US gamsung Oklahoma State sungah palik nasep asemkhat ahi Oklahoma City Police Officer khat numei vaitawh kiman a, thong kum 263 sung kiading cihthu Reuters News pan kiza hi. Hih Oklahoma State pen US gamsung ah Zomi te atampen ateen nading in aki ummawh State khatzong ahihi.
Tua thong kum 263 akiading Police Officer pa minpen Daniel Holtzclaw hi a, kum 29 bek phapan hi. Palik asep hunsung in numei 4 buan ngei a, tuabek thamlo ama Duty hunsung in numei dang tampitak phinkawikawi ahih manin, thong kum hizahtak akiading ahihi.
Nungkum December khasung inzong hihpa pen thusitna kinei ngei khin a, numei bawlsiatna, buanna atuamtuam nam 36 tawh mawhna akizonlak ah 18 pen kician mahmahkhin hi.
Tua hi a, tukumsung in thusitna kinei leuleu a, ama bawlsiat athuakkha te in genkhiatna tawh kizui in District Judge Timothy Henderson in mawhnadaan kum 263 thong kiading in akhentat ahihi.
Hih palik pa hangin anuntakna asiatlawh numei tampitak om a, “I so desperately want my life back — the life I had before he took it away” ci’n abawlsiat numei telak ah khatin khasiattak in genkhia ngeungeu hi.
Atamzaw abawlsiat numei tepen December 2013 kumpan June 2014 kikalsung hi a, abawlsiat numei te pen mizawng te hiphadiak hi. Oklahoma City sung aom African-American numei te tampi abawlsiat lakah kihel cihzong thukhen te in genkhia hi.
Mi cimawh dongtuak te ahuhding bangkek in na luppihsuak pahpah hihtuak hi. Amawhna lianlua ahih manin kum 263 thongdaan atuak hi a, kum 263 anuntak nawnlohding hangin asih khitciang nangawn in akha pen thong kiasuaksuak lai dinghi. ZD Sawltak #zomidaily
Comment piaknop aomleh...