Malaysia aom gamdangmi te Election May 9 ni ki patau mahmah

Malaysia gamsung aom gamdangmi te Election May 9 ni ki patau mahmah

Malaysia gamsung ah kumpi kiteelna General Election pen hongtungding May 9 ni in akibawlding hita hi. Tuani ciangin Malaysia gamsung aom gamdangmi nasem te Phantom Voter tawh aki telkhialh khakding patau mahmah uhhi ci’n Migrant88 Program Director Khadijah Shamsul in genkhia hi.

Phantom Voter acihte uhpen Malaysian gammi ahilo, gamdangmi khatpeuh Vote piaksakna hi a, Phantom cih ii akhiatna pen sikha, aki mutheilo, aom taktaklo cihnopna ahihi. Phantom Voter cihciangin Malaysian gammi ahilo midang khatpeuh Vote piaksakna ahihi.

Migrant88 Program Director Khadijah Shamsul in hihvai tawh kisai in tuni Monday (May 7) ni in Statement khat khahkhia hi. Abeisa kiteel hunlai, GE13 hunlai inzong Malaysia gamsung aom gamdangmi nasem “Migrant Workers” te Phantom Voter in kizang hi cih lahtheih nading paulap kician, Evidence kician omlo hi ci’n genkhia hi.

Ahi zongin tulaitak Malaysia gamsung aom gamdangmi nasemte alauthawng theihtheih nadingin awging Audio File tawh ahi zongin, muhtheih Video File tawh ahi zongin hihvai aki khahkhia pawlkhat omhi.

Migrant 88 kipawlna panin Malaysia State 5 sung aom gamdangmi nasem 120 valte Interview kibawl kawikawi a, hihvai tawh kisai in dotna kinei hi. Hongtungding GE14 ah Vote piakding hongkicial hiam, National Identity Document hongki piading cih hongki genkha aomhiam ci’n dotna kinei kawikawi hi.

Tuabangin Interview akidot ciangin North South Initiative (NSI) te panpihna tawh akidong, akibawl ahihi. Ahi zongin tuabangin IC piakding in Phantom Voter akicial kuamah omlo cih kimukhia hi.

Azenzen in Malaysia gammakai kiteelni Polling Day ni in hongki lauthawngsak, hongki bawlsia khatpeuh aomleh kumpi thunei te ahi zongin, NGOs khatpeuh ah ahi zongin zasakpah un ci’n Migrant88 Program Director Khadijah Shamsul in genkhia hi.

More: Malaysia gamsung Election hunciang buaina aomleh sepziading kisin kholhna nei

Migrant88 te kiangahzong Email tawh [email protected] ahi zongin Facebook/migrant88 tungtawn in Message tawh ahi zongin ki zasakthei cih kiza hi. Malaysia gamsung ah General Election akibawlni pen gamdangmi te adingin lauhuai akicihpen adangdang himasalo a, Vote agukpiaksawm Phantom Voter hongki sakkhakding aki patau hizaw hi. Bangbang hileh migam milei ah illegal vive kitamzaw ahih manin, kidopsiamding thupi hi. Sawltak #zomidaily