US pan Pu Lengtong Pauno panpihna sum kikhakkhinta

US pan Pu Lengtong Pauno panpihna sum kikhakkhinta

Zomite labupi Pu Lengtong Pauno innneihzawh nading panpihna sumkaihkhop nading vai ZYA Myanmar Head Quarter in innteekpi dinmun la leh USA gamsung Zomite kiangah ZNTV in tanu semin sum i kaihkhopna tawh kisai mimal, Innkuan, Biakna pawlpi leh kipawlna a kigawmin 397 in mapangkhawm in a sum in $15,679.97 kingahzo ahihmanin i mapankhopna te lungkimhuai leh thangahhuai mahmah hi.

Sum khakna ah ma kongpantheih napen uhhi ci a, sum khekna sangpentawh ongkhaksak leh Sumkhakman Pek khatzong ong lalo ong map kilkel Pu Mangsen leh Pi Suhsuh (Hornbill Oriental Grocery) te innkuan tungah zong ZNTV in Lungdamna lianpi ko leh kiciamteh hi. Hicibanga lawhcinna ingahzawh nadinga State tuamtuam leh khua tuamtuam pana sum leh paai ong kaihkhopsak Tanu ong sepsak khempeuh leh Pu Lengtong Pauno itna lak a sum ong piakhia Zomipih khempeuh tungah ZNTV mintawh lungdamna lianpi ong ko ungh.

Video: LIVE: Lengtong Pauno “A Tamzaan Lungtang” Kum 50 cin Album (1962 – 2012)

Sumte zong Innteek dinmun la a vailianpi ong hawmkhia ZYA Myanmar Headquarter ah kikhakkhinta a, Kawlgam sum in 23206355.60 (Teng za nih leh teng sawm thum leh teng nih leh tul guk leh zathum leh sawm nga leh nga leh pia sawm guk) kikhakkhin a, Hihtawh kisai a sawtlo in ZYA phualpi lampanin Taangkona ong bawl tading uhhi. Tuni i sumkhak hunpen Kawlgam ah Weekend hita ahihmanin sumte maikal nimasa ni ciangin kingah tading hi.

Hicibang in ZNTV muanna taktawh vai lianpi ong ap ZYA Myanmar kipawlna makaite tung lungdamna kongko uha, ZNTV in hibanga vailianpi khat gualzo takin kasep khak man un lungdam leh ka angtang mahmah uhhi. Hun tomno kha khat sunga sumtang hizah i kaihkhopzawh pen Zomite kikhual leh a ki thutuak mahmah minam ihihna ong kilangsak hi. Zomi khempeuh Topan Thupha ongpiakim ciat tahen!