Naupang sungkhak pen a omthei thu ahihi

Naupangte a kimawl nop laitak khawlsakding pen thu olno hilo hi. Awnghawh ding nagawn phawklo zahdongin kimawlmawl nuam uhhi. “Tawmvei pak, minute nga bek” cihtawh nu le pa te’n kikhawlkhawl sak in paisuak thei hi. Hibanga awnghawh hun ngeina manlo na in suangkhak sak in damlohna piangsak thei hi.

Sungkhakna pen gilsungah om eekte ahun val lua a omna pan in hongpiang ahihi. Tuabang in hun val a omtak ciangin gilzangte in a tuite na hupkang aa, eekte keusak in thakkhiat haksa hi. Hong sawt tetek leh natna lauhuai dong tungthei ahih manin Nu le Pa te’n a hunlap a kikep ziading theih huai hi.

Bang hangin naupangte’n eek ip hiam?
1. Atamzaw in kimawl ding bebek leh a deih khat pepeuh uh khahnuamlo ahih man in awnghawh ding nial thei uhhi.
2. Sungkhak tawmtawm hong kipat ciangin dailen ding haksa leh a nel uh na/taak ahih man in tuading utlo in ki-ip niloh thei uhhi.
3. Gilsung ah sauvei a thaam khitteh thakhit ding haksa aa, gilsung nasak, zuntehsak gilzang tonsak in omnuam lo ahih man in awnghawh ding ut lo thei uhhi.
4. Inn pan in sangkah kipat hun ah vanzat leh kepdan kilamdan teh naupang te’n eek ip thei hi.
5. Dailenbuk painuamlo ahih kei leh zang ngamlo ahih man in zong ek ip thei uhhi.

Bangin Eekkhak sak phadeuh hiam?
1. Nu nawitui pan in an dang piak kipat teh Sungkhak thei hi.
2. Zatui pawlkhat in zong Sungkhak sak thei aa, zato mangte piaklo damdawn pen naupang te upmawh piak ding kidawp huai hi.
3. Zunkhum neite zong sungkhak thei sawnsawn hi.

Bang cidan in sungkhak kikem ding?
1. Singgah leh anteh meh a tamthei thei neiding. Singgah tuamtuam leh be, kopi, mohpheng nam leh begap ahihi.
2. Kum 2-3 pen nikhat in tui manhai 2 dawn hamtang ding hi. Kum 4 pan a tungsiah in manhai 6-8 nikhat in dawn hamtang ding hi.
3. Naupangte annek khit sim in awnghawh ding pantah aa, hilh ding kisam hi. Tua hileh hundang te ah suakta tak in omthei ding hi.
4. Zatui zaha pen ahoih mah bangin a siatna zong om veve hi. Tamzat luat kidawm in.

Naupang sungkhak pen kaalkhat ciangbang ahih a, agil sung nongkailo, ateidan kibang, phamawh a sak kei leh pen lungkham huai lo hi. A hizong nisawm bang hong val leh Zato mangte khiang ah pai in. A lemvat kei leh Aisan bul zol hilhial in suizum inla mehkanna sathau nazut khit teh damtak dawt sak le cin asawtlo in hong daileng pah ding hi.

Philipkhaipu

Na khempeuh a semthei Pasian a nei mi in lungneu kei ta hen.
(He who trusts in the Lord shall not be disappointed).