Ngaih Anglai Zal Dingin – 8
Niangno zong a khuahekna ding lah theilo, a vak a ciahna ding lah theilo in a om milmel hi. A u Suanno hong ciah ding maw, hong ciahlo ding cih lah thei tuanlo ahih manin leitung nuntakna ah a lungkham huai mahmah hun a tuak ahi hi. A nu in a telsiampih hang a huh theihna ding om tuanlo hi. A lawm leh gual in a theihpih hang a cih theihna uh om tuanlo hi. Bangci in Niangno lungzuanna a neem tuam thei tam maw! A ngaihsutsut uh ciang a lawmte in Niangno hih banga a om mawk pen hoihlo ahih ciangin a lungsim a noptuam deuh na ding, a lungsim a kihon theih deuhna dingin Kaptel khua khunga Lennupa ah hawhpih ding a ngaihsun uh hi.
A gengen uh hangin a ut pah kei hi. A tawpna ciang zol zo uh a, Tedim panin dingkhia dingin a kithawi uh hi. Niangno ngaihsutna ah, a pusuah kal un a u Suanno Singapore pan hong tung mawk leh aman na dawn kha lo ding cih bekbek a lungkhampih hi. Ahi zongin a lawmte in, “Tua tan hong tunglo pen hong ciah nawnlo phot ding hi inteh. A laikhak hong tun ciang hong gen kik inteh….” ciin na hehnem uh hi. Ahi zongin Niangno lungsim ah a u Suanno simloh thudang peuhmah lut theilo ahih manin a lawmte gente a nial pah loh hangin a lungsim takpi ah Amen cih ding a hisak thei kei hi. A ni cingin nithak suak leh Niangno lungsim ah a u Suan hong tung ding nai deuhdeuh cih bek a ngaihsun hi. A ni sawt deuhdeuh a, lametna lah lian deuhdeuh, thuthak lah kiza lo deuhdeuh, u Suanno lah ‘The betkhiat’ acih mah bangin a dai bikbek hi.
Lennupa ah pai dingin a kithawi laitak un nitak khuamui ziziai lak ah mawtaw hong ging vauvau a, Niangno leh a lawmte zong thakhat thu in diangkhia in innkatau ah khuadak in a galdon uh hi. Mawtaw in khuasung hong naih pheiphei in Zolengthe naipi gei hong tun ciangin a khawl hi. U Suanno te inn tawh kigamlalo, ahih hang lah tung nailo deuh hisi ahih manin Niangno te lawmta in bel u Suanno hong ciah hiding, a inn a tun ma in a mawtaw tuanpih lawmte lampi ah kumsak masa hiding ciin a deihbawl uh hi. U Suanno bel Sinagpore pan Singapore Dollar tawh inn tung ding himawk ahih cianga mawtaw hoih mahmah sapin Kawlpi pan Tedim a ciah ding mite upna leh amah in zong a genkholhsa ahi hi. One man show bel hipah samlo in, a kisap man hizaw, hun saulo, khua ah hun tamzaw zang nuam si.
Niangno leh a lawmte zong zingciang Lennupa ah a pai ding uh kipelh ta ding aive maw ciin a langkhat ah poi sa in, a langkhat ah lah Niangno lungdamna penpen leh a lungsim khempeuh a omna a u Suanno hong tung ahih leh tua lah lungdampih si…. bangthu hi peuh mah hiam ciin a va kancian dingin maizum pipi, lah lawp mahmah, ci liing litlit kawm in a paisuk uh hi. Niangno bangin a u Suanno hileh bangci et ding, bangci hopih ding, bangci khutlet ding, bangci vaidawn ding cihteng ngaihsun in a lungsim tawngah zinling bangin a kising liahliah hi. A u Suan leisak powder namtui kinuh saisai in, a u Suan muksanza leisak mah kinuh in a puan paknamtui nam viauviau silh in a nik thultaw pan lakhia in teeng a, a lawmte nung zui in mawtaw khawlna lam a delh vingveng uh hi. Huankhang guam sung a tun laitak un mawtaw ging ciaiciai za uh a, U Suanno lawmte kum khinta hi ding, tun amau inn lam zuan pheita hi ding…. ciin lametna liansak semsem, lungsim ngaihsutna lian semsem in a kinawh semsem uh hi. Vuikhu taleh phamawh sa lo in mawtaw ginna lam a nawh delh semsem uh hi. Naupang hon awng zuazua te in muamkhum hawm ngak hiding cih lamen in gamdang pan hong tung om hi takpi ngel hi ciin mawtaw omna kiang a naih deuhdeuh uh hi.
Mawtaw kigalmuh thei dekta cih ciangin mawtaw in inn kikal ah mualkhum phei zialzial a, Suanno te inn lam a manawh phei ciaiciai hi. Khuanawl lam mualbo tunga Suanno te inn a lut tam ciin gal et kawmkawm in Niangno leh a lawmte in zong tua mawtaw a nawh delh mahmah uh hi. Suanno te inn ah a lut kei leh bel Cikha lam paisuak ding mawtaw hikha ngel ding hi cih a lau simsim uh hi.
Tua mawtaw U Suanno hong ciahna hi ding maw, ahih kei leh Cikha ah galkap bu te zinna hizaw ding maw cih a lungngaih laitak un tua mawtaw lampi ah khawl in a meimit a, a sawn ngeingai uh hangin a engine a hing kik pak zokei hi. Tua laitak in Niangno leh a lawmte zong va tung phei uh a, mawtaw sung a et uh leh……..
(zop lai ding)
Hau Za Cin
Phuitong Liim
Comment piaknop aomleh...