Zomi leh Sawm Ah Khat

Zomi leh Sawm Ah Khat

A masa in, ” Sawm a khat”, cih laimal pen Lai Siangtho sunga tawh ki banglo hi. Kam ih pau ciang, Lai in ih gelh ciang, ” Sawm Ah Khat”, cih tangtang ding ahihi. A ki tel zaw in gen leng, “Seh Sawm Suah Seh Khat”, cihna hi aa, adang khat in gen leuleu leng, ” SehSawm lak panin Sehkhat”, cihna ahihi.

Zomi ten Sawm Ah Khat ki pia tangtangta in gengen kul nawnlo himah leh ih piak dan pawl khatte en leng.

1. Gamdang panin Tedim, Lamka, Tonsim cihte ah na khia kawikawi hi.
2. Inn ah thungen hong pai Siate/Sialo te na pia hi.
3. Na ki khopkhop na ah na khia tangtang hi.
4. Huhna hong ngen khat peuh na Sawm Ah Khat te na pia hi.
5. Biakinn lamna ding, minam ading na pia hi.
6. Cihmawh dong tuak huhna in na zangh hi.
7. A kim khat ih ki khopna ah, a kim khat mun dang ah na khia hi.
7. A lemtang mun khat peuhpeuh ah na khia hi.

Hih a tunga teng lak ah nang Sawm Ah Khat na piakna na piazia na sittel in. Lai Siangtho bangin pia ning ih cihleh ” Ka biakinn ah hong paipih un”, ci ahiteh mi hong khak sawn un thawntuangcihna hilo hi. Tua khua aa La no hong kai unla acihte mi na kaisak un cihna hilo hi. Ei mahmah in a kimin Biakinn ah paipih ding cihna hi aa, ih ki khopna ah ih Sawm Ah Khat te paipih ding ahihi. Na deihdeihna uh ah zangun, no mau mahmah in zeek un hong cilo hi. Ama deih pen kim in paipih ding hi ngiat hi.

Ngahna sumbek ahilo ih ngahna khempeuh lak panin Seh Sawm(khen sawm) suah ding hanga tua lak panin Sehkhat pen Biakinn paipih ding ahihi. Tua Sehkhat pen Lamkal panin Sehsuah kik in, Saklam Khanglam ah khen kawikawi ding cih Lai Siangtho suangah omlo hi. Ih piakna khat ah akim in piak ding hong kal hi.

Sumbek piak ding hong kalhna om zenzenlo hi. A kim in ih piak keileh guta bek hilo samsiatna ngah ding hilai hang ei.

Sawm Ah Khat pia mah hang, ahih hangin ih piakna Mun sittel huai hi. Sittel ka cihteh Upa Siate zatna teng va sit tel in cihna hilo hi.
Pasian adingin a upna ngiattawh hong kalh thute ih Biakinn ih ki khopna munte gina pha kei mah leh ih ki khopkhopna ah a kim in ei mahmah in Pasian ih ze-et ding hizaw hi.

Ih piak leh cidam ding, ih teenna gam nuamsa ding, thupha ngah ding hihang ei. Zomite thupha ngah vilvel dingte hihang ei. Siksan munte a nuai ah;-

Malakhi 3:8-12

8. Keimah in note kong dotnop thu pen, mi khatpeuh in Pasian’ na guksak ding kilawm ahi hiam? Kilawmlo hinapi-in note in nong guksak uh hi. Ahi zongin note in, ‘Bang hong guksak ka hi uh hiam?’ na ci uh hi. Sawmah khat piakna leh biakpiaknate-ah nong guksak uh hi.

9. Na minam bupun keima neihsa hong guksak na hih manun note khempeuh tungah samsiatna hong tung hi.

10. Ka biakinn-ah an a om theihna dingin sawmah khat a kimin hong paipih un. Kei hong ze-et un; vantung kongkhakte hongin, note-a’ dingin na hoih tampi kong piakna na mu ding uh hi.

11. Lo panin a piang na ante uh, kauphe ka nesak nawn kei ding a, na leenggui uh gahpha mahmah ding hi.

12. Tua ciangin na gam uh, ten’na dingin a hoih mahmah leitang hong suak ding ahih manin, minam dang khempeuh in note pen a nuamsa minam, hong ci ding uh hi,” a ci hi. Thawn Tuang