Nute Ni Phawkna ~ Thanglam Pau

Nute Ni Phawkna ~ Thanglam Pau

Amasapen in Zomi sungah Nu’ akici khempeuh zahtakna tawh nakhut uh kong len nuam masa hi. Katel mahmah thu khatah Nute nipen, Nute lungdamni bek hilo in Ta’ hing akici peuhmah lungdamni zong ahi hi. Banghianghiam cihleh? Nu’ cih na omkha hikeileh Ta’ cihbang aom ngeiloding ahihlam thu ka telpha mahmah hi. Nute Ni ong piankhiatna thu i gen nawnkei dinga Nute Hoihna leh ong Itna thu i gen nuam hi.

Zogam gilkial dangtaak luatna hangin Zomite mitampi takin i itmahmah ipianna Nu’ te’ nusia in, sumleh paai muhna a awlzawkna gamte ki zuanta a, ahizongin sumleh paai i awlmuhzawk teei hang i itmahmah iNute tawh ki khen ihih manin, i lunglen ikhuangaihni zong ong tam veve hi.

Tubangmahin Nute zong a kum uh zong ong tam sem sem uha, Tate vakkikdi mah lamen leh lunggulhna nei uh ahihman in, kaci kasamah apiang kata ci’n itpi pi mah in gamdang summuhna awlzawkna gamte ah na paiding ong khaktanlo a,i paikhitteh bang mah ong genlianloh hang sun kimtan’gpeuh in nidanga na lupna khan ah utin na neekten puansilhlui te en enin akhitui uh ana nul nul na himawk uhhi.

Sianmang itna lo ngal simlei tungah ka Tuunnu’ ong itna mah lian pen ka ci cihi. Ka mang ngelhtheihloh ka neu a, kipan ka dampha het kei a, nitak ka Nu’ lokhuan vaai ong tung leh ka lupnakhan ah ong lut phei-in kata na nuam tuam na? ong ci a, khuaul gim nam pempamin sunthapaai lokho singtu giming tawling ciloin ka lutaang ong meksakmah nuam kasapen pen aa, tuni ciangdong ka damlohtheihteh ka Nu’ khutma ngai-in ka khasiatni tam pha mahmah lai hi, gamdang khuapi sungah cimek siam akicite sum tampi pi ka piaksangin ka Nu’ ong mekmah nuam kasazaw tham tham aa, sum piakhat zong ong ngen neilo lai ahi hi.

Kanu tawh phone kakiho uhteh ka damlohna te ka gen ngamlohhangin” Nangzong damhetkei mawk ci’n zoto mah ah ki lak tanghtangh in aw ” cih kammal ong vaaikhakden aa, lamdang kasa mah mahhi.

Nidang aa, ka Pa’ ong kam vaaikhak ngei “Na Nu’ uh khasiasak kha peuhmah kei unmaw na neu lai vua sathem nengnokhat agawltungsa nangawn awkkha kik in ong muatsa nahi uh aw” ong cih kammal ka belkha in Nute ni ong tu’n ciang ong phawk sak zelhi. Ki damlo, tun dampian ta dammawh kaangkuan gonghthak cih khat ong omleu leu saduhlua, sasehlah leizolo khawisa Ak gawhdinglah innkuan aa, nekkhop ding agawhtak zong neilo, ei dammawhte ading a, agualnokhat ong gawhsak Nu’ ten agil ong bawlsak, anek tatensi!

Mitampitak in kei Nu’ neinawnlah hilo ing aa, ci’n Nute ni thupit ngaihsutlo uhhi. Ahizongin Nu a nei nawnlo ten zong thupit bawl veve leh ka utmahmah hi. Banghanghiam cihleh? Nu’ omlopiaa, i thupi bawlna in itna leh zahtakna man hia, Nu’ te ombek aa, hihlop lopna in aki neih mawktawh kibangzaw hi. Zomi sungah ih Nute ih biak Pasian in thupha ong piak sak henla, cidamna thupha leh khansauna thupha ong piak sak kim ciat tahen. Thanglam Pau