Laibung Khua Mincip Na (khua siansuah, dawi hawl khiat na) ~ Rev. Kam Do Thang

Laibung Khua Mincip Na (khua siansuah, dawi hawl khiat na)

2015 July sung ni 10 val guahciin aa, Weather Focust te in KuminTyphon huihhual Bangle tuipi pan hong lutna hanghi cihi.Geologist te muhna ah Khamtung gampen leinip lua ken lua in acim zel hi ci hi. Pasian nasem te mawhna leh mipi te mawhna hang hi pawl khat in ci uhhi. Ih paunak ah ‘ Sih ciang paulap zong’ na kici hi.Laisiangtho tawh kituaklo dawi hawl khiatna hang hi kimkhat in na ci uhhi. 2013 kum in evangelist sia khat dawi biakna beita hi ci in, Khuasiam (tual) biakna song kiphut phuk aa lui nakpi khang in hydroelectrict power house leh concrete lei pen taikhia mang hi., 2014 kum khal in Full Gospel te in crusade bawl in leikisia khempeuh siklei hong kibawlsak in meiset zong kumpi in athak lam kik hi. 2015 March sungin thusuak dawinot Naga te Sia Sian leh alawmte in Cimnuai ma hun pek aa kizang Khuasiam (tual) biakna suangte lumlet in paikhia gawp in keel ngo in dawite not uh aa steel sik khuam tungah singlamteh lim tuang dialkhai (flag) khai uhhi.Tukum in Laibung khua pen kiteng thei nawnlo dongin mincim leh tuikhang in susia aa a mukhempeuh in cikzia in upmawh sangin kisia zaw lauhuai lua ci uhhi.

Laibung khua tangthu

Laibung kici pen india gamgi aa om Hmar mite pau hi aa sanggam bul (laizom-laiguizawng) cihna hi. Zangtui hausa lui Pu Thawng Za Cin in Teizang mite Cimnuai le Luika akitun ma in Laibungah kiteng ngei hi ci hi.Tua khit ciangin Hatzaw te Pu Teel Pau khanhun dong khangto in minthang mahmah uhhi. Sihzangte tawh kipawl in kawlte sim in zogawp uh aa Laibung atun ciangin “Laibung Ngaalla” sa in kidawntuah uhhi. Sihzang teng in akhua uh atun ciangin tua laa sa in pawibawl uh aa tudong in Laibung ngalla aphamawh in sa uhhi.

Pu Teel Pau hun in Dimpi te in a ziltui (Dimci al) huanna pan gamkang sak napi phelhlo uh aa Laibung gam Khamsau ah besiang cing tampi kang hi. liau nuam tuanlo ahihmanin ahausapa kiangah tuangdung pia aa apuaklaitak suamlum mang uhhi. tua mun pen tudong Dimlui kici hi. Dimpi te in kilemna sial tawh lut in upa Kim Thang in taanglai tualsuang phah tungah zu ne atut laitak tualsuang pi 1/2 asah pen kitam hi. Tel Pau pen a tute Kop Thang le Thang Kop te tawh kithusia uh aa Suanzo(Tuigo luipiau) te galcial in Laibung khua asim ciangin khuabei hi.

1918 kum ciangin Laibung khua kisat kik aa tanglai ateng masa te zatsa tualsuang lui te zangkik in kumsim khuasiam (tual) biakna bawl uhhi.

A Lauhuai Tualbiakna

!920 pawlin Pu Kham Ngen in thaituh zawh ni sawm zunek ni in zekai luasa in ‘hih zu ka neek leh Laibung khua siam in hong denglum hen’ ci hi.A lawm te in komau khialhna hi ci in manlangtak zu leih in amah pansak uhhi. A neek khit ciang ciahpah aa tua zan in suangtuk in alupna tungah denglum hi. A naupa Pu Thuam Ngin in laaphuah aa-

Ciinhang tham na kenliang lumsuang kaihmi in na luang hen aw. Kaihmin in na luang hen aa melmuh loh in thang dam tui in luang hen aw.
A pu Kai Ngin ih laaphuah-

Kenliang lumsuang sawn na thamna lahmei bang ten zo ing. Sang hihen aa lal hi le pawh khuamual ah suah zo ing.

Khat vei tualbiakna sial angawh khit ciangin tual tanu khat in amulte meitawh hal aa khia (zehphit) ahihmanin thoihpha kik uhhi. Tua kum in misi thaulot na pan innkang aa inn 7 dong kilawh hi.Pu Phut Zel in phuisam in aktui tawh aden leh meimitpah ci hi.
Khat vei tualbiak na sane ding akipat laitak in pasal khat in,”min nai ding hiam,sahang kisa na hiam?” a cihleh tua kum in sahang laangin sialtampi petlum hi.Guahzuk hak ciangin guahtui getna ,ankung hoihna, mipi cidamna, hauhna,gal kidalna, kilemna te a ngatna ci uhhi. Phuisam na ah-

“Ka khua na siam in, ka tui na siam in,ka mual na siam in,ka lui na siam in,…cidam in siamin, meisan na dal in sanpisanno na dal in, .. sumlam siallam in siam in …mim cipha taang cipha kong getna .zu masa hong pia ing sa masa hong pia ing..” cih bangin sam uh hi.

Dawi hawlkhiat zia a tuamtuam (Biblical View)

Jesus Christ in cidamlo dawi bawlsiat mite sung pan dawi hawlkhia aa anungzui te thu um mite khempeuh tungah dawi hawlkhiat ding thupia hi,dawi hawlkhia in cina te damsak hi.(Mt.8:28; 17:14-21;Mk.1:23-27, 39; 9:27; Lk.4:33-35,41; 6:18;9;1-2,39-43; 10:17-20; 13:11-13…etc)
(a) Antan thunget bek tawh akinot zo dawi pawlpkat om hi (Mt.17:21).
(b) Dawi te akihawlkhiat ciangin omna ding kisamin munpiak akul pawl khat om hi.Jesus in dawilut puansilh lo hanlak ah ateng sikkol abotsat zo dawilut pa sungpan dawi anawhkhiat ciangin aom na ding uh mun gen aa vok sungah lutsak hi (Mk.5:2-17; Lk. 8:26-34).
(c) Jesus umlo neilo te in dawi anawh hangin dawite paikhialo lau lo, bek thamlo in na buan gawp uhhi (Sawlt.19:13-16).
(d) Dawi akihawlkhia khin mikhat in Pasian thu tawh kidim in hoihtak anuntak kei leh agilo zaw dawi 7 lut kik thei hi (Lk. 11:24-26).
(d) Jesus, Pasian Tapa ih sisan vanglian bek in dawi te leh dawi vangliatna te akipan ih natna te hongdam sak thei ahihmanin sasisan (ganhing sisan ) te thu um mite adingin dawi hawlkhiatna ah kisam nawnlo hi.
(e) Khua siansuah na dingin khua sung aa teng mite khempeuhin a mawhna uh pan kisik kik in dawi tawh kipawl lungsim leh gamtatna te nusia ding uhhi (Jonah 2:5-10). Pasian Khasiangtho tawh kipawl gamtatna, lungsimkampau na ih neih na ding hong kibawlpha te ih hihhi (Eph.2:10). Dawite pen salu hawm, vanzat tuamtuam te, man (photo)… atuamtuam sung ah omlo in ci le sa deihna zuihna sung ah om zaw hi (Gal. 5:19-21).

Rev. Kam Do Thang