Ni 11 sung innsungah kikhumcip a zahmawh bawlsiat athuak numei
Hih thu a pianna mun pen (Yangon Tine, Than-tapin Myo) Khuata khat a thuping ahi hi. Kum 17 a pa nungakno khat bazar pan a ciah kik lam a innmai a tun ciangin pasal nih in motor cycle tawh zawhtawh thuin taipih uh hi. Taipih a thuak numeino in a genna ah.. Ka nung le ka mai tuak ah tu uh a, ka nunga tu pa in, “Na ot peuhmah leh ong dawtlum lian ding ka hi,” ci-in a zum khat tawh ka nung pan hong dawt dingin hong ngat a, ka puantungsilh om kei leh tua hong ngatna mun liam zo lai ding zah dongin awng kha zen leng hong dawt takpi dingin ka um hi.
Khua sung pan hong pai khiatpih vingveng uh a shwe pyi thar a kicihna zinbuk khat ah hong tunpih uh hi. Tua zinbuk panin kei hong man mi nihte a khat zaw pa Aklui a kici Soe Min Than in kei hong buan gawp hi. (A min a nung theih kik ahi hi.)
(Hih nu pen amah a buan pa in a bawlsiat masak pen ni hi-a, ni sawm le ni khat sung, nisimin buan ahih manin tua ni pen a masa pen ni ahi hi.)
Nisim-in tui hong dawnsak den uh a, tua tui sungah bang hiam khat hel uh hi ding ahih manin tua tui ka dawn khit simin ka lu vai-in tawl khat khit ciangin khua ka phawk nawn kei zel hi. Tua hangin tui hong dawnsak uh hangin ka dawn nuam nawn kei a, ahi zongin ka dawn loh theih loh dingin hong vau den uh hi.
Na dawn kei leh gamgi ah kong zuak ziau ding ka hi, zuak na ut kei leh dawn in hong ci hi. Dawn nuam tuan lo ka hih manin ka paan pan hong beng gawp zel hi. Tua bangin nisimin tui hong dawnsak den a, ka dawn loh theih loh dingin lampi tuamtuam zangin hong dawnsak den hi.
Ni khat, ama om loh kaal-in khua ka phawk a, zinbuk manager pa tungah huhna ka ngen hi. Ahih hangin tua manager pa in hih bang thute no le no kisi un, ko hong buaisak kei un, ko tawh kisai lo hi ci-in hong awlmawh lo hi. Tua zawh ciangin khua dang khat { Bago Myo} lam ah hong paipih a, inn khat ah hong khumcip kik leuleu a tualai ah zong hong buanin hong bawlsia gawp laulau hi. Tua bangin ni sawm le ni khat sung tua inn sungah hong khumcip a nisimin hong buan denin hong bawlsia den hi.
A nu le a pate in a tanu uh mang ahih lam a theih uh ciangin thuneite zasak pah uh a, thuneite in zong kanpan uh hi. Ahi zongin ni sawm le ni khat bawlsiat a thuak khit ciangin kimu pan uh hi. A kimuh ciangin amah a bawlsia pa Aklui a kici pa om nawn lo a, koi ah leng mang hiam cih kithei nawn lo hi.
Bawlsiat a thuak nu in a genna ah, bang hangin hih bangin hong bawlsia hiam cih ahang ka thei kei a, ahi zongin Aklui in hong buan simin hih bangin ci den hi. “Na innkuanpihte in a vawh bangun at kik uh cih na thei ta hia” ci-in nui haha den hi.
A pa in a tanu thugen a zakna tungtawnin upmawh khat nei hi. Ama tapa /bawlsiat a thuak nu’ sanggam pa pen khua dang khat ah zi nei hih tuak hi. Tua a zi tawh ta nei uh a, ta a neih zawh uh kha sagih ciangin a nupa un kikhen kik uh a, a tano le a nu tuaci nusiat hih tuak hi. Tua a tapa’ zi le a tanu uh a bawlsia pa kizopna nei uh hi ding hiam ci-in ummawh uh a, ahi zongin a tapa zi/ a monu uh a koi lam ah tung ta a, a innkuanpih kua hi a, a u a nau kuate hiam cih thei lo uh ahih manin a upmawh uh a gen bek ahi uh hi.
Khuapi sungah zi/pasal a nei pawlkhatte a sungh a pute uh kua cih a kitheihpih lo mi pawlkhat om takpi uh hi. A monu min le a maakpa min cih ciang thei saam uh a, sanggam u le nau bang zah neu a, innkuanpih bang zah pha cihte a kitheihpih lo lawm kingai le nupa tampi om uh hi. A sungh a pute tawh kisai bang mah a thei lo pawlkhat om takpi uh hi. Tua bang mi pawlkhatte pen amau nih zong a pianzia uh kitel taktak uh diam cih nop huai kasa hi.
Bawlsiat a thuak numeinu in a genna ah, hih ka tuah thu hangin khuapih pawlkhatte in hong hehpih mahmah uh a, ka lung a kiat loh nadingin tha zong hong pia uh hi. Ahi zongin pawlkhatte in kong kihbawl uh a, hong kosia gawp uh hi. Sang ka khah kik nop mahmah hangin ka sangkahpih ka lawmte pawlkhat in hih tuah thu thei uh ahih manin sang ka kah ding ka kihta hi ci hi.
Hih thu a pianna khua ah hih thupiang mah tawh a kibang thu nih kum khat sungin piang hi ci-in tungsiah thuneite in gen hi ci uh hi.
More: Sangnaupang kum 8 khat sanginn ah simmawh bawlsiat athuakzawh ninih khitciang in ki gui awk
Theihsakna: Hih thu pen thuthak hi lo hi. 2018 kum a thupiang ahi hi. Mundang ah hih bang thupiang kiza kawikawi ahih manin ei Zogam le Zomite sungah hih bang thu a pian loh nadingin kidop huai thute kidawp theih nading deihna le hih bang thute a pian loh nading khat le khat ki-itna le kihehpihna tawh unau sanggam khat bangin kingaihsun a, a diakin numeite zong amau le amau pilvan takin a kidop theih ding uh deihna tawh hih thu hong suaksak ka hi hi. Source: Myanmar Now/ Job Cinpi
Comment piaknop aomleh...