Nek loh buan lawh ~ Pope Francis leh Zomi Movie vai

Nek loh buan lawh ~ Pope Francis leh Zomi Movie vai

Tulai Zomite sungah ei mimal in I nek khak hetlo ding I buan lawh thu nih om a, tuate Pope Francis Kawlgam Zinna le Zomi Movie thak vai ahi hi. Kei mimal ngaihsutna le muhna tawm hong gelh pak ing…..

1. Pope Francis Kawlgam Khualzinna

Roman Catholic makaipi a sangbel Pope Francis’ Kawlgam hong zinna tungtawnin Zomi sungah muhdan, ngaihsut zia tampi social media tungah I mu khia hi. Tua tawh kimemat in kei muhna ah:

i. Zomi RCM Pawlpite: Zomi sunga RC biakna zui pawlkhat in Pope Francis hong zinna pen amau mimal/pawlpi aituam vai bangin sangin hong gen uh hi. Tua thu hangin mi pawlkhat in na sang khial uh a, laigual kilawmlo tampi hong gelhkhia uh hi. Pope hong zinna pen biakna vai hi masa khollo a, Kawlgamah ki-itna le daihna (Love& Peace) a om theih nading lunggulhna tawh hong zin ahih banah Kawlgam makaite lunggulhna om bangin hong zin ahi hi.

ii. Zomi RC Pawlpi ahilote: Zomi sungah RC biakna ahilo mi pawlkhatte in social media tungah amau muhna le RC Pawlpi/biakna a neumuhna ahihkeh a telkhialhna ahihkeh amau muhna bek ultung sakin lai hong suaksak uh a, tuapen haina nam khat ahi hi. Pope pen RC makaipi ahih manin RC upna zui Kawlgam a om Zomite leh namdangte in kipahpih uh in a nuampih uh pen khialhna omlo a, ahi ding mah ahi hi.

iii. Pope hong zinna pen Zomi sungah kitot kiselna piangsak ding leh kineumuhna le kitelkhialhna piangsak ding hilo hi. RC Upna zuite in zong na kiphatsak pih luapah loin, RC upna a zuilote in zong na telkhial pah lua kei leng hoihpen ding hi. Pope hong zinna ahang le a tupna bang hiam, cih telcian masa phot leng I thu hong namtui ding hi.

2. Zomi Movie Thak Vai

Tulai tak Zomi Social Media sungah hong thang mahmah leh mipite lungsim hong luah mahmah thute in Pope Kawlgam zinna le Sia Do Khup makaihna tawh kibawl ding USA gam bulphuh Zomi Movie thak ahi hi.

Pope khualzinna tawh kisai a tungah I gen khin zo hi. Zomi Movie thak tawh kisai gen pak leng….Hih Movie ading makaipi Sia Do Khup in ama gelna le ngimnate ama mimal FB Page panin a kicing in hong suaksak zel hi. USA a tuncil in Sanggampa Gin Mung (The First Zomi Hollywood Actor) tawh kikum khawmin Zomi Movie thak ding vai hong suaksak hi. (Gin Mung tawh photo zong suang hi).

Ama lunggulhna om bangin quality nei mahmah Movie bawlsawm ahihna thu zong I thei hi. Tua tawh kimemat in, Video Camera man ding, Video Editing ding, Fighting Action ah a panpih ding leh Movie sunga kihel ding mi a deih zah a ngahna thu zong ama FB pan hong tangko khin hi. (Sanggampa Gin Mung in zong ama FB pan hong tangkona om hi).

Tua kawmkal panin mi pawlkhat in, “Hipa Minta(Actor) sem ding ih deih hiam; vote pia ni, a ci tawh…hinu Mintami(Actress) sem ding I deih hiam; vote pia ni, a ci tawh, sum le pai tawh a mapang nuamte na min, na omna le na piak ding zah comments ah a ci tawh… I ciak ngeingai uh hi. I kipanpih nopna le I kideihsaknate thupi mahmah hi. Ahi zongin makaipipa in a hunzui in ama FB page panin hong zasak lel ahih manin a kisam nawnlo thute tawh na buaibuai kei zaw leng a hoihzaw dingin I lamen hi.

3). Zomite’ Pilvang Hunta

Tuhun pen Social Media (IT) hun ahih mah bangin I pilvang ding kisam hi. E’n thei kisa a, thu khat I suahsak pen midangte’n olno takin mun tampipan na kan thei ahih manin thu le la mawk suahsak ziauziau ding kilawm lo hi. Ngaihsutna hong kidong thute ah na ngaihsutna ciang i gen ding hi a, i khensatna i gen ding hilo hi.

Na khempeuh in hun nei in, hang nei ahih manin a hun le a hang I tel masak ding kisam hi. Banghangin hi thu piang hiam? Bangteng kisem khin hiam? Bang ciang tung ta hiam? Kei tawh kisai mah hiam? Ken bang seppih thei ding, huh thei ding, cihte I ngaihsut ding hi a, ei tawh a kisai khol kei leh theihpih ciang tawh paisan theih ding zong kisam hi.

More: Yangon, Kyaikkasan tualpi ah Pope Francis thugenna leh Cardinal Charles Bo Thanksgiving speech

Media sem nuam taktak i hih a, Social Media FB tawh min ngah nuam i hih leh i laigelhte, i lai postte kician sak in, i laimalte limtak puah in zuun ni…Khantohna I cihpen nisim a ei le ei kipuah phat tohtohna ahi hi. A thu kimcing I theih kei leh zong Social Media ah suaksak se dah lel ni.

Nek loh Buan lawh…

Hih teng kong gelhkhiatna zong kei adingin nek loh buan lawh mah ahi hi. Hun bei, sum bei in kong suahsakna pen nang tawh kibang khat ka hihna ahi hi. Banghang hiam cih leh ei tawh kisai lua khollo thute ah buai lua ihih manin ahi hi. Lungdam ei, Zomite hanlung ciam khangto diam, Genkhialhnate hong maisak vo, Dong Mung