Nasepna mun ah kikholhzia (Office Politics)
Naseppihte tawh na kikhawl kim thei hiam? Mi khempeuh tawh kikhawl kim thei cih bang haksa hi kici hi. Tuhun gam khangto a nasemte diakdiak pen nasepna mun ah hun delh a tai den, nawhsa a nasem den ahih manun kikholhna hun ding tawm neih mahmah uh a, kiholim man cih om mello ahih manin kinopmawhna zong tam deuh hi. Nawhsa a sep ding, manlang taka zawh khit ding, hun ciangtan tawh na kisem ahih manin a hun lap lo te adingin nasepna mun ah tungsiah pan gawtna, nuaisiah pan nawkna cih bang om neunau thei hi. Liangko kikim, nasep kibang ciatciat zong a sem siam deuh leh a siamlo deuh om a, mi a hehpihthei leh a huh nuam om in a ziakai deuh leh amah bek-a a tangpek nuam zong om hi. Tua banga mi tampi a ki omkhopna phual ah ngaihsutna kibanga tuiluang bat ding a baihlo ahi hi. Tua manin ei hong tawsawn nuamte kipawlpih a, ei hong pawlbawl nuamlote kipawlbawl 
manlo a, office khat sung, nasepna phualpi khat sungah zong pawl tuamtuam, group tuamtuam om thei hi.
Tua bang mun ah na om ciang bang cih ding?
A taktak in mihing pen i ngaihsut dan a kibang hetlo pi mah hi a, i thuvik siam dan, i thuneih siam dan zong a kibanglo a kikimlo ahi hi. Hoih i sak leh sia i sak zong kibanglo a, i thugenzia leh i nasepzia zong a kibanglo vive ahi hi. A kibanglo vive kibatsak ding ahi theilo ahih bangin a kibang ngaihsutna omte gawmkhawm thei leng a manpha mahmah ahi hi. Pawlkhat ama dinmun bek a khual a om laitakin pawlkhat a huampi a ding a gel den zong na om kawikawi hi. Tua bang neunau kituah khawm ahih manin nasepna mun ah kituahlohna, kikelkina om thei mah ahi hi.
Thuneih a ut den a om mah bangin, a langpang nuam den zong om a, a thunei lah hilo, a langpang lah hilo mi a mawhsak den nuam zong honkhat om leuleu hi. Tua pen mihing ngeina hi cih na theih na pom kisam hi. Tua khit ciang nang pen a koite na hi hiam cih na kitheih ding thupi leuleu hi. Tuate na theih khit ciang tua bang tawh kidim leitung leh nasepna phual, office pen bangci lut ding, bangci gamtat ding cih na telzaw thamtham ding hi.
Nasep na lut ciil in na nasepna phual ah bang thu teng om hiam cih na thei kei hi. Theilo na hih manin na mit hak kilkel inla, na bil palhsak in, na kam cip phot in, banghang hiam cih leh khatvei pau khial kha lecin nasep kipan nailo na mai bing pah malam ding hi. Tua ahih manin mite kihozia, mite gamtatzia, mite nasepzia, mite kikholhzia, mite kihuh kipanpihziate theihsawm inla, limtak kisin kawmkawm in damdam in gamtang phot in. Kua in thunei a, kua in mite lungdamna bawl a, kua thudik a, kua zuau thei a, kua kizahtak a, kua thudot tak hiam cihte theihsawm in hanciam mahmah in. Na lut ciil limlim ahih manin nasep tampi zawhsawm pah vava masa khol kenla, nasep khialhloh ding leh nasep khat peuh ah lungsim takpi tawh sem hiteh cih hong mute muhna ah lakkhia siam phot in. Nasep kipan tung khawng ziakai, nasep hun dinga tung nailo cih bang hipah cih pen kilawmlo bek hilo in mite hong muhna kiam hi.
Kuate kizahtak, kuate thu kidong, kuate thunei cih na theih khit ciangin na gamtat dan ding na gel theita hi. Kua leh kua kikhawl thei a, kua leh kikhawl theilo cihte zong na kan beh tohtoh hoih hi. Munkhat, phualpi khat, office khat a nasem hinapi a sungah a kikhawl tuam, a kipawltuam cih bang a om leh nang bangci om ding? Nang zong a thunei pawl ah pawl ding maw, ahih kei leh a phun pawl ah, a lehtat pawl ah pawl zaw ding cih bang om thei hi; kua tawh kipawl lecin nang nuntakna ding leh na mailam khantohna dingah hoihpen ding hiam cih na khentat kul ding hi. Khatvei teitei ciang na pawlpih omlo in na lai om theih loh hun hong tung ding hi. Na pawlpih tuak leh na kip kha thei a, na kiploh lawh kha thei hi. Utlo pipi in na nasepna pan na tawp zong kul maithei ahih manin na lungsim na kizawh ding a kisam ahi hi.
Thuneite tawh kipawl ding hilecin a thunei nuam, thunei lah, thunei zolo tengin hong lang muh ding ahih manin tua na thuaksiam diam, na dal zo diam, na dal siam diam cih na kingaihsut kul hi. Thuneite i cih zong mi hoih mahmah hi uh a, thu nei nuam i cihte zong mi hoih mah ahi uh hi. A nasepzia bek uh a kibanglo, a kikelki hi hi. Na lawm bawlzia, na pawl bawlzia in na tung na nuai leh na kikimpihte kizopna a suksiat loh ding thupi ding hi. Khat tawh na kiho theih manin a dang khat tawh na kihotheihna a tatsak ding leh suptaak maw, suptaaklo cih na khinkhai kul hi. Mi pawlkhat leuleu pen a thunei lah hilo napi mite a gawmtuah siam mahmah om hi; tua bang mi tawh na kizop theih leh na hampha mahmah ding hi. Tua hileh bel veilam lah kizoppihlo, taklam lah kizoppihlo, a langnih a kiho thei, semkhawm thei cihna hi a, na nasepna mun nuam na sa ding hi.
Na sepna mun nuam nasak leh na lawmte kiang pan na sin theih hong tam dinga, mite in zong nang theihnopte hong hilh nuam ding uh hi. Hong hilh bek hilo in hong kholhpih nuam den ding uh a, nang zong na kholhpih nuam semsem ding hi. Tua bang hun ciang kizopna kip deuhdeuh a, nasep zong lamzang deuhdeuh hi. Na tungsiahte lungdamna ding na sep theih, na sep siam leh nakpi in sem pah inla, amau muhna leh muhlohna ah zong hanciam in na lawmte muh ah a thanuam, a sem nuam mi na hihna lak ziahziah in. Nang hong pakta mellote tawh kizopna damdam in bawlhoih sawm inla, hong paktate tawh a lawhcing zaw sem dingin hanciam in.
Ahi zongin, nasepna phual khat peuh ah ‘mi khut a gul man nuam’ om den ahih manin tuate lak pan kikem siam in. Nang min, nang nasep paulap in midangte kawkna, nelhsiahna in zang thei uh hi. Tua bang mite lak pan kidawmsiam mahmah in. Gal bawl lo in lawm bawl zaw inla, kikholhpih hamtang in, ahi zongin na kammal gente kidawm in. Hong nawk gawp a hong zat sawm veve leh na peng nading zong kiging kholsa in om in. Lai Siangtho ah na galte it in a cih pen hih mun ah na zattheih leh nang adingin manpha mahmah ding hi.
Kidop dinga hoih khat, tuhun ciangin, tuhun ciang facebook khawng, internet khawng omta ahih manin i nasepna muna i lungdamna leh i lungdamlohna, i lungkimlohnate mipi sim theih ding, mipi zak dinga i gelh, i tangko, i suaksak loh ding hoihzaw hi. Bang hang hiam cih leh zanni leh tuni kibanglo a, zingciang zong kidang lai ding hi; tua ahih manin zanni a thupiang in tuni leh zingciang hun nuam ding a buahbangsak khak ding kidop huai, kidoptak mahmah hi. Zomi paunak ah, “Tui buasa kiluak kik theilo” a kicih mah bangin khatvei i genkhiatsa, i pulaksa pen mite in na ciamteh in kilakik thei nawnlo hi. Tua manin pau khialh sangin pau khialloh mah minphazaw hi.
Khanglui hun ah i pupate lokho in na kikhawl liailiai uh a, ahi zongin tuhun ciang Zomi khangnote ei bek hilo minam khempeuh tawh kikhawl in nasem khawm in i diang ziahziahta hi. Hih bang hun ah ‘gul banga pil a vakhu banga migi ding’ a kul hun theisiam ni cih deihna ahi hi.
Ka lungdam.
Hau Za Cin
Phuitong Liim
www.hauzacin.blogspot.com
Comment piaknop aomleh...