Numei pasal ut a cihte ~ Evan. Suangh Dal
1. Numei Tuucing Sya sem sak cih pen Pawlpite in Lai Siangtho langpang pang ta, lam pialpial ta uh ahihna kician taka a kilang sak pen thu khat ahi hi.
2. Numei khat ii Tuucing Sya sepna pawlpi ah a om suak huai ding hiam? Aw himaw, tua Pawlpi in Pastor a nei lo hizaw ei. Na Tapa zi pasal mah hi mawk leh mo taktak nei lo hong kicih san ding hi ven. Na tanu pasal numei mah hi mawk leh mak nei mahmah tang khang ei, na kicih bang dan ding ahi hi.
A taktakin cile’ng Numei ordination khawng piak ding hamsa a sa nawn lo Pawlpi ah palepa nulenu kitenna (homosexual & lesbian) cihte zong a sawt loin hun zui-in pawlpi mi khat-a san ding, Upa khat-a san ding, Pastor khat-a san ding pen hamsa sa nawn lo ding cihna hi. A ci a kivawh khit nak leh a kung hong po hamtangte pawl bang daan hi ta hi.
3. Numei Tuucing a sem sakte le biakinn sungah numei thuhilh zaizaite pen kipak huai het loin a maizum huai hizaw hi. Lai Siangtho Pasian’ kammal in kiciantak-a hong seh banga zui loin a langpan gamtatna hi-a, hih kalhtang thumanlohna (flagrant disobedience) nam ahi hi.
4. Hih leitungah numeite lam a khial sak penpen mite in numei lapsang kipawlna (feminists) te mah hipah hi. Lam kikhial sak cih pen kimuhdahna lian pen hita hi. Numei kim lai pasal ut sak, pasal zuih ding teng eng sak. Numei zuih ding teng ut nawn lo sak hi ven. (Numei pasal ut cih pen sam tom met, longpen teng, Nik deih lo cih namte bek hi loin, Nik teng kawm sa mahin Pastor sese na ut leh tua zong numei pipi pasal khawng peuh ut cihna hi zaw kan lai hi. Pasian’ hong seh banga ut lohna pen mawhna lian mahmah khat ahi hi.
America bangah tulaitak “Me too” cih khat kipaksak mahmah hi. Me too cihte kei zong, ei zong, cihna hi-in Miriam in Mosi langpan in ei zong hih thei hang cih dante pawl hi. A maan lo lampi ah hampha kisakna (women right) hanciamna pen numeite upkhialhna a guan ahi hi. Lutang (head), Pawlpi tuucing (Pastor) cih pen pilzawk siamzawk tawh kisai thu, numeite in zong hih thei uh cih daante pawl tawh kisai lam, kei zong Me Too cih theih ding namte hi het lo hi.
LST sungah pasal pen lutang (head) ahihna thu, Pawlpi tuucing (Pastor) ding pasalte bek ahihna thu Paul in kician takin hilh hi. Lutang tum ta sese kei lecin, nau luai a vei khut in leitung uk hi a cih bangin Pasian nasep nading mun tampi om hi.
Numei pasal utte bek hi loin numei pasal utte a panpih mite in LST ii hong hilh i kibatlohnate kideidanna bangin a muh det keei hang uh ahi hi. They see roles as divisive, distinction as discriminatory. Tua ahih manin Pawlpi Syate in thu i hilh, tentaan i piak ciangin tua banga kibatlohnate kideidanna ahih het loh lam ih hilh ngei kei leh numei Pastor sem thei lo, lutang suak thei lo cih bek ziau tawh bel hong kitel khial thei ding mah ahi hi (Distinction is not discrimination).
Banghang hiam cih leh tulam semsem teh leitung pen LST tawh kituak ahi het lo tanbang kim sak (Equal Right) thuhilhna in hong deep mahmah ta hi. Thumaan kihilh theih ding hamsa mahmah ta-a Thumaan tawm kigen leh khoih kha baih lua mahmah ta hi. (Truth hurts).
Lai Siangtho in hong hilh bangin Khrih sungah i dinmun (status) a kibat hangin i panmun (roles) kibang lo hi. Pasalte zuih ding, numeite zuih ding a tuam tek mahin a om hi cih thu phatakin hilh lecin numei mudah deidante (misogynists) cih bangin mipi tel khialh dingin hong bawl lai ding uh hi. (Preach biblical gender roles, and you will be called a misogynist.)
Mawhna tawh kisai ka gen ciangin palepa kitenna (homosexual) le nulenu kitenna (lesbian) bekbek tawh ka gentehna pen Zomite sungah tuate gel baih takin mawhna kisa ziau thei lai buang sam ahih hanga hong zang mun ka hi hi. Tua na ngawn Mikang gamte ah mawhna kisa nawn loin kimawh sakna bekbekin kimu ta hi. Tu in, numei pasal utna pen mawhna hi ci-in kong gen hi. A hamsa lua ta hiam? Hong sukha lua ta hiam? :-
1. Inkuan sungah Numei lutang ut lo ding.
2. Pawlpi sungah Numeite Pawlpi kem Sya Church Pastor ut lo ding. A ut lo khat zong a ut dingin seh tantan lo ding.
3. Pawlpi le i kipawlnate in zong Zawng khua phawk lo phawk sak a cih bangin Numeite pasal ut dingin pattah ding hi lo-a Tuucingza (Ordination) zong kiguat kul se lo hi. Utna diklo, utna maan lo peuhmah mawhna hi-a, tua banga a ut dingin kipattahna, kiguatna zong mawhna hizaw kan lai hi. Ordination pen lutang za guatna hi. Ordination entails headship.
Kibatlohna pen kideidanna hi lo hi. Pasalte bek lutang hi thei hi ci-a LST in hong hilhna pen tan bang kikimlohna hi lo hi. Hih kibatlohnate kideidanna, kikimlohna a sa sak thuhilhna in Numeite pasal ut sak semsem hi. Puanten bek teng nuamte pasal ut hi loin, Nik teng kawmsa mahin Lutang Church Pastor a utte zong pasal ut hi zaw kan lai hi. Numei pasal utte ka cih, Evan. Suangh Dal
Comment piaknop aomleh...