North Korea galkapkhat ataisim laitak thautawh kikap, Video ki khahkhia

North Korea galkapkhat ataisim laitak thautawh kikap, Video ki khahkhia

North Korea galkap khat agam panin ataisim laitak Video pen tuni in ki khahkhia a, cikziat huai kisa mahmah hi. Tua North Korea galkappa pen South Korea gamsung zuanin ataisim hi a, South Korea gamsung alutmadeuh in a mawtaw zatpen hawkguam sungah awksak citciat in, anungah North Korea galkapte’n phadek uh a, thautawh kapgawp uhhi.

Hih North Korea galkappa pen agampan in ataisim kici a, ataikhiatni taktakpen November 13 ahihi. North Korea leh South Korea gamgi kikal akantansawm laitak in thautawh kikapgawp a, atawmpen 4 vei peuhmah kikap khading kici hi.

Ahi zongin South Korea galkap te’n nahuhthei bilbel uh a, tu’n South Korea gamsung aom Hospital khatah kikem in, aliamma tezong hoihtuamta hi ci’n AFP te’n genkhia hi.

Ataisim laitak Video Footage pen US-led United Nations Command (UNC) te khahkhiat hi a, tua Video sungah galkapkhat ataisim laitak cikziat huaitak in ki enthei hi. Action Movie sungkhawng bangdan in aki neihtawm hilo a, ataktak himawk in, kidelh in thautawh kikap takpi uh himawk hi.

Tua ataisimpa pen North Korea panin gamgi khengphei mialmial in South Korea gamsung lutpheithei a, ahi zongin liamgawp ahih manin, gamtang zolo in lumcip cihi. Tuabang in alupcipna panin zankhuamial ciangin South Korea galkap 3 te’n damdam in bawhvaksa in paikhiankhian uh a, South Korea gamsung ah tunpihtheih uhhi.

United Nations (UNC) panin akhahkhiat Video sungah North Korea galkap tezong ataihsuahkhit uhciangin tawmvei dingkhawm liailuai uh a, tuakhit ciangin kikhenthang uhhi.

Video: Dramatic footage shows North Korea defector’s border dash

Hih North Korea leh South Korea gamgi pen Panmunjom akicihna munkhat hi a, khualzin atamna Major Tourist Attraction khatzong kici hi. Hihlai munpanin North Korea leh South Korea te gamkhat leh gamkhat ki galmuhthei uh kici a, ahi zongin hihmun ah Security galkap tampi kikoih ahih manin, hihbangin agamkhat ah ataisim cihpen omngeilo khollo cihi.

More: North Korea te Missile thaupi lotkhiat Japan gamsungah tusuk ahih manin kibuai litlit

UNC spokesman Colonel Chad Carroll in Journalists te tungah agenna ah hihvai pen hoihtak ki kancianding hi. Banghanghiam cihleh North Korea galkap te’n thukhun palsat in gamgi khengkhin in thautawh kap uh a, tuabek thamlo, North Korea galkap khatin gamgi khengphei in delhphei ahih manin, hihvai kikupphat kulding hi ci’n genkhia hi.

Video asauzaw, akicingzaw in na etnopleh:

Special Investigation Team te’n amuhkhiatna ah KPA akici North Korean Army te’n gamgi kikhenna Military Demarcation Line (MDL) ah thautawh akap bekthamlo, North Korea galkap khatin tua MDL pen tawmvei khengval in adelhpen kithukimna “Armistice Agreement” palsat hi ci’n ki mawhsak hi. Sawltak #zomidaily