Nunghei masa leng! ~ Dimno’ Pa

Nunghei masa leng! ~ Dimno’ Pa

Khat vei nitak lam nasep man khit ciangin khuasung ah van kisap pawlkhat lei dingin lawmte khat tawh kapai uhi. Khuasung panin van leidingteng ka lei mengmeng uh a, tua khit ciangin lam paina kigim simpian tawh lamsak ah niangtui sai ah niang dawn dingin ka tu phei uhi.

Dangkeu pian hiding hiven, niang vaikhak in hong tun lian leh dawn khat suah in dangkeu hong pha zo nailo ahih manin tui (Mineral water) thawl khat tuak vai khak beh lai ungh. Khuazing khit zawh ah khe tawh ciah ding ( ko omna lam ) pen lampi ah lauhuai thei ahi manin sauvei tu ngam nawn lo-in kapai khia kik pah uhi.

Tawl khat kapai khit uh ciangin ka tuidawn uh tamsim pian hiding hiam zun hong suak pah teta mawk hi. Zun thak nading mun lem om vat lo-in, tua bang teng tawh iip toto lai ungh. Ahi zongin lamkim ding khawng ka tun uh ciangin hong piang theih nawn mahmah lo-in zunthak nading mun lem kazong uh-a, thakna ding munlem om tuan lo veve na pin’ piang thei nawn mahmah lo ahih manin kalawm tawh lam nawn ah peek mai ni ka kici uhi.

Zuntha dingin ka bombitual zip ka hong khin ta-a, tua le ka nunglam ah mi gamlum simpian kaza hi. Ka lawmin zong hong paupih phei a, “ lawm i nung ah mi hongpai ahia leh gamlum si e,” hong ci-in, kanung heivat leh Sente nupi papi hon khat ka nunglian vuah kigual phei deudau in, a hongpai phei na hi mawk! Keizong a bangci himawk ding ka hiam tua lian leh ka zun suak mahmah napi’n pai thei nawn lo mawk hi. Deih tak kisal in thak sawm ta leng pai thei tuan mahmah lo-in, kanung a mihonte lah paipai lai uh! Ka ki hinhin hangin pai thei tuan nawn mahmah lo ahi manin ka khawl bawl ta mai hi.

Kalawm aman ciangin ka nungpan a hong nawk sen mihon teng a zintun na-uh atun ma-in ka delh kik a, ka sim leh 40 khawng tak na pha uh-a, hih teng tak in ka nungpan in hong nawk mawk ahi ciang a, kazun apai thei lo ahi ta ve maw kaci pong mawk hi.

Khanglui te-in, “ Nupi’ nung hei lo- a veihpeek” acih pen kei tawh ka kibang tam maw kici ingh! Bangzah takin zun suak in, dailen a suak phial zongin i thak manin inung ah kua om a, i kiim i paam ah mi aom tam cih khuadak masa leng a ki khial lo ding na hi-in, Khanglui te’n Nupi’ nung hei lo-a veihpeek ana cih sese uh pen hih ka tuak dan, lah maizum buang, lah kisuang buang ahih hang lah ki lakik thei tuan lo cih dan khat ahi tam maw ka ci hi. Nunghei masa hi le hang maizum na leh nop mawh loh na ding a om lo ding na hi mawk!

Khuapi ah i om-a, khuata ah i om zongin vai khat peuhpeuh ah cil i sia aa, veih i peek in, khaksawh i sai phial zong i hih ding ciangin i hih ma-in i kiim i paam khat vei en masa phot in, nung hei masa phot leng ci ing ei! Tu phinphin in….. bY, Pau Khan Kap (Pyidawtha, September 16, 2011)