Huah thuum kenla, Hiah thuum in

Huah thuum kenla, Hiah thuum in

Haksatna, lungkhamna, cihmawh gentheih beidonna leh nat le sat i tuah ciang kithuum kitau thei ciat hi. Thuumsiam tausiam pawlkhat in a thuumna, a tauna hang in mite’ hehpihna tawm bang ngah thei hi. Mihingte’ ki-hehpihna pen ki-lainatna tung ah kinga a, ki-lainatna zong ki-itna tung ah a kinga ahi hi. Ong itte mah in ong lainat a, ong huh ong panpih uh hi. Ong itlo pi ong lainat dihdih cihbang omlo a, huh leh panpih huai ong kisa phial zong in khuak ii theihna bek hi a, lungtang kihel lo ahihman in huhna leh panpihna ong phulkhia zuahzuah khollo hi.

Mihingte’ ki-itna leh kihuh kipanpih zawhna pen a ciangtan khat om veve hi. Leitung mihingte’ tungpan a ciangtan om thei mahmah lo itna, lainatna leh hehpihna pen nu le pa’ tung pan bek in kingah hi. A ciangtan omlo, vathuum le vatau, va-ngetnget sese ngaklo a ong en gige, itna tawh a ciangtan omlo a ong hehpih den, ong lainat den leitung mihing i nu le pa bekmah ahi hi. Tua zom ah kua om hiam? Ei le ei in kiteh thei ciat hi.

Ahi zong in i nu le pate nangawn in leitung mihing hihna tawh i genkhiat, i pulaak zek lo in i haksatna, i lungkhamna, i nat i sat ong theihpih khin zenzen lo a, ong theihpih mah le uh zong ong huh ong puakpih zawhna uh a ciangtan khat om lai veve hi.

Ahih hang, ong itna, ong lainatna, ong hehpihna, ong theihpihna leh a hihzawhna ciangtan a omlo, bangmah tawh tehtheih ahi lo, tehdan zong a omthei lo, ong nusia ngeilo Pasian i neih i hamphat zia bangmah tawh kiteh theilo hi.

More: Zomi Politics (Pu Chin Sian Thang, Pu Zozam, …..) ~ Pu Zokhai

Kunsa in, leilak en in thuum kenla, tunglam en in thuum in. Naupangno in apa a hopih ding ciang leilak ensa in hopih leh apa’n za mengmeng lo hi. Apa’n a zak mengmeng theihna ding in dakto a apa’ mai enkawm in hopih leh apa’n zalo cihbang omlo hi. Vei leh tak ngakawm, khuadak kawmsa in thuum kei inla mailam nga, maitang mah en gige sa in thuum in.

Huah thuum kenla, Hiah thuum in. Pau Khat Suan