10/
Nu le pa gei ah na om ciang a gensa thute ong gen kikkik ciangin “ Nong gen khin ve. Cimtak kei ta hang ei. Lohngah kei ta ing e” ci kha kei in. Thei nai kei teh cihna hi lo a, a gei ah na om ding a ut luat manin ong hopihpih hi zaw hi.
11/
Nu le pate in “ Ka ci dam mahmah e. Ka hek nuam mahmah lel” ong cih ciangin aw leh ci in nung hei pah het kei in. “ Na ci na lu dam sak in la ong tha hat mahmah in” ci in a gei ah tu in la, a khut a khe khawng zawtzawt lecin, a thuaklah vilvel natna le thu pawlkhat ong genkhia pan ding uh hi.
12/
Nu le pate in khuasung vakna a neih ciangin nung zuih kawikawi zelzel in. Alawm le gual lakah kipak mahmah uh a “ Om kei leng ong kankan pong uh hi veh aw” ci in angtang mahmah uh hi. A lungsim uh zong khalum tuam kisa takpi uh a, lungdam sim giugiau lel uh hi.
13/
Pilsinna le nuntak zong dingin “ Va pai in” ci in nu le pate in ong tawsawn uh ciangin amau lunggulhna hong gen sa kha kei in. Amau utna taktak ahihleh tute tate tawh kikhawl liailiai den ding cih thu ahi hi. Tate pil ding, khangto ding mainawt deihluat manin lunglen khuangaihna thuak ding nangawn kihta zo loin ong sawlkhia uh hi zaw hi.
14/
Inn pan na zin khiat ciangin “ Inn lam lung himawh ken la, na ma hong khuat in.” ci in kam hong vaikhak tautau hangin na zinkhiat ni a kipan innlam na mangngilh khak ding patua mahmah uh a, inn na tunkik kal ding ngaklah mahmah uh hi. Amau mahmah lungleng khuangai in ong phawkluat uh ciangin na nik na puan le na vanzatte khawng phekzel uh a, na lawm na gualte khawng a muh uh ciangin “ Mualmong meikhu zong nuam tuam” a cih bangin na vaang nuamtuam sa in enen kha liang uh hi.
15/
Innlam ah sum le pai na khak ni ciangin “ Lungdam taktak ing ei. Nuam mahmah ing ei ka ta” ong cih ciangin um pah kei in. “ Kisam le kul nasak bangin na zang un. Na duh bangbang na lei un” na cih theih ciang bekin lungdam takpi pan uh hi. Sum zatna khawng na dot gaihgaih khak zenzenleh a neksate nangawn uh luakhia kik nuam zaw uh hi.
16/
Nu le pate in tuahphatna le lawhcinna bek a lam en den sa kha kei in. Guallel lungkia in tuahsiatna kawmkal pan “ Nu aw pa aw” ci in na sap ciaiciai ciangin, tua aw-ging in nu le pa bil ah a khum penpen khuaizu bangin khum a, lungsim sukha in nosuak sak hi. Innkuan ki it dimdiam in thu kikum diamdiam peuhleng “vangam malep” hi lel lo hiam ci in thathak la in apumpi uh thakhauhsak zaw lai hi. Na hi bangbangin amau kiang na pai pen hampha kisa mahmah uh hi.
17/
Nu le pa gamtatna leh sumzatzia khat peuh ah nang lungsim tawh a kituah loh manin “ Sum zon baih lo pi, hih banga zat dingin ken sum ong pia zo nawn kei ning” ci kha het kei in. Tu le tate mit-hek en giaugiau sa in nuntak likliak pen na sa mahmah uh a khasia mahmah uh hi. Hih bangin nuntak limliam pen tate ading van-gik pi hi lel ka hiam ci in lungleng khuangai in nuntakna cimtak lel uh hi.
18/
Khualzin na tun ciangin “ Gim ni teh tawlnga in. Lum baih in” ci in ong sawl ciangin “ Hi ei, tawlnga nuam mah ing ei” ci pah kei in. Na zin na vakna le na vai tuamtuamte thei nuam za nuam lua in na nek ding le na lupna ding a bawl kineih in na gei ah ong kinelnel ahih lam phawk gige in.
19/
Khualzin na tun ni nitak vak nading na gel ciangin “ Va pai oo, va pai oo. Pai ding kilawm mah ei” ong cih uh ciangin um pah kei in. Nang gelna ong khak tan nuamlo bek uh hi a, amau tawh om zaw lecin ut mahmah uh hi. Na gen peuhpeuh za nuam lua in ong vilvil liang uh hi. Nitak na vak khiat ciangin zong ihmu cip heh loin lupna tung pan inn na tun kik ding ong ngak gige ahih lam phawk gige in.
Lian Tuang
Lianbawi says
Thupi lua ciai…sia….thu tel tatak ciai….nuleh pa leh ta te kikal….lungdam ei….ong hawmsaawn zel o…a theilo ki tammahmah lel in teh…