Sum sangin a manpha zaw laibu ~ Deih Tung

Sum sangin a manpha zaw laibu ~ Deih Tung

American gam ah laigelh siam a, a minthang te pen thu pi ki sa mah mah a,gam a ding in zong mimuan te a hi uh hi. England gam ah Laigelh siam te khem peuh thu pi ki sa in ki paak ta hi. Asia gam ah laigelh siam ih cih te thu pi ki sa lo in bang mah in ki mang lo hi. Zogam ah laigelh siam ih cih te bang hiamci in hong ki dong ding hi.

Ka neu lai in ka inn veng teng vuah mi dai hah siang sak, mi inn kim teng puah sak in innsung van hoih lo neng neng te puah cih dan tawh sum zong in ka nung ta to to hi. Ka na sep na te sung ah mi tam pi tak te inn ah va pai in a mau nun tak dan te ka tel muh thei hi.Pawl khat te inn ah na sem in ka om teh tui lim thei thei, an lim thei thei hong pia uh a, nitha zong tam in nuam mah mah uh hi.

Pawl khat te in lopa ka vat dan ding hong hilh a, tua ci tua ci in hong ci om hi.Pawlkhat te inn ah a na mang sa uh inn kim teng siang sak ciang ki mu kik cih dan a tam thei mah mah hi. Hih bang dan in mi nam kim te inn ah vak kawi kawi in inn sung inn pua puah sak ka hih man in mi hoih mihoih lo tam pi tak ka thei a, ki sin kha hi.

Ka nasep na tawh kizui in zong nitha hong piak dan uh zong ki lam dang hi.Pawl khat te in ka nitha a tam thei pen in hong pia uh a, niang tui man ding na san hong piak beh uh hi.Pawl khat te in kha sum san ciang, pawl khat te in sum hong pia lo zong tam pi tak a om hi. Hih te sung ah Pu Penglam zong sum pianuam lo pawl ah aki hel hi. A inn ah na ih va sep sap sim in ih sep ding tam pi hong gen in tua dan tua dan in hong puah sak in, tua mun na siang sak deuh in cih dan in thu tam pi hong gen den hi.

Daivat dan ding a ma deih dan hong gen a,ih man ciang in tua mun na tua ci vat zaw ding hi ven hong ci zaw lai hi. Lopa te pen huang pua lam ah na pai in hong cih pen a ma hong cih na ah ka paih ciang hih lo pa te zong sum suak thei hi ven hoih takin munkhat ah suan leng ci in a hi lo lam lam in na hongsawl den a ki buai mah mahhi. Hong sai den a hih manin nitha tam hong pia dingin ka lam en a, a hi zong in nitha sum hongpia ngei lo hi.

A inn ah sum siik ding in ka va pai teh a lem loh na paulap khat tei tei na nei den keei hi. Tu ni pen sum nen nei keng, mai ah hong pai kik in. A zing teh pai kik ciang tu ni van khat ka lei uh leh sum zat na tam lua inki cing zo nawn kei, zing teh hong pai kik in hong ci zel zel hi. A zing ciang ka va pai kik teh a kong uh ka kiuh leh Penglam om lo hi, a vak lai tak hi cih dan vi ve in pau lap zong den hi.Sum lam tawh ki sai pen nak gen hak lua mah mah a hih man in sum vai ah mi tawh ki lem vet lo hi.

Sum lam ah a gen hak mah mah hang in amah pen nak thu nop mah mah hi. Lam pi ah kimu leng dam maw? Ci inhong ho pih tang tang hi. A gam la ah ki mu leng zong a khut hong lap in, a lu khu hong pei a, hong ho pih veve hi. Ka ngaih sut na ah Penglam pen sum a nei lo hi lo ding, a hang khat om hi ding in ka um hi. A inn kim a lopa te asau kik teh midang te cial lo a, kei mah hong cial zel zel hi. A lopa te koi ah pai ding, koi ci khol ding, cih te khawng a vek in hong sai den a hih man in Penglam huan hah ding pen ka lawp lua khol kei hi. Sum lahki ngah ngei lo a hih man in hoih tak in na ka sep sak nuam kei hi.

Ni khat a inn gei ah ka vak leh Pu Penglam in hong gal sap aw, lawm aw hong hawh inhong ci in ka va hawh hi. A inn sung a ma khaan sung ah hong pai pih hi. A khaan sung ah pen lai bu tam lua mah mah in lai bu bek bek tawh ki dim phial hi. Penglam in ka huan sung nong puah sak sak hang in sum lah hong piazo lo kai teh hih ka lai bu te na simnop te hong kawm sak ning ci in hong genhi. Kei zong hih lai sim dih dih ding cih pen ci in ka lung ngai hi.

Bang bang hi leh Penglam in zong hong deih sak mah mah a hih tak teh ci in a lai bute kawm in ka sim zel zel hi. Tua lai bu ka sim na sung pan in mi min thang te tangthu, thu hoih no no simkha ka hih man in ka mailam nun tak danding, kei leh kei in ka ngaih sunthei hi. Tua lai bute in ka nun tak na hong ki khel sak cileng ka khial kei dinghi.Hih ka lai simna hangin tua huan sung puah sak tha man sum sang in a zah tam pi a manpha ka ngah lawh hi.

Kum tam pikhit ciang pu Penglam tawh ka ki mu kik uh a, koi ah om a, bang sem na hiam ci in hong dong hi. Ken zong ka gen ding dan thei pak lo in ka khua ngai pha kik hi. Pu Penglam aw, na lai bute ka sim na hang in tu in journal thoh na khat ah na sem in lai gelh min thang na suak ta ing. Kei leh kei in laigelh in laibu inka bawl a tua tawh sum ngah in na nung ta thei ta ing.Tu in sum zon an ding in huansung teng puah kul nawn lo in,sum ngah na ding in lai gelh in na nung ta ing, nang ma nong deih sak na hang bek hi, ka ci hi.

Pu Penglam in tua ding ai ve kong deih deih….nidang a ka huan sung khawng nong puah sak sak lai a, nang pen lai gelh min thang ding a kong deih deih….ci in hong gen hi. Nidang a ka na sep na tha man hong piak loh hang in sum tawh teh zawh loh na man pha mahmah ka ngah hi.Tua in banghiam cih leh Penglam in a lai bute hong kawm sak lo in hong sim sak lo hi leh tu dong in mi huan nin teng a sem sem lai ding ka hihi. Hih bang nun takna sung pan inhong lamkhia to…pu Penglam lai bu pan a hihi. …..Deih Tung…..