Pope in Myanmar Minorities ten phubalakna a ciing lohna dingun kunh

Pope in Myanmar Minorities ten phubalakna a ciing lohna dingun kunh

Nov. 30, 2017: South Asia gam-a Myanmar leh Bangladesh gam ah ni guk sung taam dinga khualzin Pope Francis in a ni nihna in a nih veina dingin a kizom in Myanmar gam-a bawlsiatna thuak Rohingya minamte min “Rohingya” ci-in a kammal a zat loh manin lamdang a sa tam mahmah hi.

Tua loin United Nation in Myanmar galkap ten August 24 panin Rakhine state leilu lamah ARSAte do ding paulap in military operation a bawlna uh-ah human rights a palsatna uh nasia lua ahih manin a gamtatna uh pen minam siansuahna gentehna laibu “textbook example of ethnic cleansing” hi a cih hangin Pope Francis in Myanmar galkapte ngongtatna khat vei beek a mawhpaihna thu gen lo hi.

Ahi zongin Roman Catholic biakna makaipi Pope Francis in Myanmar gam-a khuapi lianpen Yangon ah public Mass kineihna ah a a thugenna ah “maisakna” thu lim gen mahmah a, Myanmar gam-a minamneu ten phu lakna dingin khemna leh ze-etna a dalna dingun kunh hi.

# Behlapna: Pope Francis pen a zin ma pekin Myanmar ulian ten Rohingya kammal cih a zat lohna dingin warning zasak uh ahih manin manin warning a kipiak mah bangin a zang lo hi lel a, Rhongya minamte pen Myanmar ah Zomi hong kiciamteh nai loh bangin minam ciamtehna kumpi in pia nai lo ahih manin a zat loh pen lamdang sakna ding om lo hi.

Pope Francis pen Roman Catholic pawlpi makai bek hilo in leitung bup Khristian makai lian ahih banah climate change, global warming dona ding tangko, refugee-te kep leh khoi ding tangko leh gay/lesbian mite deidantuam bawl loin biakna in pom a, a kisik kikna dingun huh a hanciam ding ci-a tangko leitung makai zatakhuai mahmah khat ahih manin Myanmar hong sik khak pen angtanghuai mahmah a, i gensiat ding hilo in i lungdam ding kilawm zaw hi.

Khristian kici lanlan napi Zokam a group kibawl tuamtuam leh fb wall peuh ah Pope hong zinna vai gensiatna thu kikhahkhia muh ding tam mahmah a, Kristian i kicih nop takpi leh tua bang thu khawng khahkhiat pen i maizum ding hi zaw hi.

More: Pope Francis leh AirAsia Company neipa kimuhkhopna neita

Gam tuamtuam ah political party tampi om ngeingai napi government hoihna mah hanciam tek uh a, ideology tuamtuam leh doctrine tuamtuam a om hangin political theoerists leh thunkers-te ngahsutna tuamtuam leh Lai Siangtho mah bulphuh a pawlpi om ciat ahih manin biakna vai a kideidanna pen i biak Pasian leh i Lai Siangtho zat kibang ahih manin zonzon sese pen i upna a man loh man hi bek a, tua banga hun zat ding pen pammaih lua hi. Kha mangthang i awlmawh a, cimawh beidongte i it i kep i huh zawk ding pen i Khristian tavuan lianpen hi zaw hi. Source: Al Jazeera @ Thang Khan Lian #ZUNs