Khris sungah omni ~ David Tuang

Khris sungah omni ~ David Tuang

Kei sungah na om uh a, ka thu in note sungah a om leh, na ngetpeuhpeuh uh na ngah ding uh hi. Johan 15:7

Thungetna ngah theih nading thusim in Khris sungah kiptak a, omna ahi hi. Thu-um mite in i nisim nuntakna-ah Pasian thu/kammal Lai Siangtho sim in, lungngaihngaihna tawh Pasian’ nai-a, ama sungah i om tawntung ding kisam hi.

Tua bangin amah tawh ki nai semsem le hang, eite’ deihna leh i thungetnate in zong ama deihna leh ama geelna tawh kituak sem sem ding hi.

Jesu Khris mah mah in,”Kei sungah na om uh a, ka thu in note sungah a om leh na nget peuhpeuh uh na ngah ding uh hi,” ci-in hong gen khin zo hi. Thu ngenngen na pi-in, i nget peuhpeuh i ngah lohna pen Khris sungah i om loh man na hi gige hi. Tua ahih manin Khris sungah om in, ama thu mahmah i sungah nungtasak, gamtaangsak photphot le’ng i nget peuhpeuh ngah thei pan ding hi hang.

Thungetna ngah theih nading thusimte in; Upna leh muanna tak tawh ngetna leh, Khris sungah om a, ama thu eite’ sungah omsakna ahi hi. A telsiam dingin Topa’n thupha hong pia ta hen. Amen! Khris sungah, David Tuang

Mun Awng

Suah theih nading mun tampitak om hinapi-in, hoih maw hoih lo, kicing maw, kicing lo cihte om loin, a awng’na mun peuhah Kumpi Jesu hong suak hi. Na lungtang sungah, Jesu’ suah nading “MUN AWNG” na nei lai hiam?

Jesu pen, mi khempeuh adingin hong suak hinapi-in, a deih mite’ tung bekmah ah nakpi nuamna thu hong tung dinga, Lamdang Thulak Pa, Vanglian Pasian, Tawntung Pa, Nopsakna Kumpi ahihna hong kilang ding hi. Na mimal nuntakna mahmah leh, na innkuan sungah, Jesu’ suah nading “MUN AWNG” na nei lai hiam?

Mikim tungah, Jesu’ suah lungdamna thupha hong tung ta hen. Amen! Khazih sungah, David Tuang