Kipawl loding kacih ~ Evan. Suangh Dal

Kipawl loding kacih ~ Evan. Suangh Dal

Kilawh dinga piang hi napi a kilawh theih nadingin kipawl huan het lo hi hang. Coronavirus a kilawh loh nadingin:

• 1. Mi tawh kigamla om ding (Social distancing)
• 2. Khakna gi bawl ding (Lockdown)
• 3. Muk tuam ding (Mask)
• 4. Eimau’ inn tekah om ding (Stay at home)
• 5. Khut sil den ding (Wash your hand)
• 6. Khut kilen lo ding (no handshake)

Hih thute i etteh a lui zia mah pen a thak khanlawh nadingin a na kisam denzaw ahihna kimu thei hi. Old truth for a new awakening.

1. COVID=19 kilawh loh nadingin mi tawh kigamla om a kul mah bangin thu-uppih ahi lote tawh upna maan lo i kilawh khak loh nadingin kigamla om mah a na kul tawntung ahi hi.

2. Coronavirus a kilawh gawp loh nadingin khaktanna gi bawl ding a kul mah bangin, Christian thu-upna (doctrine) tawh kisai ah zong biakna dangte ii upkhialnate hong lut loh nadingin gi, huang, daai mah i kaih kul ahi hi. Kipawlna Pasian zah-a thupi a sate in President Trump in Mexico tawh gi dai a bawl pen a sia lam-a a muh ding uh hi loin i Christian biakna ah zong daai kisam hi hang ei cih lam ah hong muh ding uh hi zaw hi (na khat peuhpeuh positive tawh en ding na ci ta ve vua).

3. Natna i ngah loh nadingin muktuam a kul mah bangin leitung vai thute hong sung lut loh nadingin Pasian thugente, Pawlpi kem Pastors te in a muk a kam uh Lai Siangtho Pasian’ kammal tawh a kituam a kidal den uh kul hi.

4. Hih pulnatna i ngah loh nadingin i inn tekah om kul a cih mah bangin upkhialhna sungah lut-a i upna bulpite a taisan i hih khak loh nadingin eimau’ Pawlpi tek ah kikhawm ding, eimau’ Syate mah thu hilh sak ding, eimau upna (doctrine) ciat mah it ding, mi pawl khawng, pawi tuamtuam, thu kigenna tuamtuam khawngah tai doidoi kawikawi lo ding.

5. Khut sil den ding a kisap mah bangin i thugen, i kalsuan zia i tawn i lam zia a dik mah hiam ci-a Lai Siangtho tawh kisil den kisit den ding.

6. Virus i ngah loh nadingin khut kilen lo ding a kul mah bangin kikhop hun sung khawng-a na gei-a te khut na len o cih thapaite pawl virus kilawh vai lel, ahihna thute hong musak hi. A khengval-a khamitna peuh sa-a khut i kilet thapaite hong kiam ta hen.

Mi tawh a kipawl thei lote in zong kipawlna tuam mah nei veve uh-a; mi tawh kipawl thei ung a cite in zong kipawl theih loh pih tuam mah nei veve uh hi. Kipawl lo ding ka cih teh Christian te pen kipawlna masuan hi loin kipum khatna masuan hizaw hi. Coronavirus a kilawh theihna lampi ah kipawl ding hi lo-a, hong kilawh lo sak ding thukhun te ah kipumkhat ding hizaw hi.

Christian te pen leitung mah ah zong ki-om lai ahih manin cih puatpuat ding hilo zawin leitungah ki-om lai lua zaw ahih manin Jesu Khris tawh hong kigam lasak thei khuasakziate in hong lawh loh nadingin Social distancing, lockdown, mask, stay at home, washing hand, no handshake te mah kisam hi hang cih thu hong mu sak nuam ahi hi.

Kipawl lo ding ka cih teh kipum khat ding ka cihna hi. Christian te pen a kipawl gawp dingte hi loin a kipum khat dingte hizaw hi.

I Tuiphum upna ah kipumkhat ding, RC ten RC upna mah, SDA ten SDA upna mah, AG ten AG mah, EBC ten EBC mah, Presbyterian ten amau zia mah, eimau Pawlpi le upna ciat ah kipum khat zawh sawm lel tek ding. Kipawl sawm gawp tawh leitung vai lam kitung zaw ding-a, eimau Pawlpi ciat tawh kalsuanna pen Khris Gam a tangzai baih theih pen nading-a Pasian hong piak lampi hizaw hi. It is the best way to spread the gospel hi. I kipawl lohna te zong kipawl theih lohna vive-a zong va muh se kul lo hi. Kipawlna buai-in buai kei ni. Khris lungdamnathu eimau pawlpi ciat pan maan tak le dik taka tangko theih ding buaipih huai zaw hi.

COVID=19 natna a kilawh theih nadingin ih kipawl het loh mah bangin, leitung tawh hong kipawl sak thuhilhna ahi “I kibatna teng gawm kibat lohna teng hemkhia” cih thu hilhna ah i kipawlhuan het loh ding. I kibat lohna ahi, tua Jesu Khris ii tatkhiatna thu le a thawhkikna thu mah kemcing bek hi loin tangko khiat ding hi lai zaw hi. Kipawl lo ding ka cih… Evan. Suangh Dal – Zomi Daily