Christian Hymn te’ tangthu: Pasian’ Bawlsa Khempeuh Inah

All Creatures of Our God and King (Late 145)
St. Francis of Assisi (1182-1226)
Music from the Geistliche Kirchengesang of 1623
English translation by William H. Draper (1855-1933)
Arranged by Norman Johnson (1928-? )

I sak cianga i lungsim hong lawpsak den hih la bel pawlpi tangthu sunga mi minthang mahmah Francis of Assisi in 1225 kuma a phuah ahi hi. St. Francis of Assisi ci-a kitheizaw Giovanni Bernardone bel Italy gam sungtengah vak kawikawi-a Pasian’ thu gena mizawngte a huh den medieval monk khat ahi hi. Mystic khat zong ahi hi.

Italy gam Assisi ah 1182 kuma suak hi a, a khangno lai-in galkapin om ngei-a tawlkhat sung a zulhtat mahmah khit ciang, a kum 25 a phak ciangin a nuntakna kikhel-a a sepna khempeuh Ama’ ading ngaihsun kilkel lo-a nungta Zeisu Khazih bangin nungta-a Pasian’ na bek sep ding tup lianpen-in nei hi. A nu a pate mihau hi napi-in Francis in tua leitung nate thupisa lo-in a goutanh khempeuh nolh hi. Nuntak nadinga kisam lianteng bek zangin Khazih’ taangmi khat bangin kingaihsuna vak kawikawi hi. Kum 28 a phak ciangin Franciscan Order of Friars phuan-a, ama’ nuntak banga nungta pasal khangno tampi leh numei pawlkhat in pawl uh hi.

St. Francis in Pasian’ bawlsa nate (nature) it a, Pasian’ bawlsa leitung vantung nate ah Pasian’ khutma mu thei hi. Tua hun lai-a lim kisuai minthangpen khat bang ci lehang St. Francis in vasate an a piak laitak lim-a kisuai ahi hi. Giotto’ suaih ahi hi. Tuni donga minthang a khangno lai-a a thungetna hibang ahi hi:

• Lord, make me an instrument of Thy peace. Where there is hatred, let me sow love.
• Where there is injury, pardon. Where there is discord, unity.
• Where there is doubt, faith. Where there is error, truth.
• Where there is despair, hope. Where there is sadness, joy. Where there is darkness, light.
• O divine master, grant that I may not so much seek to be consoled, as to console.
• To be understood, as to understand. To be loved, as to love.
• For it is in giving, that we receive. It is in pardoning, that we are pardoned.
• It is in dying, that we are born to eternal life.

St. Francis’ nuntakna ah a lamdang simsim thupiang kigen tampi om hi. I Topa tawh tamveipi kimu uh hi, ci-in kigen hi. Tua banga a kimuhnate lakah khat bang, La Verne mual sang tungah ni 40 an tanga a om laitak hi, kici hi. Tua huna kipan a khantawnin a khut a khe leh a pumpi tungah i Topa in a liamna hanga a thuak natnate thuak den hi, kici hi.

Hih “Pasian’ Bawlsa Khempeuh Inah” (All Creatures of Our God and King) bel St. Francis’ gelh “Canticles of the Sun” sung pana kila ahi hi. A sih ma kum khat lai, 1225 kum khuakhal nisat mahmah ni khat-a a gelh hi, kici hi. A ci nakpi-in na a, a mit khua muhna a man diaidiai laitaka a phuah hi, kici hi. St. Francis in a nuntak sung tawntung lasakna thupisa mahmah den-a, church music thupi ngaihsut hi. Monastery-a zat dingin hymn dawng 60 val phuak hi. Kum za tampi a bei khit hanga tuni dong a kisasa tua late lakah hih “Pasian’ Bawlsa Khempeuh Inah” (All Creatures of Our God and King) zong khat ahi hi.

William Draper in hih la Mangkamin teikhia hi. Amah England gama village rector ahi hi. Hih la-aw bel 1623 kumin Germany gam Cologne ah Roman Catholic hymnal sung khatah kihel khin hi. Tawlpi khat sung a kimangngilh khit ciangin 1906 kumkin London-a kikhen English Hymnal labu sungah hong kihel kik hi.

Hih la phuakpa St. Francis’ nuntakna ah i tel zawh loh thu tampi a om hangin tuni donga i sak theih dingin Pasian in lamal, la-aw leh Mangkam-a a kiteinate ah nasem taktak hi, cih kimu thei hi. Rev. S.T. Hau Go in ei Tedim mite’ ading a bun mahmah-in hong teisak ahih manin amah a om nawn loh hangin lungdamna mangngilh kei ni.

Rev. Zam Khat Kham
Christian Hymn te’ tangthu 2005