Malaysia gamsung Operasi kipanta, zankhatthu in mi 229 kimankhin

Malaysia gamsung Operasi kipanta, zankhatthu in mi 229 kimankhin

Malaysia gamsung ah Immigration Department te’n “Ops Mega 3.0 Operation” cih minvawh in, gamdangmi Permit neilo, phalna kician neilote matkhiattheih nadingin Sunday zankim akipan Operasi kipanta cih Bernama pan kiza hi. (Photo: Uniform asilhlo Immigration Officer khatin Kuala Lumpur khuasung ah gamdangmi khat abawh laitak)

Sunday zankhatsung bekbek inzong Malaysia gamsung aom gamdangmi phalna neilo nasem “Immigrants” bekbek akigawm in mi 229 kimankhia khinta hi.

Malaysia Immigration Department te makaihna tawh Operasi akibawl hi a, gamdangmi bekbek akigawm in mi 1672 te ii Travel Documents te Checking kibawlsak hi.

Malaysia Immigration director-general Datuk Seri Mustafar Ali in agenkhiatna ah hih Operasi pen Rehiring Programme abeikhitzawh “Nationwide Operation” Malaysia gambup Operasi akibawl hi ci’n genkhia hi. Rehiring Programme pen abeisa in aki gengensa mahbangin June 30 ni in abeita ahihi.

Immigration ulianpenpa in agenbehna ah gamdangmi nasemtebek hilo, tua phalna neilo illegal migrant workers kici gamdangmi te nasep aguan, nasep apia Boss “Employer” tezong kimanding hi ci’n genkhia hi.

Hihbangin aki vaihawmna pen Malaysia gamsung ah phalna kician aneilo illegal immigrants tamsemsem ahih manin, tuate siansuah nadingin Operasi akibawl ahihi ci’n genkhia hi.

Tukum abeisa January panin July kha kipatdong Malaysia gambup ah illegal immigrant akici Permit neilo gamdangmi tuamtuam akigawm in mi 19,969 kimankhia khinhi ci’n Immigration Direction-general in genbeh hi.

Tuabangin nasemte akimat banah illegal immigrant te nasep aguan Boss “Employer” bekbekzong akigawm in mi 536 bang thukibawl, Legal Action kilakhinta hi.

Akimansa gamdangmi te lakah mi 9854 tepen thusitna kibawlkhin a, adang acianlai tezong abanban in thusitna, thukhenna kinei totoding hi.

Tuabangin akiman gamdangmi te lakah Indonesia gammi tampenpen a, akigawm in mi 6871 bang pha uhhi.

Abeisa Najib ii makaih hunlai in Deputy Prime Minister asem ngei ahi Datuk Seri Dr Ahmad Zahid Hamidi zong tulaitak sumvaitawh aki mawhsak mahmah laitak hi a, Malaysia gamsung panin apusuak theiloding in Blacklist sungah kikoih ci’n ki genhi. Ahi zongin tuavaitawh kisai in Immigration Director-general in agenna ah Blacklist sungah kikoihsamlo a, ahi zongin Malaysia gamsung golhguknekna akankhia MACC (Malaysian Anti-Corruption Commission) te’n tuapa tungpanin Statement lakna neiding uh cihi. Sawltak #zomidaily

May 31: Malaysia gamsung ah June 30 khitzawh gamdangmi te Rehiring Programme beitading

Malaysia gamsung ah aomsa phalna kician aneilo gamdangmi nasem te abeisa in na asepkiktheih nadingun kumpi te’n Rehiring Programme bawlsak uh a, nasep kiktheih nadingin vaihawmsak uhhi. (Photo: Kuala Lumpur khuasung aom Food Court khatah phalna neilo, permit tawilo gamdangmi te akimat laitak)

Ahi zongin gamdangmi “illegal foreign workers” te nasepkiktheih nadingin akivaihawm Rehiring Programme pen maikha ciangin khawlbawl tading hi ci’n Putrajaya kumpi thunei te’n tuni in genkhia uhhi.

Tua Rehiring Programme pen Malaysia Immigration Department te’n abeisa 2016 February akipan azat tohtoh uh ahihi. Malaysia gamsung ah Permit neilo in nasem gamdangmi tampitak om a, nasemding mi kisam veve ahih manin, tuate Official in azattheih nadingin Rehiring Programme akizang ahihi.

Tua Rehiring Programme pen June 30 ni ciangbek kizangding a, tuakhit ciangin kizomsuak nawnloding hi ci’n Home Minister Tan Sri Muhyiddin Yassin in tangko khiata hi.

Tuni ciangciang Rehiring Programme tawh phalna neilo gamdangmi “illegal foreign workers” sungpan Register abawlpen mi 744,942 phakhinta hi. Tuaban ah nasep anei Employer (Boss) bekbekzong 83,919 te’n Rehiring Programme tawh Register bawlkhinta uhhi.

June 30 ni khitciangin hih Rehiring Programme tawh kisaikhempeuh ahun abei hitading hi. Bangmah zopsuaktheih, Extension bawltheih omloding hi ci’n Home Minister in Statement ah genkhia hi.

Tua ani abeiding June 30 khitciangin gamdangmi nasem te leh Boss te’n vaikhatpeuhpeuh pen Immigration Department tetawh vaihawmding ahihi ci’n genkhia hi.

Tuaban ah June 30 ni khitciangin Malaysia gamsung ah phalna neilo gamdangmi te matkhiattheih nadingin Operasi kilimpat mahmahding hi ci’n Home Minister in genbeh hi. (the department will start conducting large-scale operations to crack down on illegal foreign workers after June 30)

Malaysia gam ii thukhun azuilo gamdangmi nasem Foreign Workers te leh Employers tepen kimaisak cihbang omnawnlo dinga, thukhun ombangin khauhtak in kisemding hi. Malaysia gamsung aom phalna neilo, permit tawilo illegal foreign workers tevai siansuahna limtak in kisemding hi ci’n Home Minister in genkhia hi.

More: KL, Bukit Bintang vengsung aom Entertainment Outlet khatah Operasi lut, mi 24 kiman

Tulaitak agam ah aciahnuam tepen Immigration ah hongki aptheilai hi. Tuapen Voluntary Surrender Programme kici a, phalna neilo, permit tawilo gamdangmi nasemte agam uhah aciahnopleh hongki aptheilai a, tuazong tukum August khadongbek kihonglai dinghi ci’n genkhia hi. Sawltak #zomidaily