuhtheih mahbangin nangzongh na ki mu thei hi. Benson ii nuntakna a kikhel mahbangin na nuntakna sungah lawhcinna lianpi hong piangthei a hihi. Lungsim ngaihsut a kikhel theih nadingin lungsim puakzia nasiatak in a ki khel masak ding kisam mahmah hi. Tua lo in ih ngaihsut ki khel zolo hi.

Mitphial lak siam mahmah te ii mitphial lak na en ngei hiam? Na upzawhloh dongin honglak aa lamdang na sak mahmah khit cingin tua mitphial a bawldan honghilh leh thupi sa nawnlo in ‘lel dih’ na ci ziau hi. Na muh tungin ‘hi bang bawlthei ngeikei ning’ na ci hi. Hong ki hilh khitciangin a hihleh ‘aw ol taktak ei’ na ci lel hi. A bawldan teng na sin taktak khit ciangin mitphial lamdang abawlthei na hita hi.

Mi pawlkhatte in nakhat peuhpeuh ah ki piakkhiatna lo tawh a deih bangbang a ngah dingin ki ngaihsun leuleu uh hi. A lamdangtak in khutdawn zongh tanglo in a deihbangbang a la dingin ki thawi uh hi. Tuabang mite in hibang laibu te a sim khituh ciangin seplohpi in nahoih ngah ding cih lam et in neipah uh hi.

Hihlai ah lungsimtawngaa ngaihsutna leh lungsim puakzia a khelna hangin kilamdanna (hauhna, cidamna leh lungdamna) a ngah mipa khat thu genlai ding hi hang. Fred White a kici mipa pen mi mawkmawk khat a hihi. A nisim nuntak na dingkhop kicing sumlut nei hi. Ahihhangin a lawhcing mahmah mi suak ding cih ngaihsun zo ngeilo hi. Ni khat a nasepna company makai pa in nitak kilawmtatna an nekkhopna pawi a neihna ah sam hi.

Nitak an nekkhopna a man ma un a mahleh a lawmte khempeuh hoihtak in a kizem inn lian leh munthupi mahmah khat ah kipai pih hi. White in tuabang inn ngaihsut in zongh neingeilo hi. Ahizongin tua nitak in White in thutampi hong ngaihsun hi. Inn kong khakte leh kong veng neuneu te tungah a kisuai lim te a hizongin, tuipi ngei a nopna dingin a kibawl munte kong khak neuneu te pan in kimu thei a hihmanin thupi sa in hoihsa mahmah hi.

A ma nasepna aa a kisuai limte hong phawk aa mannei sa nawnlo hi. A lungsim sungah ‘banghangin midangte in na khempeuh nei uhaa mi pawlkhat te in nektawm dingleh kisapna ciangciang bek ngah mawk uh hiam?’ ci in a mai mial hi. Tua laitak leh a masungah thuthak khat hong om vat hi. ‘Banghangin kei mihauhna hangin lungnuamlo laizang ding ka hihiam?’ cih thu a hihi.

White in ‘tu mahmah in ka nasepna boss pa ii a neihsa tengtawh ki lungdam sak lel ning, nai khat sungin hih munpan ka muh a nuam mahmah tuipi ngeiah naikhat sungbek hilo in nikhat thapai pai in om thei lel hilo ka hihiam?

Hih inn sungah a kisuai te a hilo a et lawm mahmah mual le guam, singkungte lakah pai thei hilo ka hi hiam?’ ci in ngaihsun hi. ‘Ka inn ah van a tuamtuam a om loh hangin ka an kamlim zaw aa, nuamtak in ihmu thei zaw ding hilo ka hihiam?’ cih lungngai hi. Mi neihsa hazatna hangin a lungnoplohna teng a ma nuntakna lungkim huaina teng tawh hong laih hi. A lungnopna a guksak teng hong lakik thei sam hi.

Hazatna in i khantoh theihloh nadingin khautawh khih bangin hong khih cip hi. Haza cihpen mi khat ii neih neilo dingin ki um i hihman a hihi. Tua mi neihbang neizolo dingin i ki up na in hong guallel sak hi. I gensa mahbangin Fred White mihaupa a hihnailoh hangin mihau te ii muhbangin mu thei ta hi.

Mi haza nawnlo in a thupha te hong ngaihsun hi. A mah le a mah a khantoh theihna ding bekbek lungkim tak in hong ngaihsun hi. White thu tampi kong gending a kisam laiding hiam? Tom genziau leng a ma lungsim puakzia a kikhel nipan kipan a boss pa in a za khang toto sak aa tu in vice-president sem ta hi. Inn hoihmahmah sungmah ah tengzo ta uhaa a lungdam inn kuan suak veve uh hi.

Nang taktak

I gegen sa mahbangin mihing 95% te pen negative people vive ahi uh hi. Bangzahtak in a hoihlolam a lungngaithei mite a hizongin a sunglam taktak ah hoihna a theihlohkal in tamzaw veve lai hi. A hoihna khempeuh hoihloh ngaihsutna tawh khuhcip ahihman bek a hihi. Za tawh a kizut cip inn tawh kibang uh hi. Zaa tawh tua in a kizut cip hangin a zaa man sangin a inn ii mantaktak tamzaw tham hi.

Laidal khat la inla khepkhep lecin a neuno khat in hong piang ding hi. Tua laidal a neu mahmah khit ciangin za vom zut lecin a laidal buppi a vom bangin kimu hi. A sunglam ah a lianzaw tham a pulam pan a kimulo a siangtho lianpi a omlam ki mangngilh kha thei hi. Na lametna sungah na lungdam theih kei leh a hoihlolam ngaihsutna in nang hongzo hi cih theipah in. Na kaam in hongkhak hilo in na ngaihsutna in hong khaktan hi zaw hi. A beisa hun sawtpi laipek pan in a picinglo ngaihsutna, gamtatna leh lawhcinlohna te in hong zo cip lai a hihi.

Nanglenang a hoihlam bekbek a ngaihsun dingin kisin in. Ngaihsutna hoihlo khat na neihlam na ki phawkkhak sim in a hoih, a lungdam huai thu tawh laih pah in. Na hamphatna thakhatthu in na mupah kei kha mahding hi. Ahizongin ahoih hong paipai a hihna phawk in.

Leisungah khaici khat peuhpeuh na tuh ciangin na tuh khaici leitungah a kimu thei hong suahna ding tawm vei sung na ngakphot loh phamawh hi. Na khaici cidam in tui pia in na puah nakleh a hun a cin ciangin a gah na ne limlim ding hi. Na lungsimsungah ngaihsutna hoih na neihkhit ciangin na lamdang hongpiang pah lo thei mahding hi. Ahizongin lungsim cihtakna tawh na letkip nakleh nanga’ding nithak hong suak ding hi.

‘Ka kimlepam ah na hoih a pianloh laitak in bangci bangin na hoih ngaihsun thei ding ka hi hiam?’ na ci nuam ding hi. Hi bangdotna a omleh kei zongh khat kong dong nuam hi. Na khualzin nading meileng letmat nih om hi. Nihlak pan khat zuihloh a phamawh ci ni. Khatpen lamsau in, lamhaksa in, nin ki paihna mun leh a nuamlo lam pi zuih ding a hihi. A dangkhat pen lamzong hoihin, lungnopna dingin lam kim lam pam ah paak hoih tuamtuam te paak in singah te gah zihziah ci ni. Koi pen zui zaw ding na hiam? Mi atamzaw ii hong dawnkik nading pen theihsa ahihi.

Ngaihsutna sungah na deihtel ding nih om hi. Khat in lawhcinlohna, maigumna, cidamlohna sung leh a dangkhat in pen cidamna, hauhna, lungdamna sungah hong tunpih thei hi. Koi pen tel zaw ding na hihiam? Positive sangin negative mi tamzaw thei mah ding hi. Tuabangaa a hoihlo lam bekbek a ngaihsun mite in hong lawhloh nadingin na sungtawng lungdamna hoihtak in kemcing in. Na ngaihsutna in midangte khekhap a zuihloh nading ki dawm in.

Na ki thuahpih mite a positive theithei dingin khelsawm in. ‘Tuabangin ngaihsut hoih ding ka hanciam aa a hizongin bang mah kikhelna om kei’ a ci om thei hi. A taktak in tua te in a ngaihsutna a hoih nading a hanciam lo te hizaw hi. Lawhcin nading leh lungnop nading a ngahnuam pong bek hilel hi. A deihbangin a pianpah loh ciangin lungsim ngaihsutna tawh bangmah kisai kei ci uh hi.

A taktak in mi khempeuh in lungsim ngaihsutna nisim in i phattuam pih aa i siattuam pih zongin a kizang den ahihi. Natna kitheilo aa a cidam lo mi, nasep hanciam mahmah aa a lawhcing theimahmahlo mi, a lungkim thei ngiatlo mi cihte pen a deihhuai lo lungsim ngaihsutna ii vuknelh mite a hihi. A cidam nuam, a gualzo nuam ciangbek hikei inla a lungdam khin, a gualzo khin bangin ki ngaihsun in. A sawtlo in dam siangthona, hauhna leh lungdamtheihna na ngahding hi.

A cidam, a hau, a lungdam nuntakna nang a’dingin ki ngahthei hi cih na um thei ta hiam? Khentat theihlohna, up lohna te hemkhia inla ‘hi thei mah hi’ ci in. Hong piang ding hi. Ih Mutna leh Hauhna