Coronavirus: EU adingin Italy gamah asi tampen

Coronavirus: EU adingin Italy gamah asi tampen

May 9: European Union (EU) ah Covid-19 virus hanga si hi ci-in Italy gam-a a kiciamteh 30,000 val ta ahih manin EU adingin a si tam pen hi. Zanhal in Italy ah hih virus hanga si mi 274 panin zan in adang 243 sih beh kik in a kiamsuk hangin a kigawm in mi 30,201 si ta hi. Italy gam-ah Covid-19 positive case thak kiam lam manawh in ni khatin mi 1,327 in a natna ngah thak ahih manin Covid-19 total cases 217,185 pha hi.

Italy gam-a county omna kiimte ah hih ding leh hih loh ding gakna;thukhun (restrictions) a kineemsak hangin Milan khuapi dinmun time “bomb” hi lai hi ci-in doctor khatin ci hi ci-in local media in gen hi. Covid-19 virus hangin leitung bup-ah mi tam a sih penna US ah 78,616 si ta a, Italy ah mi 30,201 si ta ahih manin Covid-19 hangin official a si in a kiciamteh lak panin a tam pen thumna hi.

A nihna dingin tu kum bul in EU panin a pusuak UK gam-ah 31,241 si ta a, Europe adingin a tam pen thumna dingin Spain ah 26,229 si ta a, a tam pen lina France gam-ah mi 26,230 si ta hi ci-in Wordometer data in ciamteh hi.

Italy northern regions ah Covid-19 virus a kizelh khit Europe adingin lockdown order masa pen koih uh hi. Lockdown measures/restrictions pawl khatte kilakhia in kikhahkol a, amasa penna dingin physical distance rules a zahtak peuh uh exercise (pumpi kisawi zoina) a kiphal banah social distancing ding a hamsatna munte leh muk leh nak tuammna masks a zat dingun phalna kipia a, amau ten’na kiim-a a tanaute uh a veh theihna dingun phalna kipia hi (a lawmte kiangah a hawh ding uh bel kiphal lo hi).

Catholic churches tuamtuamte in zong May 18 panin Mass neih kik dingin kithaei uh a, ahi zongin social distancing khauh a om banan biakna piate in face masks a bulh uh kul ding hi. Biakna dangte in zong biak piakna a neih ding uh phalna kipia ding hi. Tua hi napi-in schools, cinemas leh sumbuk a tam zawte a kikhak lai banah mihon kikhopna public gatherings kikham lai hi.

June kha panin bars leh restaurants customer-te sabuai (table) ah a tut ding uh kiphal in kihong ta ding hi. Covid-19 hangin restrictions a kikoih veve hangin social media panin videos leh maan kikhahte ah distancing rules a thudon se lo leh protective masks thuah lo tam kidawk mahmah ahih manin mi tampi thangpai sak hi.

Milan khuapi-a Sacco hospital a head of the infectious diseases department, Massimo Galli in La Reppublica newspaper kiangah, “Lockdown order a kineemsak manin buaina piangsak kha ding hi. Covid-19 virus ngah hong kibehlap kik hi,” ci hi. Coronavirus commissioner Angelo Borrelli in a virus hongkhauhpai kik leh a dalna dingin containment measures thukhunte kikhauhsak kik ding a, lim takin ki-encik lai hi ci-in Thursday in mipite tungah zasak hi.

Rome khuapi-a police-te in tuipi pang, bnual leh khamtung gam-a khualzin mite hawh nopna munte (coast, lakes and rural tourist spots) zuatna lampite ah nung kal bei kuan a kipanin checkpoints kiban koih hi ci hi. Zan hun a kizatna nightlife mun minthangte zong lim takin ki-encik hi ci hi.

Milan Mayor Giuseppe Sala in Friday in Milan khuapi sunga mun min nei Navigli kiim ah face mask bulh lo leh social distancing maintain lo mihon – tuate lakah a tam zaw khangnote maan leh footage social media ah a kizelh khitin hih banga gamtatna pen maizumhuai hi ci a; action ka la ding a, Navigli area kiim kikhakcip ding hi ci-in hunciam (ultimatum) pia hi.

More: US ah Police khat kikapliam, Police te’n zong mikhat kaplum

Italian government agency in lockdown measures a kineemsak manin sum hamsatna thuak cash-starved tourism industry ah mafia organisations hong lut ding hi ci-in warning pulak hi. Covid-19 criminal infiltration monitoring body in a report ah, tourism leh catering sectors ah hamsatna piang ding ahih manin loan pia-in a netum nuam loan sharking kicite khut sungah a awk khak ding thubaih hi ci hi.

Mafia groups tuamtuamte in haksakna thuak businesses lakah hotels leh restaurants cihte a man lopi-in sum ngah (laundering money) theihna ding ngimna in investments hong bawl ding uh hi ci hi. Sources: BBC and Worldometer @ Thang Khan Lian #ZUNs