Ni le Guah hangin Sakhi Tuihuup hongpiang ~ Dong Mung

Ni le Guah hangin Sakhi Tuihuup hongpiang ~ Dong Mung

A tamzaw in i theih mahmah ahi, sakhi tuihuup pen khua phat(guah zukloh lai tak) le khuasiat(guah zuk mahmah laitak) khawngin hong kilangkhia ngei hetlo hi.

Sakhi tuihuup pen LST Piancil sunga Tuiciin tunkhit a Pasian in Noah kianga a thuciamna khat tungtawnin ei thu-um mite’n i theih mahmah khat ahi hi.

Sakhi tuihuup pianzia pen- Guah bekbek a zuk laitak ahihkeh ni bekbek a sat/taan’ laitak in piangkhia, suakkhia ngeilo hi. Amah pen meel nam tuamtuam tawh kizeem a etlawm mahmah khat ahi hi.

Bang hun ciangin amah mu thei ihiam cih leh guah zong tawmtawm zu ding, ni zong sa ding…guah mal kiatna le tua gualmal kiatna mun ah ni taang a omna munte ah kilang thei hi.

Tua hi-a, a etlawm mahmah Sakhi tuihuup hong piankhiat theih nadingin guahmal le nisa kisam hi.

Thalakna

I nuntakna sungah Sakhi tuihuup bangin a etlawm mahmah khat i suah theih nadingin guah bek tawh zong piang theilo a, ni bek tawh zong piang theilo hi. Ni tang le guahmalte mah kisam hi.

I nuntakna mite muhna ah a etlawm mahmah a suah theih nadingin, guahmal le ni vang tawh i kidim kha zel hi. Gualmal i gen ciangin dahna, maizumna, khasiatna, mindaina, guallelhnate a gen nuam ihi hi. Nitang icih ciang Pasian angvanna, ei le ei hanciam kikna, kithakhauhsak kikna le mainawt teiteinate a gen nuam ihi hi.

Sanggam aw, na nuntakna ah sakhi tuihuup bangin a etlawm mahmah khat na suah theih nadingin na thuak guahmalte hangin lungkia ken! Tua na thuak guahmalte tungtawnin a etlawm mahmah, mite ading lungdamna le kipahna piangsak in Pasian nitang in nang hong kap dinga mite ading thupha na suak ding hi.

Lungkia le thanem kisa peumah ken… na guahmalte le Pasian nitang hong kituah ciangin a etlawm mahmah sakhi tuihuup bangin meel tampi tawh mite ading thupha, phattuamna a piangsak hong suak ding hi. Lungdam, Dong Mung