It theihding kisinhuai ~ JK Kam

It theihding kisinhuai ~ JK Kam

Naupang kepna sang (Nursery School) khat ah a siama in a naupangte tawh kimawlna (game) nam khat kimawl pih ding in gel hi.

Tua pen banghiam cih leh! a sangnaupang khempeuhte kiangah ” sang nong pai sim un aalu (potato) a kiguang ip neu khat ta hong keng unla, tua ipneu sunga aalu pum te tungah mi na muhdah mahmah uh khat ta i min at ding hi uh teh!” ci in vaikhak hi. Aalu pum bangzah hong keng cih tawh mi muhdah bangzah nei cih a ki thei ding cihna hi gige hi.

A zing ciangin naupangte sanginn hong tun kik uh ciang siama in a thungkuah uh a et sak tek a leh pawlkhat in pum 1 bek hilo in pum 2, pawl khat in pum 3, pawlkhat in pum 5 bang a pua zong om uh hi. Siama in ” Hih na aalu te uh koi mah ah suah khia lo ding, na pumpi uh tawh kikhensak lo ding hi uh teh, an na ne uh a ekbuk na pai uh zongin kuaman suah khia theilo ding hi uh teh, kal khat ( ni 7) sung na pua tek un” ci in vaikha hi.

Ni pawlkhat khit ciang sangnaupang pawlkhat in siama nu kiang ah hong phun ngeingai ta uh hi. ”Aalu te muat ta aih ciang a uih lua hi ven” ci uh hi. Pawlkhat te ciang Aalu pum 5 tak pua kha ahih uh ciang a gik lah gik zaw uih lah uih zaw phadiak hi, ai zong kalkhat a cin ( siama i kamciam a cin dong) mah pua keeikaai kha uh hi. Uih sa le kihhuai sa pipi mah in kuah keeikaai uh a a sawtsawt ciang a uih phat mahmah laitak mah in nipi khat hong cing a hih manin siama in ” Tun na aalu ip uh paikhia thei ta uh ciai” ci ziau lel tak hi. Naupangte pawlkhat vanzang kisa, suakta kisa in a nuam mahmah kawm in, pawlkhat in ” leltak aw” a ci a phun nuam zong om tuak hi.

Siama in ” Hih aalu ip na puak uh hamsa na sak dan uh hong gen tek vuau leh” ci hi. Sangnaupang ten zong aalu uih a puak thapaihna uh a gimna, kihhuai a sakna, a sanggam a nu le pa mai ah a mai noplohna teng uh pulak zuahzuah tek uh hi. Siama in ” Uih la uih gik la gik hih aalu ip kuan puapua nuam mah ding i hia mete!” ci in, hih kimawlna a kimawlpihna a hang hong gen hi.

Na thuak uh gimna le haksa na sak na te uh pen bang tawh kibang hiam cih leh mi khat peuh na muhdahna uh pen na lungtang sung vua na guan kawm a lam a paipai a nungta nuntakna tawh kibang hi. Aalu uih pen ni 7 sung bek puak ding nangawn hamsa na sak uh tawh ngaihsun kak dih sin vua le” ci hi. Muhdanna pen na lungsim sung uh ah koih in na khangtawn uh hi bangin a nungta ding hi le uh cin bang na ci uh tam?

No a ding in a hamsat mahmah bangin midang a dingin zong kihhuai mahmah zaw kan lai ding hi. Tua ahih manin muhdahna pen na lungtang sung uh pan a manlang theipen in paikhia un” Na khangtawn un hih a kihhuai muhdahna puapua nuam nawn kei un, muhdahna paihkhiatna pen mawh maisakna hi a mihing lungsim puakzia pan a manpha penpen a hi hi. Hong mudah te a hi a na muhdah te a hi zong it bawl un.., itna cih pen mi hoih mi kicing te bek itna hi lo hi, a ithuailo te nangawn it zawhna a hi hi…,”

Muhdah a thuakte sangin a mudahte gimzaw a hamsia zaw a hih manin muhdah i neih khak a om le zong a manlang thei penpen in i muhdahna paikhia le hang ei a ki hampha zaw ding na hi gige hi.

Hi lai a simkha khempeuh tungah Pasian hong piak ki-itna tawh mudahna a khekzo dingin Itna Pasian in Itna thupha hong pia kim tek ta hen…,

Deihsakna tak tawh

JK Kam
ITNA LEIBA