South Korea leh North Korea gamnih kizopna zumpi kikap zan

South Korea leh North Korea gamnih kizopna zumpi kikap zan

South Korea leh North Korea gamnih kizopna dingin a kizang Kaesong khuapi a om innpi pen North Korea in tuni-in kap zan hi, cih thu kiza hi. Hih zumpi pen Covid-19 hangin a kikhak hi a, North Korea lam panin USA leh North Korea kihona ah South Korea palai nasepna gina lo lua hi, ci-in lungkim lo uh ahi hi.

North Korea in hih innpi a kapzan dan limlak leh video pawlkhat South Korea lam panin khah khia uh a, mulkim huai takin puakkhamsak uh ahihna leh a kapkhap khit uh ciangin vantung lamah meikhu kizial bibiai kimu thei hi, ci uh hi. Nung deuh mah in President Kim Jong-un sanggamnu Kim Yo Jong in South Korea thuhilh ding kamkhauh pai ngei hi. A sawt loin North Korea in South Korea tawh gamgi lamah galkap honkhat puak ding, ci-in gen a, South Korea in zong North lam pan gal hong phuan uh leh kikoih khong het lo ding hi, ci-in thuk kik hi.

Video: North Korea Bombs Building Used for Talks With South Korea | NowThis

South Korea panin North Korea tawh kizopna Palai Suh Ho in hih bang gamtatna pen gamnih kikal bek hi loin leitungbup adingin zong hai gamtatna khat hi, ci-in gen hi. Nung kalin North Korea in South Korea tawh kihona leh kizopna khempeuh ka dinkhawl uh hi, ci-in tangko khin uh a, tua tawh kizui-in hi bangin kizopna zum innpi tuni a kapzan uh ahi hi.

UN Secretary General Guterres leh ulian dangte in a lunghihmawhna uh pulak tek uh a, Nuclear tawh kisai kamkupna pan deih danin vaite hong lem semsem lo ahih manin North Korea kumpi hehna khangsak hi, ci uh hi.

More: Luankhi nul-in tuunnu itna “Nu aw hongit ing” (Korea gam thupiang)

Tuni a kikapzan gamnih kizopna innpi pen 2018 September kha in South Korea in $ 8.3 million bei-in gamnih kizopna a hatsem theih ding lametna tawh a lam uh ahi hi. North Korea leh South Korea pen 1945 kum pawl pan kipan USA in South lam gumin Soviet in North lam gum uh a, 1950-1953 sung teng gam nih galkidona lianpi piang ngei khin ahi hi. Hih galkidona ah American galkapte 40000 val si uh a, tulza val in liamna ngah hi. Galkap leh mipi a si kigawm 1,200,000 pha hi, ci-in kiciamteh hi. Source: AP, BBC, The Tedim Post