7.10.2014 Tuni Leitung thuthang te

7.10.2014 Tuni Leitung thuthang te

.Zani in Thai gam a om Kawlgam tanzum( embassy)te leh Britain mi nih that hi ci a aki mawhsak kawlgam minih te va ki muthei uhhi.Hih mi nih te pen Saw leh Win ci in kisam a,Rakhine mi nam hi in, a khua uh pen Rakhine state Kyuak Phu Myo ah teng uh cihi.Hih ki muh na a, agen na uh ah Thai kam let pa in ( leading question) dawng loh thei loh ding dotna te dong hi cihi.Hih mi nih te pen tu ma in zong DNA asit khit uh ciang akhah khitsa te hi in, tu tung a thu dot na ah pen Palik te leh Kamlet pa ii tup leh sat nate thuak uhhi.

Hih mah un a cih kei vua leh amau a ding lauhuai zaw ding cihi.Amau ii cih bang in a gen kei vua leh, electric tawh hal cih akipan vau uh hi cihi.Hih bang a thu piang hun in amau pen tua kim ah zu kham in om tuak hi.That mah in a ci masapa pen Palik te in athu sit lai un sat uh a, kam let pa in abil ngei li vei tup sak hi cihi. Alawm pa khat pen Palik te in a awmpi livei tupsak ci in Kamlet pa in zong tum cihi.Hih minih te in amat tung lam un bang mah genlo a,Thai police te in abawlsiat gawp uh ciang in ka that uhhi ci in a gen uh a hihi ci hi.

.IS te leh Kurdish te in Syria gam Kobane a kido na ah numei khat in bomb tawh puakkham a kisih sak khawm na ah IS te a sawm lom in si hi cihi.Hih numei pen Syria kumpi lang do Kurd te galkap ahihi.Amah penkum 20 val apha numei khat hi in, Kurd min in Dilar Gencxemis ci in kisam hi.Hih pen Kurdish te ii galsim na akhat vei na cihi.Kobane khua kim ah nakpi tak in kikapna om a, US leh akipawl pihte in van lam tawh kap zel mah ta seleh tua din mun ah IS te tha hat mahmah veve uh a, Kobane khua zong lazo ding in lam en uhhi.

.US gam mi kum 19 apha Mohammed Hamzah pen Illinois state pan hi in IS te tawh kipawl a nasem khawm ding hi ci in FBI te in Chicaco international airport O’Hare ah man uh hi.Hih thu tawh kisai in thukhen mangte zum pan in agenna ah Chicaco pan in vanleng tawh Vienna khuapi ah pai sawm in, tua pan Istanbu khuapi ah paisawm leuleu hi cihi.Hih thu tawh kisai in mawhsak nate aman a leh kum 15 thongkiat leh $ 2.5 sang ( lakh) liau thei ding cihi.

.Tukum nobel prize pahtawina kipiakna ah zatui lam tawh kisai in mi thum ki pia hi.Tua te pen US a suak Britain mi John O’keefe, Norway gam mi May -Britt Moser leh Edvard Moser te ahi uh hi.A muh khiat thu te pen khuak in koi mun koi mum pan in ih pumpi mun tuamtuam te ah koi bang dan in nasem hiam cih tawh kisai te mukhia uh a hih man in hih nobel prize pahtawi na a ngah uh a hihi cihi.Hih bang in kumsial a kipia nobel prize pahtawina piakna pen Kum 1901 pan 2013 ciang dong 561 letsong( award) kipia a,pasal 806 in ngah in numei 45 in ngah hi.Akhang no pen kum 25 hi in Lawrence Bragg hi in 1915 kum in physics tawh kipia a,akhang ham pen Kum 90 hi in Leonid Hurwicz hi in Economics tawh kipia hi.

.US gam mi Ashoka Mukpo pen US ah Ebola natna anei 5 na ahihi.Amah pen NBC thuthak kai khawm in Leberia gam ah nasem ahihi.Hih bang a natna neih na hang a US ah kibawl ding in ciah ahihi.

.HongKong ah kal khatval lungpho laakna nei sangnaupang makai te in amau deih bang a kalsuan thei na’ng kumpi te tawh kikup na’ng ah zuih ding thu pawl khat bawl uhhi cihi.HongKong Sangnau pang makai Lester Shum in Mondayni a kikupna ah kumpi thu nei te leh sangnau pang makai te ki muh khop na ah kikup ding in thu khun te ki bawl khin hi cihi.Tuesday ni ki muh khop na ding ah kumpi te in sangnau pang maikai te i deih na te bawl thei ding in lam en uhhi cihi.

.Tukha ni 8 ni in khapi sisan suak ding ci uhhi.Hih thu tawh kisai in LST siamte gen na ah hun nunung a hilh kholna te khat tangtung hi ding in lam en uhhi.Kha pi pen hong mial masa phot ding a, tua khit ciang hong san ding cihi.Oct.8 ni pen Jewish te ii buk pawi( feast of tabernacle) hi in, tua ban ah 4 April 2015 ciang om leuleu ding cihi.Tua ni pen zong Jewish te ii Paisan pawi(passover) ni tawh kituak cihi.Hih ni te pen Jewish te ii ni thupi ni tawh ki tuak ahih man in lamdang kisa hi.Hih kha pi san pen zing lam 3 am kim in ki mu thei ding in lam et uh a,Australia leh Pacific tuipi gam kiim te in mu thei ding cihi. Ref: star paper, bbc,voa,afp,Jews news – Cin Ngaih