Tedim khuapi ah (18 Feb 2017)

TEDIM KHUAPI – AH Mun tuamtuam a omte Tedim Khuapi pan in ih dam kim tek hiam ci-in hong hopih ing.

TEDIM KHUAPI – AH Sang naupang laiphi nailo Kumpi laivuan ih cihcih ngei ahi, tanli, tangiat-te leh tansawmte bek san kah lai uh a, tualo tengin sangkhak ta uh in sang kah pai zuahzuah cih kimu nawnlo hi. Naupangte bang sangkhak nuamsa in Saili tawh gam sung ah zulei beng, thankik beng, vasa beng in lengkhia keei uh hi.

TEDIM KHUAPI – AH Kumpi pa hong pai ding ci-in khuasung zum thuneite buai thei mahmah uh a, Vanleng nih tawh hong pai ding ci hi. Kumpi nihna pa hong tuanna vangleng sang gol zaw ahih manin Gauh kuan ah vanleng hong tu ding ci hi. Naupang neu keukeute bang an ne nuam lo in kibawl le uh a nu a u te un “zingciang vanleng hong leng ding nang en nuamlo maw na an nepak na et nop leh” ci in kidon uh hi.

TEDIM KHUAPI – AH Khuadam hun in hong paisan ding hi leuleu a, khualum dingin hong kipan pianpian ta hi. Thangmual leh Lentang mual khawng gal et lehang Khuamuii kai in tuam ahih manin lung hong lengsak peuhmah cih ding hi. A mualte bang gina takin kitel muh zolo hi. “Gal Khua don leng Len muikai, huihkhi lang e sen ngaih aw” ci-in Laphuak lasa siam Tuithang Golian lasak bang phawk in hong om liang hi.

TEDIM KHUAPI – AH Telenor te in kihona leh internet zat a nop zawkna ding ci-in phone khau lei sungah phum in buai thei peuhmah uh hi. A vanzatte uh kimu ngeilo ahih man in Nupi Papi naupangte in sialgawh et in ki en ngeingai hi.

TEDIM KHUAPI – AH Mei pen maw guai Zan khat hal in hong pai in, sun nih hal in tawmtawm hong pai ahih manin piangpiang thei teei cih ding hi. Tui ahih leh a luangluang mah hin teh ih cih hang, a luan nading ah luanglo ahi tam theilo, kikham lo cih ding hi. Peithum Cylcle te tui tawi in buai thei mahmah uh a, Tualzang lamka ah Tuilangte Pa Mang a cih pa neihsa Tuikhuk ah tui kilim tawi mahmah hi. Khuagei a lui neuneu te ah zong Sani ni hi leh kisil puansawp cih bangin a kiphu keei himai hi. Mundang a omte aw, tuizat no nuam nasak uh hang TEDIM KHUAPI – AH tui haksa sa mahmah ung, luitui kholnate beek gina tak a bawl zawh nading hong huh un ci in TEDIM KHUAPI pan huhna hong ngen himai ing.

Lungdam. Ih omna tek ah Pasian in a thupha tawh hong dawntuah tek ta hen.

tplian, 0933395577